《十七歲嗰年，我做咗Miss隻兵》: 第七章（3）
「點呀，好唔好味？」阿祖問道。
「OK啦，係凍咗啲囉。」
「邊個叫你唔開門，我幫你拎去叮下啦。」阿祖拿着發泡膠盒，主動走到櫥櫃前，把燒賣、腸粉倒進白色的瓷碟上，再放進微波爐裏。
「話時話，你今日有無比嗰個女人同埋個肥佬鏟。」
「有乜可能⋯⋯無呀。」
「咁點算？」
「有乜點算，咪唯有認衰囉，唉。」Miss Lam嘆了口氣，想起以前的自己不論發生甚麼事都不會認錯，如今竟要為沒做錯的事而道歉。
她突然覺得這樣的自己有點陌生。
「Sorry，係我搞到你咁。」
「都係架，咁你諗住點補償？」
「請你食雪糕囉，有朱古力同雲尼拿味。」
「一杯雪糕就想收買我？」
「係兩呀大佬，唔平架，你唔食就算。」
「咪住，我姑且食住先，我邊食，邊比個機會你諗點補償我啦。」
「咁你要咩味呀，小姐？」阿祖無奈地說。
「小朋友才做選擇，我全部都要！」
聽到這句話，阿祖突然覺得Miss Lam像個小孩而不像老師，忍不住笑了，說：「你幾多歲，小朋友先會咁講野。」阿祖把兩桶家庭裝雪糕和一雙鐵勺子放在桌上。
「哇，你點知你點知我鍾意食依隻味嘅雪糕架？」看着包裝上寫着Movenpick，Miss Lam頓時眼前一亮。
「就係知你啲港女鍾意食依個牌子，我傾家蕩產咁買架。聽日無錢搭車添呀。」
「唔緊要，聽日都唔洗返學，你留係屋企溫書啦。」Miss Lam把一口朱古力雪糕送進口裏說。
送進口的瞬間，幼滑的雪糕在舌上化開，香濃的雲尼拿味在口腔擴散，一天的煩惱隨之溶化，都被咽進肚子裏去，剩下甜甜的朱古力餘香，使她忍不住一口接一口地吃。
「有無咁好食？」看到Miss Lam這滋味的模樣，阿祖也忍不住吃了一口，雖然幼滑，卻還是覺得無甚特別。
「緊係有，開心嘅時候食朱古力，唔開心嘅時候食雲尼拿，即刻所有煩惱都無晒，人生無憾了！」Miss Lam喜滋滋地說道，一臉幸福又滿足的樣子，深深烙在阿祖的腦海裏。
「話時話，楊祖耀，究竟係邊個教你，一同女仔嗌交就錫落去？」
「吓，唔係咁架咩，依招百戰百勝架喎，上次對你都好Work呀，點知今次會失靈架姐。一定係我錫得唔夠深，再黎過。」阿祖往Miss Lam靠近了不知有沒有半公分，Miss Lam已戒備地推開了他。
「閘住！上次只係我一時情緒失控姐，係唔Work架，你以係咪再亂咁錫我，唔係我即刻趕你出黎！聽到未？」Miss Lam瞪着阿祖說，恨不得把他的靈魂出來好好拷問一番究竟是否真的聽懂了。
「OK，唔錫咪唔錫囉，女人真係⋯⋯口是心非。」阿祖搖頭說。
「你講咩話？」Miss Lam仍舊瞪着他。
「講下笑姐，唔洗咁嬲呀，放咗工架啦，放鬆下個人啦好嗎？難怪你男朋友同你分手。」
「你講咩呀？」男朋友三個字比十萬伏特還要厲害，一下子觸動了Miss Lam所有的神經。
「咁係呀嘛，你成日咁嚴肅，邊好玩架，幽默啲啦。」
「你呀，話幫我追返條仔，結果呢？」
「你唔係仲鍾意佢，仲想同佢復合呀嘛？」阿祖難以置信地說，以為已逐漸回復正常的Miss Lam已放下了他那一腳搭兩船的前度。
「我想唔想係一件事，你應承幫我追返佢係另一件事。」
「其實佢究竟有咩好，點解你地都分咗咁耐，你係都要追返佢？」
「夏蟲不可語冰，你依啲換女快過換衫嘅人點會明。」Miss Lam黯然神傷道。
「咁你鍾意佢啲咩？值得你咁鍾意佢？」
「值架。每次我唔開心佢都會陪住我，聽我呻，氹我，安慰我，帶我食最鍾意食嘅野⋯⋯如果今日佢係到就好。」Miss Lam愈說愈小聲，像是在說給自己聽似的，回憶隨之湧來，把舌上的甜意一下子洗涮掉。
雖然今天阿祖亦是把她弄哭的元兇之一，可是他也連忙補救，買了她喜歡的雪糕，還走幾條街買了燒賣和西米露，而最重要的，是現在陪在她身邊的人是他——不僅是現在，還有那些令她傷心痛哭的晚上，都是他陪在她身邊，還背了幾層樓梯送她回家，努力逗她笑，而不是那叫她念念不忘的前度。
為甚麼她就是不能放下？
「今日晏就，我見到佢係IG PO咗同嗰個女仔嘅相。我忍唔住諗，如果嗰日你無阻止我，如果我真係去咗搵佢，唔知今日出現係佢IG嘅，會唔會係我呢？哈，我真係好無骨氣。」Miss Lam禁不住諷笑這樣的自己。
舌上的雪糕竟變得苦澀起來。
「上次我唔係幫你Block晒佢啲野架咩？你又手賤Unblock，仲要Follow返呀？」阿祖略為激動地問道。
「咁無理由一直Block住佢架嘛。」Miss Lam像犯錯的小孩，竟不敢直視阿祖的雙眼。
「你真係咁想係佢IG出現，咁想同返佢一齊？」
Miss Lam低下頭，沉默不語。
「聽日我地去拍拖。」
聽到阿祖爆炸性的話，Miss Lam猛地抬起頭，驚訝地問道：「吓？點解？」
「你想追返你男朋友呀嘛。」
「同你拍拖可以追返我男朋友？」好奇心蓋過了對雪糕的興趣，Miss Lam不自覺地放下手上的勺子，疑惑地看着阿祖，雙眼眨了又眨，還是無法從阿祖臉上找到答案。
「你信定唔信呀？」
「Um……」自從那天依照阿祖說的話做，果真令Miss Lam的男朋友主動找回她，Miss Lam便對阿祖的能力深信不疑，很想答應他的要求。
然而，只要想起阿祖是自己的學生，Miss Lam便不禁猶豫起來。
「一日姐，又唔係要你做咩。唔肯我慳返，以後唔好再話我應承幫你追仔唔追，係你自己放棄咋下。」說罷，阿祖站了起來，往洗手間方向走去，「我去沖涼先。」
Miss Lam從來不輕易放棄，馬上被阿祖的話刺激了，對着他的背景說：「我無話過要放棄，拍拖咪拍拖，驚你呀？」
聽到Miss Lam的話，阿祖的嘴角隨之往上揚，說：「好。」
晚上，當疲憊不堪的阿祖快要睡着之際，上了一天課的Miss Lam竟還眼光光的看着天花板無法入眠。
「喂，你訓咗未？」
快要睡着的阿祖沒有說話，於是Miss Lam又問了一遍：「你訓咗啦？」
唔應你咪姐係訓咗囉，仲問，阿祖心想，還是不打算回應Miss Lam。
「真係⋯⋯訓着咗？」
這刻阿祖知道，Miss Lam聽不到他的回應是不會輕易罷休的，無奈地回應道：「咩事呢？」
「咁夜你仲唔訓？」
聽到Miss Lam這句話，阿祖無奈得眼睛都要翻到西半球，卻還是溫和地回應道：「等住隨時為你服務呀嘛，咩事呢？」
Miss Lam總覺得阿祖是在諷刺她，可是她沒有繼續想下去，只問道：「你聽日真係肯幫我追返佢？」
「你好似真係好驚我唔幫你追返佢咁喎。」阿祖無奈地說道，心想究竟自己甚麼時候騙她了？
「唔係，但⋯⋯你依啲咁嘅人，應該忙住溝女，忙住打機，忙住去集會⋯⋯大把野可以做，點解要曬時間幫你Miss追返佢男朋友？」
事實上，阿祖明天本來約了肥仔文下午一起去貼連儂牆，可為了與Miss Lam約會，只好把時間改成明早七時，犧牲一下寶貴的睡眠時間。
點解？⋯⋯呃，可能係見你太可憐？可能係好奇、貪玩？點解女人咩都鍾意問點解？阿祖心想，卻知道這些都是不能「出街」的答案，變換了句話：「唔係架，我咁啱想去迪士尼咋。」
「迪士尼？乜我地聽日係去迪士尼咩？」
「係呀，我無同你講咩？」
「你無囉，點解要去迪士尼？迪士尼咁貴！」
「喂，咁人地條女想去迪士尼我有乜計？」
Miss Lam想了一會才理順了整件事，激動地說：「你意思係佢聽日準備同個八婆去迪士尼？」
「係⋯⋯係呀，你做咩咁激動？」阿祖從沒聽過Miss Lam說粗口，頓時怯了怯。
這是她三番四次和男朋友說過想一起去的地方，沒想到，最後他最後竟是和下一位她去了。
想到這，Miss Lam的淚水竟不自覺地從眼眶滑過耳畔，掉在枕頭上，像滴在波平如鏡的湖面的雨水，在心房泛起一陣漣漪，不斷擴散。
「你又知佢地一齊去迪士尼？」Miss Lam哽咽道。
「你喊呀？」
Miss Lam沒有回應，阿祖便不再追問，說：「我應承得過你幫你追返條仔，緊係要做啲野嘅，咪Fol咗條女嘅IG，正所謂⋯⋯係咪有句叫⋯⋯咩知己知⋯⋯知咩就可以打贏場仗呀嘛。」
「係知己知彼百戰百勝。」Miss Lam補充道。
「我咪咁講囉。條女自己係Story話聽日要同條仔去迪士尼嘅。」
「咁大個迪士尼，實撞到架啦？」
「唔知架，睇下你地有無緣囉。」
「吓，咁都得？」Miss Lam沒想到這個計劃竟是這樣兒戲。
「講下咋。以我嘅觀察，條女咁鍾意PO Story，聽日一定去到邊都影影影，要捕佢地應該唔難。」說完這句，阿祖忍不住打了個呵欠。
雖然阿祖比想像細心，但Miss Lam還是不放心，又問道：「萬一捕唔到呢？」
然而，阿祖卻再沒回應，大概是睡着了。
明明上一秒仲講緊野，下一秒就訓着，咁都得？Miss Lam心想。看着窗外對面大廈映射過來的燈光，Miss Lam始終無法入眠，開始想像明天可能會發生的情景——難道真的要與他們相遇嗎？看着他們十指緊扣的去他們本來要去的地方⋯⋯想到這裏，Miss Lam就有種窒息的感覺，心中的雨水變成了洪水，把她淹沒。