自從女神做咗我讀者之後: 肥聰登場同大話既開端

第二日
「下半生~準我留住你~一直相愛~」我瞇瞇糊糊咁行返上班房，坐我隔離嘅好兄弟肥聰見我咁奇怪就問我。
「呢個人相當有嫌疑，做咩阿你？你條友嘴角含春咁嘅？叫咗你話可以亂講，嘢唔可以亂食架啦，出事啦，你老母係咪整蠱你,係你啲早餐到加過期春藥阿？」
平時嘅我一定寸返佢，但係我個陣成個人都飄飄然，沉醉係呢個幸福嘅氣氛到，根本都唔留心佢講咩。
「無阿，無嘢發生到喎，嘻嘻」
「坦白從寬，抗拒從嚴阿，以你啱先嘅語氣同埋你講嘅內容，你好快啲講發生咩事阿。」
唔知係我真係咁明顯（其實係）定係肥聰新人類嘅直覺，佢竟然知我發生咗啲事。
「咪話無囉，無阿，阿！阿！阿！痛阿！痛阿！」
「講咗架啦，抗拒從嚴阿，講定唔講？」
呢句係肥聰壓住我隻手嘅時候同我講嘅，呢個時候我終於清醒返。




「講阿講阿，你鬆返開先。」
呢個時候肥聰慢慢移返開佢啲手同個身。
「可柔琴日係ig dm我🤤」
「可柔bb會dm你啲咁嘅人？原來你唔係食咗過期春藥，係發春夢，可憐阿，可憐...」
「你個大舊衰有咩資格可憐我阿，你咪唔好信囉！」 
-------
中午lunch time嘅時候...
「喂，詩人,你諗住今日食咩阿？」肥聰係我隔離問我。
無錯，肥聰係少數知我有作句子嘅人嚟，平時我哋打機佢都會俾啲idea我，我哋同班咗兩年，可惜佢對3次元嘅嘢唔多感興趣，好多「老婆」都係動漫人物，可以話係標準嘅肥宅。但係雖然佢對現實嘅嘢唔係咁在意，但係可柔作為全級，甚至呢間學校嘅學生女神，肥聰都會叫佢做可柔bb，因為肥聰都覺得女神靚到有啲唔真實，就好似動漫入面嘅人咁。
「唔知阿，去街市睇下囉。」




去到街市，我哋到咗街市一間麵店到食牛腩麵。
「你朝早講嘅係咪真架？」肥聰一邊食麵一邊睇佢手機入面game嘅功略問我。
「你估下，我話有你又話我發春夢架啦。」我係同肥聰做一模一樣嘅動作之下答返佢。
「咁係好難接受可柔bb會搵你呢啲人阿麻，仲要人哋主動搵你喎，你邊個阿？人哋咁多人唔搵,搵你？」
呢個時候肥聰都放低咗佢對筷子同手機，對眼望住我，我feel到佢係認真咁問我呢條問題。
「無阿，我ff下揸麻，呵呵，人人都想可柔主動搵佢架啦。」
為免肥聰繼續追問同埋煩我，我決定遲啲先再同佢講。
「挑，你條友都運吉嘅。」肥聰翻咗下白眼然後就繼續做佢嘅嘢。
「作家職業病係咁架啦，今日放學打機喎，你ok？」
「得啦，等我carry你條廢柴啦。」




呢個時候，我哋都食到差唔多，就返咗學校坐同埋上埋個半日堂。
係我食完飯沖完涼之後，我ig又收到一條訊息「菠蘿先生，你嘅真實身份係咩阿？」唔同女神對我好奇？但係無理由同佢講我係佢同班咗三年嘅同學架...點答好呢🤔
「好似你見到咁，我咪一個作家囉😂」標準答案，實無死，你真係好聰明阿黃浩軒😎
「好衰阿你，點可以咁玩人架😣唔同你真係一個全職作家咩😒」女神真係好可愛🥰但係無計啦，當你知道咗我係邊個就唔會想同我傾偈，我哋嘅關係就會變返之前咁，我都唔想架。
「學生一個囉😂，得閒無嘢做擺上嚟分享下咁，你呢？」
「咁啱嘅我都係學生嚟，係一個中學生」我一早知啦，但係無計啦，我都係要扮唔知
「中學生？我都係中學生喎😮不過我係沙田返學嘅」明明我哋學校根本唔係沙田，係係元朗個邊，但係為咗唔俾佢發現我嘅身份，我決定偽造一個身份比自己。
「沙田？沙田好多間中學個喎，沙田邊間阿？🤨」沙田有邊啲中學我鬼知咩！沙...田...中...學冇錯，我係係度google緊沙田有咩中學。
「沙田蘇浙囉，普普通通一間中學囉。」
「原來係咁，我今年讀緊中三阿，你讀緊中幾？」
我怕如果我作大左，到時女神問我關於學習嘅問題我唔識就穿煲，所以都係講返一樣年紀算，反正本身一樣，同埋等我問埋女神諗住讀咩科先。
「真係橋😂我都係中三喎，我哋中三要揀科囉喎，你諗住讀咩？」
「唔知阿😣但係就咁望好似商科成績好啲，可能就讀商科掛...」商科？我仲以為女神文科成績好啲添，好彩我商科成績都唔差，就同佢一齊讀商科啦
「商科好阿，我都諗住讀商科🙂」
「菠蘿先生，唔同你講住啦，屋企人吹我訓覺，聽日再同你傾啦 88~」咁就完...果然快樂嘅時光真係過得特別快...唯有等聽日啦，真係越黎越期待🙈




「晚安啦yoyo317」yoyo係女神嘅英文名，而317就係佢嘅生日，3月17日。呢兩樣加埋就係女神嘅IG id