個晚訓着之後，我穿越左去第二個世界。: 第七章 (上)

「爸爸，係唔係係呢度呀？你不如揾下呢邊，我開呢度睇下。」我放低手上嘅鐵盒，打開化妝枱下面嘅櫃桶。

印象中嘅媽媽，係一個感性嘅人。

媽媽好中意影相，尤其是係影完之後逐張攞去沖曬。對於佢嚟講，相片係為咗證明一個人曾經存在係呢個世界上呼吸過。每一張沖曬好嘅相片，佢都會當成係珍寶咁小心安放係一個長盒裡面。間唔中有幾張特別滿意嘅，則會貼係書架隔離個個木櫃上面。

「揾到啦，揾到啦！」翻開櫃桶最上層嘅信紙，印有樹林圖案嘅鐵盒就擺咗係下面。

樹林圖案嘅鐵盒，係我小學二年級送俾媽媽嘅生日禮物。嚴格嚟講，俾錢個個係爸爸，我只係負責去揀中意嘅款色。





「樂生，你點解會認識董明？我印象中並冇向你提及過董明，而且同董明嘅見面，都係係你岀世之前。」爸爸疑惑地望向我。

「冇呀......只係我有個朋友嘅爸爸好似就係叫做陸董明，所以想求證下。如果係真嘅，咁我同個位朋友真係岀世前已經結下咗好深嘅緣份。」

「邊個朋友？男朋友呀？」爸爸皺起眉頭。

「邊有！」我有點驚慌地打開鐵盒，東翻西翻地想揾下媽媽同陸董明嘅合照。

如果媽媽同陸董明係認識，
如果陸董明真係可以穿越嚟到呢個世界，




媽媽一定會為佢影一張相。
一個唔應該存在嘅人係呢片土地上呼吸過，絕對係一個需要被記錄低嘅證明。

一張又一張嘅相片散滿一地。

我企係海洋公園恐龍前面受驚嘅相片。
我同媽媽係單車公園踩單車嘅相片。
爸爸係餐廳切生日蛋糕嘅相片。
媽媽係風車前面笑得開懷嘅相片。
我哋一家三口係海邊嘅合照。





夕陽無限好，只是近黃昏。

「有冇揾到你想要嘅嘢？」爸爸唔知幾時行咗嚟我身邊。

「冇呀......只係揾到呢啲。」我失神地望住散滿一地嘅相片。

呢個世界係好奇怪。有時你好想去揾某啲嘢，拼曬命去揾都未必揾到。相反地，一啲遺忘咗嘅記憶，可能係知道你已經唔記得咗，所以會自己走嚟提醒你。

「爸爸，你有冇諗過人死咗之後會去邊度？」

「假設只係失去咗肉身，靈魂應該會尚在。」

「咁媽媽嘅靈魂係唔係都會仲係度？」我諗起夢裡面向我呼喊嘅媽媽。





萬一媽媽嘅靈魂真係一直被困係異空間裡面，咁唔係太可憐咩？

「......」爸爸皺起眉頭，抿住嘴唇地望向遠方。

我抬頭望向爸爸。

「我相信，子予一直都冇離開過我哋。佢一直都係某個地方，守護緊我同你。」爸爸轉頭望向我，下垂嘅嘴角逐漸放鬆。