自從女神做咗我讀者之後: 大哥哥大姐姐

第二日上上下英文堂嘅時候Miss Lee無啦啦同我哋講：
「黃浩軒同陳可柔同學你哋陣間落咗堂之後跟我去一去教員室阿，我有啲嘢同你哋講。」
先第二日返學就搵我？雖然我份功課hea咗少少啫，但係都唔係咁差要你特登搵我嚟鬧阿麻，但係可柔又被人叫跟我落去嘅？睇嚟又唔係啱先咁樣先叫我哋，都唔知咩事就落一落去囉。
就係咁，我同可柔就係小息嘅時候跟咗Miss Lee落去教員室。
「你哋有冇興趣參加呢個大哥哥大姐姐計劃阿？」
我…我同可柔？呢個計劃本身我都聽過係啲咩，但係就去了解。當我聽到呢句嘢嘅時候，我望下可柔，點知佢又望下我。
「本身見你哋都嘅鍾意幫同學所以先諗住叫你哋參加，呢個計劃嘅目的就係幫啲中一適應中學生活，得閒同佢哋傾下計咁，無咩嘢做嘅，不過見到你哋好似揸唔定主意咁，不過我就俾一日時間你哋考慮下，聽日再俾個答覆我，就算唔應承我都無問題，最多我搵第二啲同學啦…」
Miss Lee最尾個句根本就係道德綁架…不過係個時我不知幾時想即刻答
「我想阿！我想同可柔一齊參加阿！」但係如果我咁樣做，好似唔係咁好。於是我就好似可柔佢咁，聽日先俾個答覆Miss Lee。
係屋企嘅時候，我打開咗IG，用我本人嘅ac跟住打開可柔嘅ac。其實我好想問佢諗住點揀，但係我又好細膽，唔敢同佢講真正嘅第一句說話。




如果我可以揀，我會用菠蘿先生呢個身份逃避，用呢個身份接觸佢，但係我而家又唔可以用呢個身份問佢。
我應該問佢定唔問佢好呢？第一句又應該講咩呢？hi？定直接問問題呢？就係咁，我諗點同佢開口已經用咗我半個鐘，可能真係我睇自卑，或者係佢嘅氣質真係令到我高攀唔起。

呢段時間，我同佢係讀者同作家呢段關係上又逐漸升溫，至少佢會肯同我講下心事咁。可能係因為覺得我係陌生人，就算知道咗都無所謂，但係每次同我咋啲耳想知道多啲佢同佢男朋友嘅嘢，佢又會即刻轉移話題或者直接已讀。久而久之，我亦都好少提係佢男朋友，咁佢又唔講，我又唔提，呢個話題就好似變左我哋之間嘅禁忌咁，大家都唔主動講。
結果最後我都係無問到佢，但係我又諗如果唔參加就一定無機會同佢一齊去做一啲嘢，咁唯有希望佢到想參加啦。
第二日小息嘅時候，我同可柔都到咗教員室準備俾答覆Miss
Lee 。
我個時心諗：而家唔問就無機會問啦，到時後悔都嚟唔切阿。呢一刻我竟然有我係IG上面無嘅勇氣。
「係呢…阿…Yoyo阿…你…」我本來諗住自然啲咁問佢，點知我講嘢嘅時候望到佢原來都一直望住我，呢個時候我又即刻變到口窒窒。
「你哋係度啦，你哋諗成點阿？」係我仲口窒窒嘅時候，Miss Lee就出咗嚟。




「我參加阿。」可柔佢一啲猶疑都無就答咗佢。呢個時候我見到全部人都望住我等我答。
「我…我都參加啦。」
「太好啦你哋都參加，呢個就係你哋負責照顧嘅中一學生名單。嚟緊我哋都會開會，呢啲資料你哋攞返屋企睇下先啦。」望住兩個裝滿晒嘢嘅file。我就知道Miss Lee預咗我哋會應承…
「不如我幫你拎一拎啦，呢啲嘢都有啲重。」我自己都唔知點解我會無啦啦講呢句。
「好阿…唔該晒。」
就係咁，我哋一路行上係四樓嘅班房，沿途都有唔少人望住可柔，亦都有啲人望我，睇嚟都係因為啲人覺得有個毒男幫個靚女搬嘢有啲錯愕。但係我哋都好快就到班房，沿途我都有望一望可柔，睇嚟佢都唔係好在意其他人嘅眼光。
「軒哥~威啦，幫到女神攞嘢。」個死人肥聰係我一返埋位就係我隔離同我講。
「收皮啦死肥仔，我見到啲嘢重先幫佢咋。仲有阿，你咁大聲小心人哋聽到阿。」我係肥聰嘅耳邊同佢講。

「Yoyo今日又有冇咩嘢呻阿，邊個衰人又搞小圈子定點阿。」之前都講過，我同可柔係讀者同作家呢段關係越嚟越friend。所以今日我都照常咁係IG上面用菠蘿先生嘅身份搵佢。




「今日又無咩特別，不過我之前同你講過個個係黃金幫過我個個男仔呢。佢同我都參加咗一個叫大哥哥姐姐嘅計劃，希望佢係一個好相處嘅人啦。」 
佢之前有同我講過我係黃金啲mk仔手中救返佢嘅事。但係佢都唔提佢男朋友。
「係呢，你又覺得佢係個點嘅人阿？」既然佢提起我，不如親而家知道多啲佢對我嘅諗法。
「一個幾斯文，幾貼心嘅男仔囉。今日我哋返班房嘅時候佢見到啲嘢重都有主動幫手。」原來我一個無原因，好小嘅動作都有俾佢留意，記得。
跟住之後我再想搵佢嘅時候，已經搵唔到佢啦。可能係瞓咗或者佢男朋友搵佢掛。