Killer: 警總淪陷
警總淪陷
在黃色燈光的映照下，本身矮小瘦弱的PPRP Jasmine顯得更加消瘦憔悴，可能是承受著被控告的驚惶吧，然而眾人的目光卻落在鄺神Shirley身上，恍惚無人關心Jasmine的死活。
獨享眾人目光的Shirley十分清楚自己受歡迎的原因，所以她也不打算吝嗇她的發現︰「無錯，我的確知每晚邊個會被PoPo殺，亦都知道邊個係一哥，不過我地要攆走佢，一係靠武肺，一係我哋黃營要有人犧牲一換一，武肺就已經傳播緊，啱啱第一個應Fanny機嘅係邊個我諗大家都未必會留意同記住，所以都控制唔到佢可以準確傳到畀一哥，即係你，阿Tim！」
面對突如其來的指控，阿Tim神態自若，完全沒有把它放在眼內，只是以一貫的語氣應對說︰「哈哈，你都黐撚線，求鳩其隊個人出嚟就話係，我夠話你賊喊捉賊囉。」
Shirley早就預料到阿Tim會狡辯，所以完全沒有退縮，反而拿出更實質的證據︰「阿Tim，你口講咩都無用，因為有啲嘢係你點都無得抵賴。」阿Tim傻了眼，但依然嘲笑著Shirley。
「雖然只係經歷過三Round，收集到嘅證據好有限，但頭兩Round大家都喺一個蚊飛都聽到嘅寧靜環境之下，如果大家有留意，應該會記得MC叫一哥落決定嘅時候，每次都會聽到一啲錶帶嘅聲音，第一次聽以為咁啱，但第二次，第三次都依然喺同樣時間出現，所以喺大家討論嘅過程中，我都好刻意睇大家有無戴錶，用咩錶帶，最後發覺只有朱Ling﹑Harry﹑阿偉同你係符合哂關於錶嘅條件，然後根據我聽到嘅位置，我就好Sure係你。」
Shirley此話一出，坐在阿Tim右面的誠哥Andy驚訝萬分，激動得站起來指著他說︰「原來係你，初初以為你咁啱郁一郁手，都無點留意，Shirley講開先覺，每次都係MC叫一哥決定人選嘅時候你先會郁，兇手就喺我隔離，真係估唔到。」Andy的激動與阿Tim的冷靜相映成趣。
其他人也激動起來，當然當中有些人是要想方設法替阿Tim洗脫嫌疑，但又不能太過明顯。
此時，身染武肺的Ray哥第一個站出來說話︰「唔係喎Shirley，啱啱聽完你咁講我諗返起，我覺得應該係Andy，因為第一次MC叫一哥決定嘅時候，佢個方向我聽到張櫈郁嘅『吱吱』聲，而全場咁多張櫈，係得佢嗰張有聲，我都觀察咗幾Round先敢講，怕亂講害咗人，Shirley，你應該都有留意到啩？」
藍絲阿偉看得出Ray哥的用心，便搶先Shirley附和道︰「係呀係呀，Ray哥，我都聽到，你一講我就醒起，之前MC介紹我哋角色技能嘅時候，講到一哥嗰時有好多聲，其中一個就係Andy嗰面傳嚟。」Ray哥看到第一個回應的是阿偉，下意識的藐了一下嘴，但只出現了零點零二秒，旁人沒有察覺得到。
由於有多一個人佐證，一時之間Andy是一哥的言論蓋過了阿Tim是一哥，而維基Annie更火上澆油的說︰「話唔定係Andy想揾阿Tim做替死鬼，所以先附和Shirley嘅推論，可能係Shirley聽錯方位，始終佢哋坐得咁近，聽錯都唔奇。」
隨著Annie的假設，Andy才是一哥的言論甚囂塵上，Shirley和Andy怎樣解釋也於事無補，然而，最關鍵的是一直被忽視的Jasmine。
「咳咳……我想講兩句先。」眾人此時才驚覺完全忘記了要辯護的Jasmine，她看中了現在的混亂情況，提出了令人難以拒絕的交換條件以自保︰「我係PPRP，所以我知道哂邊個係PoPo，邊個係一哥。我其實只係想求生存，唔想死啫，好簡單，所以如果我唔駛死嘅話，我會爆哂佢哋嘅身份出嚟作為交換，呢度無禁令，唔怕起PoPo同一哥底，所以希望黃營嘅朋友救我！」
Jasmine此話一出，眾人討論焦點立刻由誰是一哥轉為Jasmine是否必需死，當中不少黃營人士傾向要留她一命，而藍營人士則分成留與不留兩派。留的一派主張多一個人投票時多一分力，而且Jasmine只要給錯的人選更可借刀殺人﹑剷除異己，更何況根本無人知她是否真的是PPRP；至於不留的一派顯然是怕被她出賣，留一個為保命不惜出賣己方情報的人在身邊，這是養虎遺患，留不得。
大家你一言我一語，十七人的房間噪音程度可比得上下午最繁忙時段的街市，環境也是一塌糊塗，畢竟血噴灑得滿房都是。
G鋒朱Ling卻在此時一針見血，令Jasmine見血封喉︰「嗱，你要明先，佢話自己係PPRP，邊個知？佢如果係真，咁佢隊出嚟嘅人又點會係真？如果佢係假，佢隊出嚟嘅人又會係真咩？點保證先？點睇都係佢想活命嘅詭計，好明顯佢計過條數，知道而家親黃活命機會大啲，畢竟票數上黃嘅佔優。所以綜合哂所有嘢嚟評估，我唔覺得應該畀機會佢。」
眾人聽完後靜了數秒鐘，然後才如夢初醒，懂得作出反應，就在此時，燈光轉為藍色，各人又再次回歸靜寂。
「其實唔理係阿Tim定Andy係一哥，我哋都無辦法去解決佢哋，畢竟『犯法就係犯法，除非你係警察』，我哋無權無勢嘅，只有等佢哋畀天收，啱啱朱Ling講得好啱，Jasmine佢而家講嘅任何嘢都係無人會信，呢Round唔死，下Round佢都係要死，因為佢已經得罪哂班喺度操生殺大權嘅人，與其係咁，不如下Round投新人仲好，唔好嘥咗個機會，Jasmine就賜佢一死啦！」柒婆Vanlee將Jasmine當棄子，同時再鞏固她扮作黃營領袖G鋒的身份。
聽完Vanlee的說話，除了燈光轉回黃色外，眾人亦都確定了投票的方向。
「我真係會講真話㗎，你哋要信我呀！」Jasmine欲哭無淚，奮力作出最後的拉票，然而她的說話再也沒能夠傳到各人的心裡，因為在不知不覺間，Vanlee的說話已經成為所有人跟從的方向。
藍光「嚓」一聲的亮起，今次說話的是傳媒︰「十五分鐘話咁快就過，又係時候投票喇，雖然啱啱我同全世界嘅觀眾都睇得好開心，亦都估計到個結果，不過循例都係要投票嘅，時間交畀你哋。」
投票時間開始，取而代之的是紅燈，這輪投票相比起前兩輪，各人明顯沒有猶疑，不消幾秒便完成全民投票。
「十八票對零票，陪審團一致裁定，被告PPRP Jasmine罪名成立，判處爆頭死刑。」傳媒在藍燈下宣布結果，而Jasmine亦在宣告刑罰的瞬間被電子眼罩的針刺穿頭部而當場死亡，紅紅的血液混著黏稠透明的腦脊髓液在地上擴散，狀甚恐怖，但更恐怖的是眾人已經開始習以為常，沒有再顯得驚惶失措。