個晚訓着之後，我穿越左去第二個世界。: 第六章 (中)

「家姐，家姐？」雙兒憂心地望住我。

「嗯？」我嘅目光由遠處重新聚焦係雙兒身上。

「由今朝到而家你都不發一言，係唔係尋晚我令到你訓唔好？」雙兒內疚地低下頭。

自從同媽媽係夢中失散之後，我就再唔能夠入夢，個個嚷住要殺死我嘅惜時亦不見踪影。一切嘅事情，始終得唔到一個完整嘅答案。我就好比一個失去左靈魂嘅軀殼，腦海入面只有最後遇見媽媽嘅畫面。

「唔係，只係我仲覺得有啲攰，可能係尋日同你地玩得太癲。」我唔好意思地笑一笑。





「家姐你身體本來就唔好，尋日要你咁樣陪我真係對唔住。」

「無妨。我今日有啲事要做，你叫柔風帶你去玩。趁開學之前，去多啲以往未去過嘅地方，留下多啲珍貴嘅回憶。」

珍貴嘅回憶。係媽媽離開以前，我都曾經有過珍貴嘅回憶。但隨住時間嘅過去，記憶開始變得模糊不清。好多事我都唔清楚究竟係真實發生過，定只係自己掛念媽媽嘅思緒製造岀黎嘅幻想。

完成早飯之後，我神不守舍地攤坐係梳化上。我冇勇氣去同雙兒講我嘅夢，畢竟個個可能只係一個夢。訓着後進入左另一個世界，呢種無科學根據嘅事講岀黎只會被人當傻子。

唔知嘉伍而家點？我開始有啲想念呢個最陌生嘅好朋友。話係陌生，係因為我確實唔了解佢存在嘅世界。話係好朋友，我地又真係結結實實地認識左一段時間，一段最美好嘅時光。





陸嘉伍，陸董明。我靈光一閃，腦海裡面浮現左陸董明嘅名字。我記得惜時曾經話過媽媽欠陸家一條命，唔通佢口中嘅陸家係講緊嘉伍一家？而印象中伯母好似話過好討厭媽媽，因為媽媽害死左佢丈夫。所以，呢件事係陸家同程家之間嘅事。我，程生，同嘉伍嘅相遇原來並唔係巧合。係各人對事件嘅悔疚同怨恨，直接促成左我同嘉伍嘅相識。換言之，嘉伍就係解開一切真相嘅鑰匙。但而家嘅我，根本無法入夢。

既然無法由陸家入手，就由作為程家代表嘅我去找尋翻處於我呢個世界嘅部分真相。

「喂，爸爸。」我攞起手機，快速地撥打爸爸嘅號碼。

「樂生？係唔係雙兒係你個度惹上左麻煩？」爸爸以開玩笑嘅語氣問道。

「雙兒好乖，爸爸唔洗擔心。只係我有啲事想問一問你。」我態度委婉地小心問道。





「你講。」

「爸爸，我知道我唔應該再勾起你傷心嘅回憶，但我真係好想知道更多媽媽嘅事。上次你話媽媽唔希望我成為第二個佢，係咩意思？」

「個件事，其實我都唔係好清楚。佢只係講過要我好好保護你。」

「咁媽媽有冇向你提過某一個朋友嘅名字？」當問及陸董明相關嘅問題，要特別著重用字以防爸爸誤會。

「你係指緊邊個？」

「即係，可能係姓陸嘅朋友？」唔通媽媽真係冇向爸爸提過佢遇到嘅事？

「董明？」爸爸疑惑地問道。

「爸爸你識陸董明？」終於，我得到了答案嘅提示。





「我何只認識，我地仲見過面。」

爸爸見過係另一個世界嘅陸董明。點會⋯⋯？