唔駛一定入U，我揸van仔，都溝到好多女。: 100 攤牌

坦白啲講，對Gigi我未到話無咗佢就要跳樓，要生要死，唔撚係要霸住佢，總之又唔想無咗佢，同佢一齊年幾，大家生活得幾開心，佢令到我個狗竇似返個屋企，因為咁，聽到老闆娘咁講，我先會手汗都標埋。

“死仔包，返去同Gigi好好哋講清楚佢啦，honey唔會呃你呀！”

肥婆老闆娘一啖呷清酒杯裡面啲紅酒，就叫埋單。

次次食完飯埋單都要做台大龍鳳，同佢爭俾錢爭到隔離枱以為我哋打大交，錢佢賺撚埋大把，死鬼老闆臨走前，叮囑我睇住老闆娘，加上我心裡面都尊重佢，叫得佢食飯，無諗過要佢請。

“記住好聲好氣，千祈咪衝動呀！”



老闆娘知我牛脾氣，佢上撚咗的士，臨離開都再三吩咐我。

返到屋企附近，搵間牌檔坐低，叫兩枝大啤，清醒吓個腦，諗撚清楚佢先敢返上樓。

“咁耐先返到？”

一入門口，Gigi好撚殷勤咁幫我攞拖鞋，我諗老闆娘已經打過電話俾佢，同佢做咗包膠，Gigi唔知我自己隊多兩枝啤酒先返上嚟，所以先覺得我遲返囉。

“係呀，同老闆娘食完飯囉。”



唔撚知點解，今晚Gigi同我兩個人都好似好客氣，同平日唔撚同咗。

換轉平日，如果未食飯，Gigi一件我入門口，就拿拿淋炒菜開飯，我就玩吓手機，大爺咁等食，食撚完，Gigi就洗碗拖地，開機洗衫，好撚多嘢搞，我想沖涼就先去沖涼，唔想沖住，又繼續搵friend吹水。

今晚Gigi就停晒手，乜撚都唔做，手揸住塊抹布，喺我身邊團團轉，不過唔見佢抹嘢。

“近來好多狗公埋你身咩？”

無撚謂拖拖拉拉，我開口先啦。



“咩狗公呀，客嚟之嘛！”

“乜夜麻麻要匿埋喺廁所同客傾計咩？”

“咁聯絡吓都要啦，你成日夠同你啲女吹水啦！”

Gigi可能怕我發老脾，戰戰兢兢，細細聲咁撚樣駁鳩我。

“你無眼睇咩，我無同班女一齊好撚耐啦，我正話都有同老闆娘講！”

“係咩？咁洗頭妹，寶馬呢？”

Gigi偏偏唔撚提細C。

“佢哋都係耐不耐搵吓我，我都無主動聯絡佢哋啦。”



講撚起，我反為覺得有啲對洗頭妹唔住。

“你知啦，洗頭妹好撚孤獨，我陪吓佢啫！”

“我以前條仔而家夠孤獨咯，我耐不耐去陪吓佢，你俾唔俾吖？”

“咁點同啫！”

Gigi咁串鳩番我，我幾乎啞咗火。

“我知你同情洗頭妹，其實我都唔介意你陪吓佢，但係你最上心嘅係另有其人囉！”

“你又講咩呀？都話佢就嚟結婚咯。唔撚好講人哋，講返你先。”



唔想俾Gigi叉開咁撚遠。

“我有咩好講呀？”

Gigi嘟鳩長個嘴，睇落係幾撚靚。

“你尋晚同老闆娘食飯，今晚佢講晒俾我聽啦。”

老闆娘千叮萬囑，叫我唔好扯火，我拖Gigi埋梳化坐低，輕輕攬住佢膊頭。

“如果你真係唔想再同我喺埋一齊，可以開心見誠同鳩我講。”

“我無咁諗呀！”

Gigi灑晒手，擰晒頭。



“係你唔緊張我咋！”

“我點唔緊張你啫？上次你夠應承我唔再收兵啦！”

“我無諗住收兵，我係想擸住幾個客，搏多啲生意。”

“咁老闆娘又話你想搵條狗公發展落去！唔通佢呃鳩我咩！”

“係你逼我之嘛！”

“唔撚係吖嘛？我逼你搵狗公？”

有無搞撚錯，邊個男人會叫條女俾綠帽自己戴！



“你問吓自己，去旅行你都掛住佢，同佢搞埋啲咁嘅嘢！”

Gigi開始大聲過我。

“我唔肯俾你屌咩？你想吹，我幫你吹，你想我企高，我就企高，你想我趴低，我就趴低，唔通咁都滿足唔到你，你係要佢先開心？”

“Okay，當我唔啱，不過嗰晚你夠匿埋喺廁所同班狗公傾啦！”

“我係同佢哋應酬吓之嘛！”

我承認之前係少少忽略咗Gigi嘅感受，同老闆娘傾完後，我喺排檔坐咗一輪，諗撚極都唔明。

呢幾年，咁撚多大陸人湧落嚟買化妝品，Gigi生意多咗好多，拆佣亦都水漲船高，幾條狗公，好似俾得幾撚多生意佢呀？

“好啦，大家坦白啲講啦，你係咪真係想離開我先？”

我望撚實Gigi雙眼，睇吓佢有無講大話。

“呢個係最係一步。如果你唔放棄細C，我唔想浪費我同你青春。”

Gigi猶疑好撚耐，佢終於講佢點諗。