那些年，我最愛的兩個女孩子: 12

媽媽出殯當日，契媽契爺以長輩身份陪伴我地，媽媽好多中學同學、同事都黎左送媽媽最後一程。
英華女學校，送左個花牌黎，仲有英華女校嘅校友會、媽媽同契媽當年果班、佢地嘅校長，仲有秀茂坪嘅街坊，家姐間學校；聖嘉勒女書院、我地兩姊弟嘅小學；西區官小，令我想像唔到嘅，竟然…仲有北角警署嘅反黑組同埋我學校師長
 
一眾反黑組同黃警司一早黎到幫手打點一切，而我學校校長老師黎到果時，佢地都傾左好耐
 
「細佬，你忙左成日，洗唔洗休息?」
 
「唔洗，呢個係我責任…家姐妳同詩敏去休息下啦」
 
果時5年級嘅詩敏已經好懂事，佢留係我身邊唔肯休息，每一次向來賓致謝，佢都係我身邊




 
「家姐，妳俾我陪住阿哥好嘛?」
 
家姐望一望我地兩個
 
「嗯……」
 
再一次，我見到林醫生嘅花牌，佢都係代表一家四口送花牌黎。再一次，佢自己黎送我媽媽。雪凝，點解妳唔黎?我而家好想妳係我身邊……
 
第二日，媽媽火化了，今次…我連按制嘅力都差d用唔到




 
纓紅宴後，我同家姐兩個人返屋企，我地兩個都冇出聲
 
隔兩日，我地開始收拾媽媽遺物。係一個好舊嘅File中，有一封媽媽寫俾自己嘅信
 
「我係英華女學校學生，葉嘉麗。我成績唔差，所以當我住灣仔寮屋區時，成功考入英華女校，識到我最好嘅朋友，孔美玲。
美玲佢真係對我好好，我冇錢食飯，佢會分佢飯盒俾我。我冇錢買新書，佢會買埋我果份。我d校服爛到補唔到，佢會送佢d舊校服俾我，不過我知道係佢用零錢買俾我。
但係我係一個卑鄙嘅人，係F.6果年，我地班黎左個男仔，我同阿玲一齊鍾意左佢，但係我知道，Tony係鍾意阿玲，於是我用盡手段，成功搶左Tony過黎，但係阿玲冇嬲過我，我真係好卑鄙。
所以當年我考唔到大學，就係上天俾我嘅懲罰。如果可以，我想生一個囡囡，我會送佢入英華女校，由佢代我入大學嘅夢想，希望我同Tony可以生返個囡囡啦。」
 




家姐邊睇封信，眼淚就不停流出黎，我第一次見家姐喊得咁犀利
 
「媽咪…對唔住……我當年冇讀書唔夠叻……對唔住呀….」
 
家姐跪係到不停咁喊
 
爸爸話過，我要照顧家姐、保護家姐，而家佢咁樣，就代表我失職。爸爸係女校男生，佢做到…我應該都做到…
 
我起身攬實家姐，緊緊咁攬實佢
 
「家姐!!我幫妳同媽媽完成佢!!!」
 
「阿風?你講咩話?」