[陳子鋒系列] 大學入學篇: （八十）拉斐爾的坦白 及 我的想法
拉斐爾往外面看了一眼，除了彼德和安德烈，其他門徒也相繼清醒過來，相信再過不久，迎新營的其他人也會清醒過來。
「嗯，你的確有權利知道發生咩事。」
拉斐爾打了一個響指，我和炎冰便被他帶到了另一個空間，這是早前拉斐爾試圖勸誘我成為門徒的地方。
「我哋嚟咗呢度，咁其他人呢？」
我擔心如果其他人在這段期間醒來，會對現況感到不知所措。
「呢層你唔駛擔心，呢度嘅時間流動慢好多，加上我暫時解放晒所有嘅力量，無人可以入到嚟騷擾我哋。其他人嘅話你唔駛擔心，世界嘅法則會為今次嘅事做出修正。」
我點了點頭，雖然我從維園大叔那了解到有關世界的法則，但說真的我也只是一知半解，只是，拉斐爾都這樣說了，我就姑姐相信他吧。
「陳子鋒，容許我再次同你講聲，對唔住！」
拉斐爾低下了頭，我能感受到他真摰的情感。
「已經無關係啦，炎冰能夠無事就好，你都唔駛再道歉，我只係想知道到底發生咩事。」
「雖然呢件事好複雜，但如果簡單講嘅話，就係我哋天界分成咗兩個陣營。一邊係希望你生存，一邊係希望你......希望你死。」
雖然我大致上也能猜到，但從拉斐爾口中說出來，那種震撼的感覺又是另一回事。
「點解？」
我這一提問，當中包含了無數意思，但最重要的是，為甚麼是現在，如果要我死去的話，過往應該有無數次機會才對。
「原因有二，第一，呢個好耐以前都有同你提過，上一次莉莉絲復活，令神受到傷害，而傷害至今仍未復原，我哋擔心如果莉莉絲復活，會有更嚴重嘅後果。」
「所以你哋擔心所謂全能嘅神會再受到更嚴重嘅傷害？」
拉斐爾點了點頭。
「除此以外，之所以希望你死嘅意見愈嚟愈多，係因為你嘅力量。」
我聽到後皺了皺眉。
「以往莉莉絲選擇咗容器進行復活，一般嚟講只會喺復活前幾個月甚至更短嘅時間，先會被我哋或者其他惡魔察覺。但你唔同，你嘅力量強大到，喺莉莉絲復活前幾年，已經引起咗我哋嘅注意。亦都因為咁，你先會喺澳門遇到路西法，而我亦因為咁所以先出現喺你面前。」
「原來，我之前遇到嘅事都唔係偶然......」
「無錯，莉莉絲選擇嘅容器有好多條件同限制，但你嘅一切都好似係為佢復活而準備，而且你嘅力量以幾何級數嘅速度上升，如果莉莉絲利用你嘅身體嚟復活，佢嘅力量唔係我哋能應付到。甚至我哋之中，會擔心佢嘅力量，就連神都可以吞噬......」
聽到這邊，我才驚覺事情的嚴重性，我為了生存而磨練自己，卻令自己變得更加適合莉莉絲復活，這真的是本末倒置。
說不定，維園大叔在我中學時，把我的靈力封印起來，那才是這個難題的正解。
「所以，只要我力量愈大，莉莉絲就會愈強大。」
拉斐爾點了點頭。
「如果係咁嘅話，我放棄呢一切咪得囉？我可以唔再運用靈力，好似之前咁，再次將我嘅力量封印就可以啦！」
「事情唔係咁簡單，就算將你嘅力量封印，甚至廢除，你嘅靈魂已經成長到一個十分強大嘅地步，烙印喺靈魂上嘅一切係唔會消失。再加上，你體內嘅另一個靈魂，嗰個負責處理你負面情緒嘅靈魂，佢嘅力量亦十分強大。結論就係，就算對你做任何嘢，你嘅成長係無辦法停止，直到莉莉絲復活之時，你都會繼續成長。」
「然後，你哋得出嘅結論就係，等貝爾菲格對付我？」
「其中一部份係咁諗，但，我並唔認同，應該講，我哋仲有一部份唔認同。」
從拉斐爾的話裡可以得知，大概支持讓我自生自滅的佔了大部份。
「就算係咁，有必要牽連到炎冰同其他人咩？」
「比起人類，佢哋選擇咗天界。」
聽到這裡，我心中的怒火又被點燃，但我不知道這怒火可以往哪邊發洩。
「我知道你一定會好嬲，我都唔認同呢種做法。更重要嘅係，我相信你可以解決呢種情況。」
我以疑惑的眼神看着拉斐爾。
「我唔明，點解你會咁信我？」
「講真，我都唔明白，或者，可能我以人類形象出現之後，慢慢地變得更加人性化。而且，我選擇相信你，係因為你一次又一次跨越死亡嘅威脅，面對不可能對抗嘅力量，你無放棄過，如果係你嘅話，話唔定可以阻止莉莉絲復活。」
「哈，你太睇得起我啦。」
我發自內心地這樣說，畢竟我連莉莉絲會如何復活也不清楚，又怎會阻止得了他。
「呢個只係我嘅感覺，如果係以前，我一定唔會同作為容器嘅你去講咁多嘢。我只需要喺莉莉絲利用你復活嘅時候將佢解決，就完成我嘅職責，但你同以往嘅人都唔同，我覺得你能夠做到。」
「就算你咁講，我根本唔知可以點做。」
「我明白，我唯一可以畀你嘅建議，就係堅持你所信，維持你嘅信念。好啦，要講嘅都講晒，我哋返去收拾殘局啦，米迦勒都準備過嚟。」
「等等，我仲有個問題。」
拉斐爾疑惑地看着我。
「支持我嘅有幾多？」
「大概係二比八左右。」
「米迦勒呢？」
「佢？雖然佢好冷酷，但佢係我好朋友嚟。順便講一句，御前天使入面，我哋有三個係支持你。」
我聽到後不禁失笑。
「咁唔夠一半喎。」
「七份三，算係咁啦，嚟啦，我哋出去啦。」
在解開了我的疑問後，我對自己的命運更加的了解，但，還是沒有解決的方法。
現在，我只能好好享受剩下來的迎新營，以及繼續好好生存落去，至少，我唔係孤軍作戰。
但是......
「喂，拉斐爾，呢度被貝爾菲格搞到咁，佢哋醒返點搞呀？」
「我咪話世界嘅法則會修正嘅，大概佢哋醒返之後，只會記得自己參加咗營火舞會，然後渾渾噩噩到第二日，總之唔會有人覺得奇怪。」
世界的法則有這麼神奇嗎？
「咁，Raymond呢？」
Raymond，亦即協助貝爾菲格的猶大，大概是這次事件的唯一犧牲者。
「我諗，大家嘅記憶應該會改變，可能由頭到尾，都唔會有Raymond呢個人出現過。」
「唔係啩？咁大個人可以完全消失？」
「本來世界嘅法則就係會為一啲非自然嘅事做出修正，而且Raymond嘅存在已經改變咗，佢選擇作為猶大而存活，所以世界唔再需要佢嘅存在。雖然用人類嘅語言好難解釋，但你將佢想像為一個無Raymond嘅平行世界就可以啦。」
我雖然有聽沒有懂，但我在此時向彼德和安德烈他們看了一眼，他們既然自稱門徒，如果真的發生了甚麼事，是否也會像Raymond一樣，消失在世人的記憶中呢？
又如果，我在這一刻消失了，是否也會從其他人記憶中消失呢？
如果會的話，那我一直擔心自己離開，會為其他人造成影響的擔憂，不就不存在了嗎？
那我，是否應該......
那天晚上，我沒有任何結論，我只忙着享受難得的大學生活。
雖然我在的組別原本應該少了好幾人，但就像拉斐爾所說的，在修正過後，我的小組裡多了原本應該是別組的成員，而且還是位美女，那我也沒有甚麼好抱怨了。
不說了，我現在就要好好享受作為大學生活的序章了。
但如果世界的法則能把我從世人的記憶中消除，我的離開不會帶來任何不幸。
或者，我應該讓這大學的序章，改成大學的最終章，那麼，世界會變得更美好吧。
「子鋒，你做咩呀？水球去你嗰邊啦！」
我的組員把我從沉思中拉回現實。
「收到收到，交畀我！」
好吧，序章又好終章也好，我還是先着重眼前，至少把迎新營好好的過完吧。
（完）