知唔知毒撚最忌咩？毒撚最忌係...中意人: 第一章
我叫阿榮，陳奕榮，今年16歲，係一個中五準備考DSE既學生。
我唔高，唔靚仔，唔識講野，更加唔識得溝女。唯一叫做在行少少既可能就係叻每日係屋企到寫下野鋪上連登。哈， 其實呢個都唔知叫唔叫做長處，或者應該叫做興趣會適合啲。 係網絡上，可能見唔到樣既關係，我講野會自然好多，有時鋪左啲搞笑既事出尼見到多人留言我仲會好開心。
但係.. 現實既我.. 只係一條一無是處既毒撚。我既自信一早已經比面上既暗瘡掩蓋左。
中五，其實係中學可以體驗到學生生活既最後一年，因為去到中六大家基本上已經比密密麻麻既學業淹沒左，因為大家都開始感覺到文憑試帶尼既壓力。
好多人話，要溝女，就要襯中五，呢段時間既女仔，唔會好似初中既女仔咁唔成熟咁爛玩，又冇大學既女仔咁現實， 而且中五既女，通常都係開始個樣變得成熟，但又保住幾分稚氣。
唉！ 諗到呢到，我望一望自己個樣，都係諗下好。 我一條毒撚都學人講溝女？唔好話女，我朋友都唔多過5個啦。
「喂喂喂，都係去海洋公園啦，橫掂我地班大把人都有年票既。」
就係我發緊白日夢既時候，班房既吖哲同吖旭係到嘈緊今年學校旅行應該去邊。
「我唔讚成咯，去到入邊又要同啲大陸人排隊，一日都唔知玩到幾多個機動遊戲。我都係覺得去郊野公園好啲。」
吖旭反駁好想去海洋公園既吖哲。
佢地兩個一人一句咁討論今年旅行既目的地。 坐係出面既Miss Lee 都當睇唔到，因為呢段時間係班主任課，但其實就即係吹水堂。
「喂你兩個唔好再嘈啦，我呢個班長都未出聲。 不如搞個全班投票咪得。」
呢個時候女班長善儀加入左佢地既對話。 而坐正係佢地前面既我就一邊扮睇書，一邊竊聽風雲竊聽風雲咁偷聽住佢地既對話。 講真，我都好想加入佢地既討論，但奈何奈何我呢個邊緣人既意見，根本唔會有任何人想理會。
「仲有一個星期，就係一年一度既班會旅行啦！不如大家投票揀下我地去既地方咯。」
那邊廂，善儀己經走左去黑板前，嘗試以一個好興奮既語氣咁講。 班上面既人即刻七嘴八舌咁係到討論。
「喂，阿榮，揀咩好。」
坐我架離，同我一樣帶住副黑框眼鏡，個樣毒毒地既柏林問我。 可能因為大家都係毒撚既關係，佢大概係唯一一個會主動同我講野既人，亦係我呢幾年嘅好兄弟，基本上飯腳，分組，所有野都係佢同我。
「其實兩個... 我都唔係好想去。」
「哈，真係毒撚尼。」
「你唔係。」
我同佢就係成日咁寸尼寸去。
「好啦，我哋而家開始投票，想去海洋公園嘅就舉手。」
善儀一講完，即刻有大半班人舉起手，睇尼大家都比較想去海洋公園。
柏林見多人舉手，都跟風舉手。
但係我仍然無舉手。
未幾，善儀再問，
「想去郊野公園嘅就舉手。」
結果，只係剩返當初提議要去嘅阿旭舉手。
但係我都冇舉手，因為我係到諗緊....
「好啦，結果好明顯，咁即係大家都想去海洋公園啦，不過，err ，果個叫咩名...」
呢個時候，善儀突然間指住我，喺度講
「吖陳奕榮，你手又唔舉，票又唔投即係咩意思啊。」
我本身以為佢會忽略咗我，佢突然咁樣一問即係令到我嗰刻十分之尷尬。不過既然係咁，我都將我自己嘅想法講咗出嚟。
「其實呢，我喺度諗，都最後一年啦，不如今年我哋去啲特別啲嘅地方，唔好再去一啲咁冇意義嘅地方？」
講完果一刻，我真係覺得自己已經用咗出世以來嘅所有勇氣， 一時之間全班人嘅目光都放咗喺我身上，而隔離嘅柏林呆咗咁望住我。
「咁陳生你有咩提議？」
善儀語帶不滿咁問。
「今年科學館舉辦左一個好特別嘅主題，有尼自白惡紀嘅恐龍化骨展覽，我認為呢一個展覽十分之特別，而且完咗之後我哋仲可以喺出面嘅海旁嗰度影相係一個好唔錯嘅地方。」
「白惡紀！！ 」
「旅行日睇博物館！！ 小學雞咩」
「個毒撚係咪成間房都擺曬啲化骨！！」
就係我講完果一刻，班房嘅同學即刻傳來非常之猛烈嘅恥笑聲，嗰一刻我就知自己柒咗。
善儀都忍俊不禁咁喺度笑。
「你依家睇到同學嘅反應，咁我諗我都唔需要再特登搞多一個投票啦。」
連隔離嘅柏林都忍唔住不停咁喺度笑。我面都紅晒咁坐返低。
跟住嗰日全日我都冇咩點出過聲，我唔係喺度諗自己嗰下有幾柒，只不過我係喺度諗究竟有啲咩會驅使到我嗰下突然之間有咁樣嘅勇氣……
眨吓眼就放學，我同柏林都係嗰啲放學鐘聲一打就即刻狗衝返屋企嘅人。而我每日最期待亦都係放學返到屋企嗰一刻。
返到去，我9秒九咁樣打開咗自己部電腦。然後即刻禁入連登討論區，我開咗個post，將自己今日發生嘅事一字不漏咁打上討論區。 題目係：話說，今日發生左件柒事。
開咗post無奈，就已經有好多回應同埋讚。果然，連登嘅巴打最鍾意嘅唔係J圖就係花生。
每當有一個留言，我都會禁入去睇，好認真咁諗點樣覆一個回應，就算諗唔到都會俾個like。過咗一陣，突然間有個回應吸引咗我嘅注意。因為，睇佢個名應該係一個絲打嚟。
小矮妹：
你話你係毒撚，但係點解果一刻你會有咁嘅勇氣去提出自己嘅意見嘅？
我睇完之後，諗咗好耐都諗唔到點樣覆佢，於是我只係覆咗佢，
「 冇呀，純粹可能因為海洋公園啲飛貴。跟住我又唔鍾意戶外，所以嗰陣時至咁樣姐 XD」
見係絲打，我份外認真咁答。
估唔到，唔過一陣佢就覆咗我，
小矮妹：
睇怕個原因唔會咁簡單啦掛。我啲直覺好準㗎，你唔使旨意呃到姐姐我。
原來真係絲打，果下我真係有啲興奮，因為我已經唔記得咗有幾耐我同一個除咗我老母之外嘅異性有往來。
我嘗試轉移話題，
「你又知你係我姐姐，唔可以係我妹妹㗎。」
打完send咗出去之後，我已經即刻有啲怯因為我唔知我咁樣算唔算係有啲挑逗嘅感覺，可能佢會覺得我係狗公唔理我。
點知冇幾耐，佢好快就覆咗我，
「哈哈，我呢啲咁嘅靚女，唔係個個可以同我認親認戚架啵。你比我講中咗呢，係咁迴避我嘅問題。」
我一見到來自佢嘅訊息，唔知點解開始有啲興奮，雖然我同佢完全係一個陌生人，甚至佢有可能係一個有男扮女嘅絲打都話唔聽，但係我又我唔知點解睇佢嘅訊息，已經感覺到佢係一個好活潑好開朗嘅女仔。開始有啲興奮，雖然我同佢完全係一個陌生人，甚至佢有可能係一個又男扮女嘅絲打都話唔聽，但係唔知點解睇佢嘅訊息，已經感覺到佢係一個好活潑好開朗嘅女仔
「你多事啦 -V- 你好想知我啲野咩！」
我諗左好耐先覆佢。
其實講真，我今日所做嘅嘢，當然係有佢嘅原因啦。
唔知邊個心理學家講過，當雄性遇到吸引自己嘅女性嘅時候，腦入面分泌一種物質，呢一種物質會驅使佢哋做一啲反常嘅行為。
不過... 果個女仔會知道咩。
跟著果晚，矮妹仔冇再覆我，我諗我同佢都唔會再聯絡。