自從女神做咗我讀者之後: 9月1日 開學日

「肥聰，快啲啦，再唔做就要交啦，第37題點做。」無錯，我同肥聰係暑假最後一日先趕功課，其實都唔係今年先咁，年年都係我做啲，佢又做啲，大家最後互相「參考」下咁，咁樣先年年都做得晒。
點解要做暑期功課？唔想俾老師第一日開學就鬧囉，費事返學第一日就成為老師嘅眼中釘啦，話晒都要對三年。
「唔識阿,不如呢題就skip啦，做少一兩題佢唔覺嘅。」
「唯有係咁啦。仲有其他要做。」如果唔咁做，可能真係做唔晒，雖然數目唔係多，但係要一日做晒都係有啲難度。
結果個日我哋由上晝8，9點做到深夜12點先去瞓。
「終於搞掂啦,阿~好眼瞓阿，我去訓啦，聽日見啦。」肥聰留低呢句之後就沉睡了，搵都搵唔到佢。
但係我又未眼瞓，咪繼續玩下電話，等到真係攰先瞓囉。於是，我隻手就好自然咁打開IG，再不自覺咁打開可柔嘅頁面，當然係用菠蘿先生嘅ac啦。我都唔知自己點解會無啦啦打開，但係呢樣就好似我嘅例行公事咁，一得閒就想開一開睇下佢有冇搵我,睇下佢個page有冇更新到。
係個度，我見到一個少女，個少女每張相都有一個笑容，個笑容就好似有治愈人心嘅能力，睇一睇，望一望，真係可以令到成個人放鬆。
如果有日要保護呢個笑容，每個人都會願意為咗守護呢個笑容而有所犧牲。邊個會估到係將來嘅某日，我係個個破壞呢位少女笑容嘅人呢。
返返嚟當時個刻，我一諗到個個少女係屬於某個人嘅，心入面又有啲酸meimei，可以話係妒忌，可以話係不甘，妒忌嘅係唔想有個男仔可以獨佔佢，可以明正言順咁攬佢講啲好肉麻嘅說話。不甘嘅係自己無資格守護佢，保護佢，愛佢。




可能係因為夜晚個人會亂諗嘢，可能係因為我真係好鍾意好鍾意佢，先會係咁諗埋呢啲嘢。於是我又一個諗嘢諗到失眠。
第二日，我就當然無精神啦，我就好似一個喪屍咁行去我嘅班房。係班房，我又見到肥聰偷偷哋係小食部帶咗啲燒賣魚蛋上嚟食。
「好心你啦肥聰，仲帶嘢食上嚟，係咪厭班房唔夠多蟻阿。等我幫你拿拿聲食埋佢，再好辛苦咁去廁所揼埋啦」我一講完，就用眼不見影嘅速度攞咗肥聰啲嘢食，再用9秒9嘅時間一邊跑，一邊食同吞，係食嘅途中，我已經到咗廁所同揼埋啲垃圾添，成個動作連貫自然，一啲多餘動作都無，一氣呵成。其實係因為我成日咁做先做到，正常係需要訓練先做到啱先嘅動作。
返到班房，要返埋位嘅都係個位度，成個班房除咗啲周圍吹水嘅人唔係個位到之外，就整返啲遲到嘅，當然…可柔到已經到咗啦。
由於第一日返學，未有座位表，大家都係自己埋堆坐，而我身為邊緣人，唯有同肥聰兩個坐埋一齊，至於可柔就同佢班「朋友」一齊坐，啱啱好係我哋前面。
過多無幾耐，就上班主任課節，我哋未來嘅班主任係喺我哋學校出晒名好嘅Miss Lee佢同時都係教我哋英文嘅。雖然英文堂不嬲都咁悶，但係起碼係Miss Lee教，佢都叫有心機，盡量將啲課堂變得有趣啲，上佢堂都叫開心嘅。
就係我哋對住個時間表逐個逐個睇下邊個老師教嘅時候。「屌…阿軒你睇唔睇到阿，我哋仲係個pk張sir教阿…唉呢三年點捱…」肥聰係我隔離細細聲同我講。
張sir，一個五十幾歲嘅阿叔，Miss Lee出名好佢就出名hea，其實以佢嘅年紀佢都應該差唔多退休，所以佢成日係學校都係一個休閒阿叔嘅形象，教書hea，態度hea。有幾hea？上堂瞓覺唔理你就基本，連學生搵佢，佢都可以話要準時收工4點鐘準時走人，平時係學校都係得過且過，最好就唔麻煩到佢，一個標準教畜。
「唔撚係掛。」呢刻，我同個隻樹熊無分別，爭在未有塊葉。我再望清楚啲個時間表，見到其他老師都無咩問題，甚至幾好。但係…但係點解要係張sir阿！我想像到將來自己無心機讀中文，最後dse攞咗個2，最後連書都無得繼續讀嘅人生。突然間，我變得好灰。
「唔緊要，仲有條計。」肥聰眼神凝重咁講。




「係咩阿？係咩阿？快啲講啦。」天真嘅我竟然相信肥聰會講啲建設性嘅嘢…
「留班。」個肥仔要點樣先可以咁認真講埋啲9嘢…
「仆你個街啦，留班仲點同佢同班阿。」我一邊隻手打落肥聰個頭上面，一隻手指住可柔。當然呢句我都係好細細聲講啦，費事佢聽到阿麻。
最後我哋嘅開學日就係收好多回條同聽校長廢up嘅情況下完咗。