《十七歲嗰年，我做咗Miss隻兵》: 第三章（2）
終於走到校園門口，Miss Lam還是不敢停下來，二人一直走到地鐵站，Miss Lam才敢開口問道：「我琴晚係咪飲醉咗？之後我點返屋企架？你又做咩留張白紙係到，寫埋啲咩⋯⋯多謝款待嘅字？仲有呀，點解⋯⋯」說到這裏，Miss Lam掂起腳尖，壓低聲量，在阿祖耳邊問道：「我無着衫架？」
看到Miss Lam這樣緊張又害羞的表情，與課堂上嚴肅的她截然不同，不禁笑了出來。
「笑咩呀你？答我呀。」
「咁你都諗唔明咩？多謝你琴晚嘅款待囉，Miss Lam。雖然要抬你返去，仲要行咁多層樓梯，但入到屋之後，我覺得一切都算值得嘅，只係⋯⋯如果個Size可以大返啲就好囉。」阿祖看着Miss Lam的胸部搖搖頭說。
「你咁講係咩意思？」Miss Lam被嚇得瞳孔都放大了。
「你覺得呢？」阿祖的目光往上移，看着Miss Lam驚呆了的臉問道。
「間屋嘅Size太細？」
「又唔係我住，大細又點？」
「um……咁係咩？」
「估唔到就算啦，當我無講過，無事發生，OK？」
「唔得呀，你講呀，琴晚我飲醉之後究竟發生咩事？我剩係記得沿路好似都係你扶住我，跟住呢？我地做咗啲咩？」
「咁你想我地⋯⋯做啲咩呀？」阿祖哄近Miss Lam的臉問道。
「你唔好再反問我啦，係咪唔講呀？」從Miss Lam的眼眸可以看到她的不耐煩與零星怒氣。
「OKOK，你想聽我咪講囉，唔洗咁躁喎，Relax。」
這時列車來了，當阿祖準備踏入車廂時，卻被Miss Lam攔住了，說：「唔得，你未講完唔可以上車，快啲講。」
「唉，咁你醉咗我可以點姐，咪扶你去搭的士囉，好彩你仲Up得出自己住邊，咪送你去屋企，點知去到係唐樓，嗰下我真係下巴跌到落地下，幾想dum你係路邊就走。」
「咁你又唔dum？」
「諗過架，但見到你成個人攬實我手臂話：『點解你要咁對我？你唔係話過會永遠陪住我架咩？』我就⋯⋯」不擅言辭的阿祖一時間找不到適用的詞𢑥，頓了頓續說：「你明唔明，你平時咁鬼惡，嗰下竟然咁可憐，我真係⋯⋯」
阿祖未說完，Miss Lam已打斷了他，說：「唔好用可憐依個字形容我，我唔需要人同情，OK？」
「拿拿拿，你又黎啦，成日都咁惡，做女人唔可以咁樣架，Miss Lam。」
我洗唔洗你依個未夠秤嘅細路教我點做女人呀？Miss Lam心想。
「唔好岔開話題，講返琴晚嘅野先，跟住呢？」
「跟住咪扶你返屋企囉，你都唔知你幾重，上到去我幾乎無咗半條命呀大佬。」
唔好話你自己平時無練開太廢，Miss Lam心想。
「你依家咪生勾勾咁企係到，跟住呢？」
「跟住我咪幫你開門囉，dum你落張床到囉。咁啱我急尿咪借咗你個廁所黎用，去完行出黎聽到你係咁話好熱，諗住洗條毛巾比你敷一敷降降溫呀，點知洗完行出黎，你估我見到咩？」
「咩？」Miss Lam心虛地說，好像已經猜到阿祖要說的話。
「我覺得你要改下依個癖好。」
「講你就講啦，成日係到賣關子。」Miss Lam再次焦躁地說。
於是，阿祖哄近Miss Lam的耳畔，說：「我見到你係到除衫。」
Fuck，我唔係戒咗好耐啦咩，幾時又打回原形架？Miss Lam懊悔得咬緊嘴唇，閉起雙眼不想面對現實。
Miss Lam的酒力向來不好，所以每當她感受到醉意時都會馬上停下來，以免自己又做了些不堪入目的事——脫衣服。
中學時，有一次她去了一位女生家喝酒，那是她第一次喝到斷片，她對自己斷片後的所作所為毫無印象，倒是朋友告訴她，醉後的她竟突然站起來把衣服脫掉，即使她們替她把衣服穿起來，她也會再脫下來，她們只好把她關到房間，直至她酒醒。
自從那次以後，她喝酒總是一杯起，兩杯止，太久沒發酒瘋，就忘了自己醉後原來可以如此失態。
可為了出軌的男朋友，她卻破戒了。
「好彩，你生得好安全。」
「咩意思？」
「雖然你除剩胸圍底褲，但望住你嗰對呀婆色嘅胸圍，仲有高到上腰嘅呀婆底褲，加上依個Size⋯⋯」阿祖盯着Miss Lam的胸部說，「Sorry，我真係無能為力。」
食屎啦你，Miss Lam心想，忍不住反了個白眼。
「唔洗同我交代你嘅內心諗法，OK？跟住呢？」
「跟住？跟住我咪擺條凍毛巾係你額頭，幫你降下溫囉，又驚放太耐你會凍親，過咗陣又幫你拎返條毛巾，冚返好張被咪走囉。」
「就咁？咁張白紙呢？做咩寫多謝款待四隻字？」
「咁你琴晚請我食飯呀嘛，禮貌上都要講句多謝掛？」
聽到這裏Miss Lam才鬆了一口氣，說：「平時又唔見你咁有禮貌？」
「哇Miss，究竟我地之間係咪有咩誤會，其他老師我唔敢講，但對你我從來都係最有禮貌架喎。」
「係咩？唔覺喎。」
「點呀Miss，講我就講完啦，走得未呀？」阿祖看着剛到打開門的列車問道。
「走囉。」說罷，Miss Lam便和阿祖一起踏進了車廂。
「咁你同你依家男朋友點呀？」阿祖直接了當地問道，完全沒有想過這其實是Miss Lam心裏一道不可觸碰的傷口。
「無點。」Miss Lam冷淡地回應道。
「你無搵佢咩？」
「無。」
「點解？」
因為我唔敢，Miss Lam心想。
「關唔關你事呀，楊祖耀？你上次份功課諗住幾時交？」Miss Lam故意岔開話題道。
「都係醉咗嘅你可愛啲。」阿祖搖搖頭說，「其實如果你可以溫柔啲，可能你男朋友會愛你多啲，或者就唔會出去搵第二個。」
你得嗰十幾歲，知啲咩呀，Miss Lam心想，說道：「我都廢事同你講。」
「你係咪覺得我得十幾歲咩都唔識？我拍拖嘅次數分分鐘多過你呀。」
「你又知，你唔比我以前係A380嘅？」
聽到這句話，車廂裏的人都抬頭看了看Miss Lam一眼，尷尬得Miss Lam頓時低下了頭。
每次看到Miss Lam出糗，阿祖都覺得很有趣，說：「咁你又唔洗咁大聲周圍講嘅，如果真係嘅咁失敬囉，咁你應該都好快無事，唔洗我教你追返條仔啦。」
「我洗你教？」
「話晒大家都係偷食過嘅男人，我點會唔知你條仔諗咩呀。」
「偷食好馨香呀？仲好意思攞返出黎講。」
「我好心想幫你溝返條仔姐，下下疾住晒，唔講囉咁。」
然而，當阿祖不說話了，Miss Lam又好奇起來，說：「講囉咁你，我⋯⋯姑且聽下啦。」
「拿，你信唔信我先？」
「信你咩？」
「信我可以幫你追返條仔返黎。」
哈，就憑你？Miss Lam不禁在內心冷笑了一聲。
「OK，睇你個樣，姐係唔信啦，Fine，我收返。」
聽下又無蝕底，我姑姐聽下你可以有咩高見，Miss Lam心想，說道：「願聞其詳。」
不知不覺間，二人乘過了站來到了旺角站，這時車廂剛打開了門。
「信我就跟我行。」阿祖踏出車廂，回過頭對Miss Lam說。
「信你我有咩好處？」
「得到一個愛你嘅男朋友。」
Miss Lam猶豫，雖然她確實很想挽回男朋友的心，可又覺得自己竟相信這只有十多歲的黃毛小子很可笑。
然而，像是大海遇溺，快被海水淹沒的她其實沒有太多選擇，一旦有人朝她扔出救生圈，即使是漏氣的，她大概也會不假思索地抱着。
或許，她真的能靠它撐到獲救。
糾結一番，到車門快要關上時，Miss Lam才踏出車廂，說：「咁你有咩好橋呀？」
「第一樣野，」阿祖把Miss Lam整個人掃視了一遍，續說：「執下你個Look先。」