遲得恰好的告白: 第五集+後記+重載感言
「點解嗰陣時你要同我講，你已經完全放低咗佢。點解嗰陣時嘅你要畀一個假希望我。點解你要令我覺得自己好特別，然後又再次傷害我。我究竟做錯咗啲乜嘢？你點解會咁熟練？」她紅著眼睛看著我，但比小雪的感覺來得更強烈。不知怎的，我有一種心如刀割的痛，可能這就是內疚。
.
看著她的淚痕，感受著一陣陣吹來的海風，原本遞上紙巾的一個簡單動作，頓時也變得份外困難。高兒不想再看著我，她輕輕轉身靠在海濱長廊的欄杆，慢慢用手肘抹乾眼淚，再拿起手機把玩起來。
.
「對唔住呀高穎儀。雖然遲咗三年，但我發現我一直放唔低，一直最鍾意嗰個係你，一直都係你。」我鼓起勇氣從她的身後抱緊她，把埋藏於心底多年的句子說出。
.
高兒似乎開始冷靜下來了，我把她溫柔地轉回自己面前，輕輕按著她的頭，再抱在胸膛前，感受這份難以形容的溫度。現在，彷彿一切都已經變得不再重要，我只想好好捉緊心跳，與高兒追回這三年的時光。
.
「好耐都冇試過咁樣抱住你喇…」高兒靜靜地說。
「係咩？台灣唔係試過喇咩，都唔係過左好耐姐~」我回應道。
「嗰次唔算呀！嗰啲位都唔關事。」高兒抬起頭來，一邊摟著我，一邊看著我。
「係咩？」我還她一個暗笑。
.
她突然用力捏了我一下，讓我大叫一聲。
「做咩無啦啦搣我呀！黑人問號？」我不滿的道。
「咁點解我頭先會見到你攬住小雪，仲幫佢抹眼淚吖？我仲聽到你講話咩以前好鍾意我，但而家個感覺唔一樣，你係咪想溝返佢？」伴隨著這條問題，她帶著那熱切期盼的目光再次看著我，讓我頓時不知所措。
.
我微微用力推開她，但我倆仍兩手緊扣著，我帶著那把對女朋友才會如此溫柔的聲線，向她娓娓道來事實真相：「高穎儀，你唔好諗多咗啦。嗰個唔係你嚟㗎！我嗰陣時講緊嘅係小雪唔係你。咁我當年真係對佢有好感吖嘛，我想同佢喺埋一齊。但係，我而家睇返，我根本唔係鍾意佢呢種人。」
.
「咁你嗰時鍾意佢啲乜？身材？」語畢，她又再一次盯著我看。
我情不自禁，帶著一份尷尬的笑容看著她，和她的上半身，再說：「咪玩啦，我係睇身材嘅話，就一早唔揀你啦！」
.
「頂你！死cheap精。」她想鬆開我的手，但我仍然用力緊緊捉著她。因為這一次，我不可以像台灣旅行一樣，讓她跑掉了。
.
「你話我係咪係囉。不過，你真係覺得我似啲咁嘅人咩？」
「好！咁我畀你講，你鍾意佢啲乜？」
「你真係要問？」
「係！」
「我鍾意佢，係因為我嗰陣時喺佢身上見到你嘅身影，一個我當時得唔到嘅身影……」語畢，她收回剛才的眼神，面無表情地看著海旁。
.
「我知我係衰……但係！所以個天都冇畀我溝到佢囉。相反，佢仲要搵咗個天使嚟拯救我㖭喎！」
「今次又邊個女神呀？」
「你又真係要問？」
「係！」
我打開我的手機，在打開相機內的自拍模式，遞給她。
「呢個女神囉！我知道今日五月廿九係佢嘅生日，所以我親手整左份禮物畀佢。」我從背包中拿出自己親手製作的一束花。「我唔知佢今晚係咪真係會落嚟搵我㗎，如果我見唔到佢嘅話可能我就會寄呢紮花上天堂，然後寫低『對唔住，我好中意你』就算。不過好在，上天對我不薄，佢而家都喺我身邊。呢紮花係送畀高穎儀你嘅，18歲生日快樂」
.
當高穎儀接過這束花後，眼淚又再次奪眶而出了。但此時此刻的她，是帶著笑容去哭，哭成一個最美麗和最幸福的女人。
.
[第一季完]
插畫：Fat Ki @fatkiiiii
--------------------------------------
後記：好多謝大家一直以來都支持我寫唔同類型嘅故事。我文筆唔算好好，故事嘅爆炸位亦都唔係特別大，多謝你地仍然堅持去睇完呢個接近8000字嘅校園純愛情小故事。當初DSE完左之後一直都有寫愛情小說嘅打算，但我一直都未好好構思到一個完整嘅故事，同第二三季往後嘅發展大綱。直到五月廿八晚上嘅深宵忽然有靈感，於是即刻用紙同筆係咁，同個故事搏鬥左幾日。輾轉來到7月中，當我開始有返多少少時間處理自己嘅小說創作嘅時候，我就即刻打埋淨低嘅文章，趕及將呢個故事喺兩個月內完結。嚟緊我將會將呢個故事嘅前傳，台灣旅行篇寫出來，不過呢個就可能要等到我開學之後穩定咗生活先至可以繼續做喇。另外，有好多人問我靈氣師係咪爛咗尾。我可以好肯定咁同你講唔係！嚟緊我將會以短篇嘅形式盡力出多啲，希望大家會支持。
.
重載感言：當初因為覺得插圖唔係太靚，所以收埋咗個故事。之後遇到FatKi幫手，將五集嘅圖畫重新畫過一次。真係好感激佢幫我手完成咗呢一件事。以前決定寫唔寫落去，其中一個掙扎嘅位置就係身邊唔同嘅人嘅批評。而家決定寫唔寫落去，反而係自己同自己嘅掙扎，我發現自己嘅拖延症真係好勁。嚟緊我想繼續寫主角當年去台灣，自己一個畢業旅行嘅故事，完成返第二季嘅故事線，就算自己幾唔得閒都好，就算自己拖延症幾嚴重都好，我都想繼續做好件事。因為說故事，真係一場精彩嘅冒險。對於皓旅人來講，亦都係一次難忘嘅旅程。希望大家喺我嘅旅程當中，沿途有所得着。再次多謝大家拖咁多個星期稿都肯睇晒成個故事。
.
靈感：20190528
動筆：20190529
面世：20190604
完結：20190716
重載：20200719
終結：20201010