香城回憶錄全集: 004：方朗站生存戰

「沿途與他車廂中私奔般戀愛，再擠迫都不放開。
祈求在路上沒任何的阻礙，令愉快旅程變悲哀。
連氣兩次，綠燈都過渡了，與他再愛幾公里，
當這盞燈轉紅便會別離，憑運氣決定我生死。

祈求天地放過一雙戀人，怕發生的永遠別發生，
從來未順利遇上好景降臨，如何能重抬信心。

然而天父並未體恤好人，到我睜開眼，無明燈指引。
我愛主，為何任我身邊愛人，離棄了我下了車，你怎可答允。」

《少女的祈禱》

捷運快到達半灣東時，音然說道：「Mandy不如你今晚嚟我哋屋企過夜丫。」
「唔好啦，咁臨急臨忙嘅話，會打擾到Uncle、Auntie，同埋今日我都好攰啦。」我答道。
「係咯，小音，Mandy唔同你丫，平時好少企咁耐同行咁多路。你呀，次次過夜都要Mandy陪你玩到咁夜，成日搞到佢第二朝都無乜精神…」Hugo說道。
「得啦得啦，阿哥，知你驚Mandy攰啦！」音然先是不忿，然後調皮地問道。「不過你唔覺得Mandy唔夠瞓個樣仲可愛啲咩？」
「番到屋企，記得打電話俾我呀。」Hugo沒有理會音然，囑咐我道，面有點紅。
「嗯。」我點頭答道。

回家路上，想起我讀中五時，我和我的父母從水天圍搬到半灣。如果當年沒有搬家的話，大概我的父母也不會因為車禍過身，大概…



回到家中，打開電視，NEW新聞播放著警察在水城區，發射催淚彈和橡膠子彈驅散示威者，連記者也被射中了。正當我準備關掉電視機，上床睡覺時，突然看到電視機屏幕的右邊寫著：「即時消息：方朗站出現一群紅衣人，襲擊列車上的乘客。」
當我見到這則新聞，非常擔心Hugo、音然、Samuel、阿Ling的情況，嘗試致電給他們，但全部都沒有人接聽。

大約過了一個多小時，手機上幾乎同時轉來音然和阿Ling發給我的訊息：
「Mandy，快！快啲過嚟皇后醫院，阿哥啱啱入咗手術室！」
「Mandy快啲過嚟皇后醫院，唔好搭捷運或者巴士，飛的！」
當我上了的士，就不停低聲地祈求著：「爹哋，媽咪，你哋響天上面一定要保佑Hugo同Samuel無事呀。」

到達醫院後，首先見到的，是在急症室椅子上坐著的阿Ling。


「阿Ling！情況點呀？」我焦急地問道。
「Samuel帶住我衝咗出嚟，受咗啲皮外傷，而家響分流站等緊，Hugo就…」阿Ling欲言而止。
「Hugo點呀？！」我急了，把阿Ling的膊頭按得緊緊的。
「Mandy你冷靜啲聽我講，Hugo佢為咗保護扭傷咗腳嘅音然，雖然佢同Samuel一樣都識泰拳，但雙拳難敵四刀，俾啲紅衣人斬到好傷…」阿Ling說到最後時，大概是想起Hugo的情況，就哭了。
「等等，你同Samuel衝咗出嚟之後，無去搵警察幫手咩？」我不解地問道。
「警察？哈哈哈！！！哈哈哈！！！」阿Ling一聽到我說警察二字，就開始瘋狂地大笑著，聲音大到整個急症室的人都望著我們。
阿Ling冷靜下來後，開始說著在方朗站的經歷：「當我同Samuel衝咗出嚟之後，響天橋見到有三個黑帽子，梗係即刻嗌住佢哋，諗住搵佢哋幫手啦，點知佢哋越嗌越走！Okay我當佢哋見到咁多紅衣人淆底嘞，點知打911打極都打唔通！好啦！咁唯有試下打去方朗警署啦！你知唔知個仆街竟然講乜呀？！」
我搖頭，但我估計是令阿Ling很憤怒的回應，因為我認識她這麼久，從未聽過她說一句粗話。
「佢竟然話『驚就唔好出街』！跟住個冚家鏟仲收埋我線！」阿Ling憤怒地說道。
我腦袋完全停頓了，完全想不到任何反應。
「唔好理我同Samuel住啦，你去睇Hugo情況點先啦！」阿Ling見到我嚇呆了，就說道。
「嗯。」我答道。

到了手術室門外，音然一面憂心，但沒有流淚，只是說Hugo為了保護她，所以被紅衣人劈傷了，背部被劈得連骨頭都見到了。
在我到了皇后醫院後大約十五分鐘後，Hugo和音然的父母也趕到來了。


「點解會搞成咁㗎？我得一粒仔㗎咋！」Hugo和音然的母親大哭大喊著，我也忍不住哭了。
「阿媽你唔好咁啦，阿哥仲做緊手術，同埋你仲有我丫嘛。」音然走上前，嘗試安慰道，他們的父親則面無表情地輕按著妻子的肩頭，以防她太過激動。
「唔好掂我呀你！唔係你，你阿哥就唔會搞成而家咁！」他們的母親把手一揮，推開了正在走過來的音然。

又過了大約一個多小時，手術室的燈依然亮著，我去了洗手間一趟，經過後樓梯門口時聽到一絲微弱的男人哭聲，我把防火門推開少許，看見Hugo的父親正在合十，雙眼緊閉，臉上帶著淚痕。
「上天保祐，一定要保祐Hugo大步檻過呀！要我短幾多年命都得！」
我心一酸，輕輕把門關上，掩著面又哭了。

大約一小時後，手術室的燈關上了。
「醫生，我個仔情況點呀？」Hugo和音然的母親急切地問道。
醫生搖著頭說：「對唔住，我哋已經盡咗力。佢雖然而家暫時清醒番，但因為之前失血過多，導致身體各個器官出現衰竭症狀。等陣推番佢入病房之後，你哋就去見佢最後一面啦。」
「哇！！！」聽到醫生帶來的噩耗，我和Auntie幾乎同時大哭了，Uncle在旁邊安慰著她，音然則在我旁邊掃著我的背。

「阿爸，阿媽，對唔住啦，以後孝順唔到你哋，仲要你哋白頭人送黑頭人。」Hugo有氣無力地說道。「小音，Mandy，你哋要堅強咁活落去，要同班人鬥長命呀。」
「Mandy，如果你之後遇到鍾意嘅人，就忘記咗我啦，唔好俾過咗去嘅人綁住。」Hugo說著說著，眼皮快要合上。


「唔好！Hugo！我唔要你走！」我哭道。
Hugo淡淡一笑，沒有回應，大家都知道死神的鐮刀臨到了。
「仔，放心啦，我同你阿媽會照顧自已啦！」首先留意到的，是Hugo父親。
「仔，放心走啦！」Hugo母親一邊哭，一邊說道。
「哥，小音會幫你照顧Mandy啦。」音然沒有哭出來，只是眼眶也紅了。
「Hugo，你放心啦，我同音然都會堅強咁活落去。」我邊哭邊說，一點說服力也沒有。

過了一會，Hugo的手垂下來了。
「Hugo！」「仔！」「哥！」

安頓好Hugo的後事後，各人都準備回家。離開醫院前，我到洗手間整理一下儀容，正在回想著和Hugo的往事時，外面突然傳來爭吵聲。
「一日最衰都係你，係都要帶阿哥出去乜鬼遊行！而家好啦！個阿哥都俾你累死埋！正一佗衰家！」音然的母親高聲地埋怨著。
「阿哥啱啱先走咗，你係咪要逼死埋我先安落丫？」音然反問道。
「Auntie你唔好咁樣，音然你都冷靜啲。」聽到他們的爭吵，我衝了出去，嘗試調解。「唔關音然事，係我同Hugo講，話想出去見識吓遊行。」
「你唔好幫住佢啦，萌惠，我同我老婆由細睇到你大，點會唔知你性格丫？如果唔係音然教壞你哋兩個，點會無啦啦走咗出去遊行喎？」音然的父親分析道。「你同希古呀，一向都唔係好理政治嘢嘅，點會突然間想去喎？」


「你不理會政治，政治也會找上你，邊有得避丫？」音然反駁道。
「嗱，你依啲咪就係比網上啲人洗咗腦囉，睇吓你啲諗法幾咁天真，幾荒咁謬丫。」音然的父親續道。
「你阿爸就講得啱啦。」音然的母親點頭同意。
「好丫！既然你哋兩個咁唔鍾意我，咁就脫離父女母女關係啦！」音然衝動地說道。
「啪！」一道清脆的聲音，原來是音然的母親走上前，摑了音然一巴。正當她想摑第二巴，音然又準備反擊時，Uncle拉著了她的手，我則上前阻止音然。
「好！我走！」音然轉身離開。
「走丫！走丫！走咗就唔好再番嚟啦！」音然的母親怒道。
「Uncle，Auntie，我會睇住音然㗎啦，佢同Auntie都需要啲時間冷靜吓，聽朝再聯絡啦。」我小聲地對她的父親建議道，就跟著音然走了。
「咁麻煩你啦，萌惠。」音然的父親說道。

音然很堅強，從我到達醫院，一直到與自己的父母爭吵，都只是眼泛淚光，沒有流下過一滴眼淚。
此時的我不知道，這段爭吵，竟是音然和她父母最後的對話。
我亦不知道，這段爭吵，日後會成為壓垮音然的最後一根稻草。

「為什麼生世間上，此間許多哀與傷。


為什麼爭鬥不絕，歡欣不永享。
問為何人存隔膜，顏面無真相。
問哪天可找得到，理想中的烏托邦。

為什麼淒冷孤寂，輕飄飄像無力。
為什麼不見光亮，飄渺沒形象。
在目前如何風光，仍是泥中葬。
沒有牽走一根線，那許依戀臭皮囊。」
《為什麼》