[純愛]幻想: 第十一章—夜跑(下）

女主視角
-
跌落地嗰下真係好痛，我試過自己起身，但左腳腳踝嘅疼痛感令我完全起唔到身，痛到我兩隻眼留咗少少眼淚。
-
只見佢匆匆忙忙跑過嚟，手足無措咁樣問我「你見點啊？對唔住呀，如果唔係我咁樣玩你，你就唔會整親....」
-
「唔緊要...我而家唔係好起到身，而家點算好，咁樣搞法行唔到返屋企...」我有啲苦惱咁答佢。
-
我哋兩個靜咗一陣，大家內心都諗緊點做。其實我內心有啲想佢孭我返去，正當我諗緊嗰陣時，佢突然間踎左落嚟..
-




「我....比我孭你返去啦...雖然辛苦左你，但係...我都想你快啲返去沖涼跟住搽藥油，留喺度咁耐好易吹親..」佢有啲怕羞咁樣講，我心諗我都唔介意俾你孭。
-
於是我用盡右腳嘅力量，一下夾實Alfred個肚，之後佢慢慢起身，我哋用一個不快不慢嘅速度行返屋企。如果你哋真係試過孭一個人行嘅話就知道真係好辛苦，我全身靠喺佢背脊度，跟住個頭瞓咗係佢個膊頭上面，行咗一陣之後我已經見到佢開始係咁流汗，不過佢死頂難頂都頂到返屋企。
-
男主視角
-
返咗屋企之後，我內心仲係好自責，我竟然會整親佢，跟住我孭佢個陣嗰陣時，佢全身瞓落嚟，我完全感覺到佢上身嘅凶器，嗰一刻我竟然有犯罪嘅慾望...我覺得自己真係好仆街。
-
返到去之後，我搬咗張凳喺廁所度，等佢可以坐喺度沖涼，佢沖完涼之後就可以幫佢搽藥油。
-




好快佢沖完涼之後，我嗱嗱聲沖完。之後我敲敲門，佢話可以入嚟之後我就入咗去。一入嚟其實有啲感慨，一個禮拜前阿婆仲瞓喺度，一個禮拜之後成個世界唔同咗，算啦呢啲都係唔好諗咁多，搽咗藥油先。
-
佢坐咗喺床嘅中間，我就坐喺床邊，佢伸直隻腳，俾我幫佢搽藥油。我打開藥油，倒咗少少係我手上，之後就慢慢幫佢捽左腳腳眼嗰個位，一開始細細力，見佢冇咩反應，之後我大力少少，跟住佢就痛到大叫。
-
「好痛啊！唔好咁大力。」佢用哀嚎嘅語氣同我講。
-
「唔大力啲點會好呢，忍耐下啦...」其實我都唔想，但係唔用力真係冇用。呢十五分鐘變咗佢人生嘅地獄... 呢十五分鐘好似仲耐過一個鐘咁...
-
係我幫佢搽藥油嘅時候，我望吓佢間房，冇咩特別嘅裝飾，書枱上面有一部手提電腦，跟住功課同埋筆記都好整齊放咗喺入邊，角落頭有一個位放化妝品。整體上同我對女仔間房嘅印象好唔一樣，我仲以為佢間房會亂到好似佢屋企咁樣。
-




「好啦，我搽完藥油啦！你快啲瞓覺啦！」其實我內心仲係過唔到自己個關，我覺得好似係我害咗佢咁樣，所以講完呢句之後，我就飛咗入房。我唔敢面對佢，我驚佢好嬲我。諗吓諗吓就諗到瞓着咗～
-
每天不同的新聞環繞在耳中，希望大家不要視而不見，要好好接受並做一些我們能做的事。