知唔知毒撚最忌咩？毒撚最忌係...中意人: 第三章
一早醒來，只見窗外嘅陽光份外刺眼。今日既天氣好好，但... 其實我有啲想佢落大雨。 因為今日就係講左好耐既旅行日。
我特意起身先沖一個涼，我換左套琴日喺UNIQLO度買嘅T恤同短褲，個樣已經夠毒，廢事連衫都着得咁毒，
臨出門口，我望住客廳塊大鏡照咗好耐，不過點搞個頭都仲係咁蓬鬆咁亂。
「榮仔！ 記得袋好啲錢吖！」
阿媽喺睡房大嗌提醒我，呢一次旅行，其實我問阿媽好耐先攞到錢去買飛。
「得啦！」
「噼！」
我閂上屋企鐵閘，心底裏暗地裏同自己講今日一定要加油。
「23... 24... 好，齊人！」
章浩明，我地班既男班長啱啱點完名，
「嗱，咁呢，鑒於之前有同學覺得我哋今次去海洋公園唔夠特別，」
佢望左我一眼，其他同學即刻會意佢抽緊我水，係到笑。
「所以呢，我同女班長商量咗好耐，今日我哋將會分成四組人，沿途一路玩各種機動遊戲，一路完成我哋嘅指定任務，每完成一個任務果一組就會得分。如是者，去到今日最尾最低分過一早將要接受我哋嘅大懲罰，你哋話好冇！」
佢講完，全班即刻起哄，我都好假咁濟左個笑容出嚟。
伍旬哲已經即刻搵曬佢啲兄弟分好組, 女仔果邊亦都即刻埋曬堆，得返我同柏林仲有幾個油頭毒撚企喺中間未有組。
正當我盤算緊應該痴去邊一組嘅時候，女班長善意解決咗我嘅尷尬。
「喂喂喂，我幾時有話比你哋分組啊。今日不如就當係我哋重新認識過班入面嘅同學啦，雖然話就話同班左幾個月，但係你哋對班入面嘅同學又有幾多認識呢。嗱，咁我同章浩明琴日已經討論左點樣幫你地分組㗎啦。」
跟著佢拎咗部iPhone出嚟， AirDrop左張相比其他同學，張相係我哋今日嘅分組，但係由於我一直都係用緊LG舊機嘅關係，我仲未睇到張相嘅分組係點，所以分外緊張。
「屌！ 唔係吖.. 點解我冇得同吖旭一組。」
伍旬哲望到張相之後好激動咁喺度講。
呢一個時候，柏林亦都已經比我睇返分咗組嗰張相，難怪成班都喺度怨聲載道，原來佢哋特登將一啲好friend嘅組合打散，將一啲唔熟嘅黐埋一組，每一組有男有女，擺明係想玩嘢姐！
不過其實對於我呢啲毒撚來講，同邊個一組都係一樣，只係有組同冇組嘅分別。
而且....
「葉詠欣！」
「喺！」
我聽到之後個心嚇咗一跳，原來係女班長佢哋開始分人上旅遊巴。 如果我冇睇錯，今日我係同葉詠欣一組，即係話嚟緊嘅一日時間我都可以喺佢身邊...
「陳奕榮！」
「喺！」
「你都係搭呢一架旅遊巴。上到去唔好揀位坐啊！」
就係咁，我緊接着葉詠欣上咗旅遊巴，只見呢一㗎旅遊巴分開兩邊，每一邊有兩個座位，葉詠欣坐咗去其中一排嘅入面嗰個位置，我喺度諗緊我係咪應該坐喺佢隔離....
「行啦唔好阻住個地球轉！」
後面嘅楊俊軒係咁推我，崔我快啲行。
於是我只好深呼吸左一口氣，坐咗喺葉詠欣隔離嘅位置。
只要我一坐落去果下，佢下意識咁往入邊靠，好似想同我畫番條界線。 我都緊張到好似坐喺啲釘上面，條腰骨直到冇得在直。
「出發！」
隨着男班長嘅一聲呼令，旅遊巴從九龍城嘅校舍開出，往海洋公園出發。
一路上，可能由於隔離位置嗰個係唔熟悉嘅同學，一開始並未有好多傾偈嘅聲音，但係慢慢咁，大家都放低咗隔膜開始同隔離位嘅同學傾偈。
「係呢葉泳欣。你係咪都讀Geo架？」
dead air 左一段好長嘅車程，我終於終於鼓起我嘅勇氣，故作鎮定咁問左一句廢到冇得再廢既廢話，但其實心底裏驚到瀨屎。
但係隔咗好耐，佢都冇答我，唔知係咪因為我講得太細聲佢聽唔到，正當我喺度諗緊我好唔好再問多佢一次嘅時候，我望左過去，發現佢兩邊耳仔帶着一個叫AirPod 嘅物品望緊窗外嘅風景，原來佢可能根本冇諗住同我講嘢....
車廂嘅喧鬧同我哋之間嘅死寂形成左好大嘅對比， 跟著過紅隧既時候仲要塞車... 短短40分鐘既車程，變到異常地耐。 我冇咩frd既 ig 同 fb 更加比我掃左唔知幾多次。
「呤呤！」
突然，我手機一震。
來自小矮妹的信息。
冇理由格，明明呢個鐘數佢應該返緊學，但係佢搵得我真係好及時，我即刻好似捉住一條救命嘅稻草咁。
打開佢既訊息。
「點吖，今日順利嗎 :) 」
琴晚臨瞓前，我同佢傾咗好耐，講到我今日要去旅行日有幾擔心，驚自己要自己一個人坐過山車，又驚會有柒事發生。
「你唔係返緊學咩，點解會搵到我㗎。」
「err , 我今日病咗冇返學，咪睇吓你點囉。」
「：（ ：（ 」
我sd左好多個喊嘅表情符號，
「做咩啊，有事發生！ ？」
「好尷尬咯... 我唔知好彩定唔好彩，我坐咗係果個女仔隔離，但係我而家同佢dead曬完全唔知講咩好！」
我有同佢講過我鍾意過一個同班嘅女仔，所以佢一路都俾咗好多意見我叫我點樣去取得呢個女仔嘅歡心。
「be brave ! Be confident!」
「你唔記得咗我教你咩，快啲諗吓你同佢有乜嘢共同話題。唔好再喺度讀手機啦，搵機會同佢講吓嘢！」
「你女朋友？」
一路都喺度望緊風景嘅泳欣，唔知由幾時開始望住我部電話睇我同小矮妹既對話，笑住咁喺度問我。
我個心當堂嚇咗一跳，我完全冇意料佢會做主動搵我講嘢嗰個！我更加驚佢見到我同小矮所講嘅內容，知道我對佢有特別嘅意思。
我即刻故作鎮定咁，熄咗部電話答佢，
「唔係啦，你望吓我個樣，我點會有女朋友呀，呢個細妹嚟㗎。」
我記得冇溝女大師曾經講過，絕對唔可以喺自己鍾意嘅女面前，俾佢知自己同第二啲女仔有聯絡。所以嗰刻我毫不猶豫咁否認左，總自抽咗一下添。
「哈哈，咁有係。」
「係呢，你仲記唔記得我，以前我哋都好似……有見過面傾過計？」
為咗唔俾話題完結，我真係好努力咁搵啲嘢趕。
「有咩？ ……」
佢好似好認真咁諗咗一陣，若有所思咁答我。
「有啊，上年陸運會呢，你幫我貼過膠布㗎..」
當時係我第一次接觸穎茵，說起上嚟有啲柒，嗰陣時我社長幫我報咗跨欄，不暗體術嘅我結果係最後一個圈嘅時候因為唔夠氣而成個人仆低左。
嗰時咁啱佢紅十字會當緊值，幫我做急救，佢做急救嘅時候真係十分之溫柔...
「有咩？ 我真係冇印象... 哦！ 你係果個仆低左果個！」
泳欣喺度暗住嘴咁喺度笑，雖則係笑我嘅柒事，但你能夠令到佢笑我已經好開心。
「喺阿！ 之後我有特登多謝過你架，你仲講笑叫我請番你食飯既。」
「下？其實呢，我真係唔係好記得我有同你講過野，」
我笑緊嘅表情僵硬左，我以為我哋係一個朋友嘅關係，但其實呢啲都只不過係一個毒撚嘅自作多情...
「不過呢！ 今日之後我地一定會熟左架！」
聽到呢句我至開心番少少。
「同埋其實呢...」
「喂到啦！ 大家執好野準備落車啦！」
講到一半突然之間比章浩明打斷咗，真係好鬼死唔好彩。
正當我諗住轉新執嘢走落車嘅時候，詠欣竟然掂左我一下。
「其實咩？」
唔知係因為見佢咁重視我同佢之間嘅對話，定還是係佢點叫我呢一個讀撚隻手一下，我果下真係好興奮又好緊張。
我原本想講，其實我當左你係我朋友好耐,但係估唔到原來你都係唔識我嘅哈哈，但係我真係冇講呢一句出口。
「哦冇……我諗住話，其實我都係紅十字會㗎。」
只見穎茵呆咗一呆，諗一陣點答我，可能佢以為我諗住講一啲好重要嘅嘢點知又比我講咗句廢話。
「哦，好啦。」
佢淡淡咁回應我。
落車果陣，我見到我電話有六個訊息都係來自小矮妹，不過我都係熄左機冇覆佢。果下，唔知點解覺得自己有啲仆街。
總算，同詠欣叫有講野，雖然唔多，但... 都合格啦！
不過，呢個只係今日既開始。