個晚訓着之後，我穿越左去第二個世界。: 第二章 (下)
「 食個糯米卷啊，樂生。我記得你細個最中意食糯米卷架。」爸爸將一個糯米卷夾到我碗內。
「 樂生，仲有啲乜嘢想食，阿姨幫你點。」王小姐攞起手上嘅點心紙，認真咁睇起來。
「 家姐，仲有一隻鳳爪，不如你食埋佢？」雙兒指指佢面前嘅蒸籠。
係外人嘅眼裡，我地確實好似一家人，溫馨嘅一家五口。但呢個並唔係我想見到嘅情況，相反，我討厭呢種氣氛。愈係同佢地親近，我愈覺得自己背叛緊過左生嘅媽媽。
「 ⋯⋯程生，叫翻我做程生。」我低下頭來。
王小姐似乎被我嘅反應嚇倒，攞住係手嘅點心紙瞬間飄落係地上。
「 表姐！」柔風着急地踢一踢我。
「 我唔想，大家嘅關係搞到咁唔清楚。」我堅定地望住柔風。
「 唔緊要啦，都係一句⋯⋯啊！」爸爸彎低腰，雙手㩒住腹部。
「 老公，你點啊？」 「 阿爸，做咩事啊？」王小姐同雙兒關切咁望住爸爸。
「 冇，我冇事⋯⋯繼續食嘢。」爸爸勉強抬起頭望住我。
見到爸爸痛到額頭都岀滿曬汗，就知一定有事。永遠都係咁，諗左身邊嘅人先，最後先諗到自己。明明痛到咁，為左唔令我地擔心，都要話冇事。
我行到爸爸身邊，伸岀雙手幫佢搓一搓腰部。
「 係唔係以前嘅舊患？以前做中港司機嘅舊傷？」我專心地幫爸爸按摩腰部。
「 都過左咁耐，連疤都冇埋啦。」疼痛感令爸爸無法坐直身子，但都係回過頭來望住我。
「 咁即係風濕啦。」我笑一笑。
忙住幫爸爸按摩，都冇留意到對面嘅三個人正用欣慰嘅眼神望住我地。
「 果然真係需要樂生在旁先得。」王小姐溫柔地笑一笑。
呢種眼神，呢種笑容，點可以？
我放開替爸爸按摩嘅雙手，不發一言地坐翻埋自己位。
「 樂生⋯⋯？」爸爸失望地望住我。
「 以後，雙兒你就用頭先嘅方法幫爸爸止痛啦。」我低下頭。
「 樂生！」爸爸激動地拍一拍枱。
「 唔好意思啊，我都係走先啦。」我企起身，轉身離開。
「 樂生，你就真係要咁樣懲罰爸爸咩？」離開前，我最後聽到嘅說話。
翻到屋企後，我終於唔能夠再抑壓，成個人崩潰起來。
點解？點解會咁矛盾？點解唔可以好好同佢地相處？點解內心嘅我要咁硬頸？媽媽⋯⋯我好需要你。樂生好想攬住你，話你知我有幾委屈。
如果，可以永遠都留係夢境裡面就好啦。
咁嘅想法第一次岀現係我嘅腦海裡面。只要永遠留係夢境裡面，我就唔洗受現實世界嘅折磨。
我行入廚房，打開藥箱，從裡面攞岀一排藥。
安眠藥，食兩粒嘅話應該唔會冇命。我嘅原意只係想沉睡耐啲，唔係死。我將兩粒藥丸倒岀黎，沖水，吞落肚。
跟住落黎就係好好休息一下，忘記現實嘅衝擊，醒翻嘅時候，就可以見到嘉伍係身邊。
「 程生，你覺得呢間鋪嘅佈局點？」嘉伍遞左張相俾我睇。
「 幾好啊，好有舊式香港嘅風味。」
果然，係夢境裡面最能夠令我做翻自己。
「 我打算攞呢幅圖去參加見習室內設計師比賽，你會支持我架可？可唔可以⋯⋯陪我一齊參賽？」嘉伍愐㥏咁望住我。
見習室內設計師比賽？ 係喎，按照呢度嘅時間黎計，嘉伍而家已經year3，確實係需要開始諗下將來。不過，如果我再幫佢砌模型，我嘅身體又唔知會岀現乜嘢變化。但頭先臨訓前食左兩粒安眠藥，今次應該可以撐得耐啲。
「 好啊，我就留係度陪你直到比賽完結。」我向嘉伍眨一眨眼。
就係咁，我已經同嘉伍合作左足足四日。係呢四日裡面，我並冇感受到要醒過來嘅跡象。相反，夢境俾我嘅感覺愈來愈真實。
「 程生啊，你都辛苦架啦，今晚要唔要去我屋企食飯？」嘉伍一邊上色，一邊問我。
「 你屋企？你唔係翻宿舍咩？」我放低手上嘅熱熔膠槍，望住佢。
「 你幫左我咁多，我又邊度好意思要你繼續留係學校訓。我屋企人都係度架，之後個幾日你可以係個度休息。」嘉伍向我露岀大男孩式笑容。
係佢屋企？係唔係即係帶我見家長？
「 我都冇所謂啊。不過，你屋企人方便架啦？你⋯⋯有冇帶過女仔翻屋企？」我唔好意思咁迴避嘉伍嘅眼神。
「 我同佢講左架啦，好方便啊。你嘅日用品包括牙膏、牙刷、睡衣⋯⋯都已經準備好曬架啦。」
咁快⋯⋯
同嘉伍一齊嘅時光，無論係工作定係玩樂，都值得去回味。唔知現實中嘅我，而家訓左幾耐？如果我一直唔醒，柔風一定會好擔心。
「 嘉伍嘅朋友，點稱呼？」嘉伍嘅媽媽向我微微一笑。
伯母笑起上黎同嘉伍嘅笑容一樣，都有令人溫暖嘅能力。原來嘉伍清秀嘅五官係遺傳自伯母。
「 程生，你好，我係程生。」我向伯母鞠躬。
「 唔洗咁客氣啦，坐低啊。」嘉伍向我揮揮手，示意我去梳化個邊坐。
嘉伍嘅屋企唔算大，但係麻雀雖小，五藏俱全。裝修主要採用暖色系，大部分嘅家具都係木製嘅。牆上貼滿嘉伍同媽媽嘅即影即有，其窩心程度清晰可見。
但係，每一張相都只有嘉伍同伯母。甚至係呢間屋裡面，絲毫感受唔到第三個人嘅痕跡。唔通⋯⋯
「 係啊，我係來自單親家庭。」嘉伍唔知幾時行左去我旁邊。
原來，我地嘅成長環境係咁相似。但係，我好似從來都冇向嘉伍提過我嘅家庭背景。
「 咁啱嘅，我都係。」我向嘉伍苦笑。
「 程生⋯⋯」
「 唔好傾住啦，過黎食飯先啦。」伯母由廚房行岀黎。
Dee....Dee...Dee....Dee....Dee...
「 伯母，你係唔係唔記得左熄爐？點解會有啲奇怪聲嘅？」我疑惑地放低碗筷。
「 傻左咩你？未熄爈都唔會係咁嘅聲啦。計我話，呢啲更似係電話震機聲。」嘉伍由褲袋攞起電話。
「 唔係我喎，況且我有鈴聲架。」嘉伍望一望我。
電話⋯⋯震機⋯⋯唔通⋯⋯係我？
「 咳咳咳咳⋯⋯」窒息感再現。
「 啊呼！」我由床上彈左起身。
翻左黎啦，翻到黎現實。
Dee...Dee...Dee...Dee...Dee...Dee...
我攞起書枱上面嘅電話，果然係我。
係柔風打黎。
「 喂，柔⋯⋯」
「 你點解而家先聽電話啊？我打左俾你十幾次啦。」柔風嘅語氣非常着急。
「 發生咩事⋯⋯？」
「 我而家係醫院。」