唔駛一定入U，我揸van仔，都溝到好多女。: 92 細C想見我

 第二朝晨早抽住袋早餐，大搖大擺，大爺咁返到公司，仲未坐低，肥婆老闆娘就大聲叫住我。

“喂，死仔包，去旅行呀？幾時去？去幾多日？等我睇吓點安排工作呀！”

屌，邊撚個咁大嘴巴呀！

“哈哈，邊個爆料先？Honey。”

仲駛問咩，知道我去旅行淨係得Gigi囉。



肥婆老闆娘話Gigi尋日俾電話佢，講俾佢知同我一齊去日本，問佢有乜嘢想賣。

自從老闆去撚咗閻王報到，每隔三幾過星期，我都定必搵老闆娘食餐飯，陪佢傾撚吓，過年過節就更加唔少得，一定同佢做節，Gigi同我一齊之後，順理成章，佢每次都陪撚埋我去，以佢咁撚乖巧，老闆娘又無仔無女，兩個人好快就熟絡咗，老闆娘仲講笑話收埋佢做契女。

“死仔包，今時唔同往日，依家有條女跟住你，要醒醒定定，生性啲做人喇！”

老闆娘講得出口，一定有嘢要話我知。

“哈哈，乜料先？Honey。”



老闆娘捉鳩住我講耶穌，原來尋日傾傾吓，Gigi同佢講話我晚晚做到好夜，就算臨去旅行，呢幾晚都做到好夜，搞到十點幾先返到屋企，佢好撚肉赤。

“呢兩晚你個死仔包臨時臨急先請假，睇怕你都係瞞住Gigi去滾，嗱，今次我幫你瞞住佢，唔篤爆你，唔好有下次喇！”

Gigi呢一招投石問路，想同老闆娘試探吓有咩情報，老闆娘咁撚醒目，佢點回唔知丫。

我O撚晒嘴，仲有咩可以講，西口西面咁多謝老闆娘一聲。

等我以為自己好醒目，原來Gigi已經懷疑緊我。 



肥婆老闆娘同我講撚完耶穌第二日，佢將細C公司張『柯打』俾咗第二個司機做。

我排行程發覺，正想出聲，抬高頭已經見到老闆娘望撚住我，好似等緊我抗議，然後佢就炳柒我咁，本來想詐佢形嘅說話當堂吞翻落肚，耷鳩翻低個頭，當無事發生過，偷偷地望吓佢，見撚到佢陰陰笑，估唔到肥婆可以咁撚奸！

踩到七點幾接近八點，兜咗幾個圈，無乜地方可以停低架車，見到有間麵包舖，急急腳落車，求其扐兩個麵包，跳返上車，先發覺細C what's app過我。

“喂呀，做咩換咗人，唔係你上我公司？”

細C問鳩我。

“老實同我講，唔係發生咩事嘛？”

佢見我成個鐘頭都無回應，佢又再問我。

雖然而家唔係同細C交收，不過佢公司啲同事第一時間向佢報料，佢喺出面做嘢都掛撚住，驚我有咩事發生。我可以點講啫？唔通同佢講話肥婆老闆娘睇穿我同佢啲嘢咩。



“無嘢！咪亂諗啦，我去旅行嘛，條友頂住幾日，我返嚟就我做翻！”

我搲撚爆頭都諗唔到一個似樣啲嘅答案，覆佢電話時暫時只可以同細C咁講，一直以來我未同細C講過半句大話，我諗佢會信我。呢幾日就當順撚吓肥婆老闆娘意，去完旅行，乜鳩都無得傾，點都要攞翻細C張『屙打』做。

“你聽日起程？唔......”

“係呀，做咩？有嘢想講？”

我見細C欲言又止咁，忍唔住問鳩佢。

“無呀，唔......想見吓你，唔.....你唔得閒就算啦。”

我唔撚係聽錯嘛，佢竟然話想見我！



“得閒！點會唔得閑！你俾一個鐘頭我，一個鐘頭後即到，一個鐘！”

鬱悶咗成日，而家好似打咗針咁，成鳩個人輕鬆晒。

“小心揸車呀！”

呢個鐘我逢車過車，同班客多句都唔講，放低啲貨就下一程，清晒啲單，去到細C樓下真係差唔撚多一個鐘頭 。