[陳子鋒系列] 大學入學篇: （六十三）貝爾菲格 - 談判（２）

「你唔駛一口拒絕我住，因為我要提出嘅建議，對你嚟講係百利而無，呀，唔係，應該係百利但有一害先啱。」
 
「咩意思？」
 
「我知道你咁耐以嚟做嘅嘢，就係想擺脫莉莉絲借你身體復活嘅計劃。但你要知道，體內被植入惡嘅種子後，係唔可能改變呢個命運，即係你已經注定成為莉莉絲嘅容器。」
 
與貝爾菲格交手多次後，我大概也對他的性格及手段有一定的了解，正因如此，我此刻才能感受到，他，沒有在虛張聲勢或是說謊。
 
「咁又點，唔試過點知做唔到。」
 




「本來人之軀就有各種限制，但偏偏我哋如果要復活，就一定要借助人嘅身體，先可以將我哋嘅力量發揮出嚟。只係每個人嘅身體都唔同，並唔係所有人都可以承受到我哋嘅力量，所以我哋用唔同嘅形式嚟迷惑人類，奪取佢哋嘅身體。只係一但奪取咗人類嘅軀體，天使就會出師有名對付我哋，如果係唔適合嘅軀殼，我哋無辦法發揮全部嘅力量，根本就無辦法同佢哋對抗。」
 
「你哋嘅鬥爭關我咩事？」
 
「無錯，我哋嘅鬥爭本來就唔應該牽扯到你哋身上，但你有無諗過，點解我哋一定要透過人之軀嚟獲得重生？」
 
貝爾菲格的話，我是絲毫沒有想過，的確，如果他們的力量如此巨大，利用人的軀體根本無法徹底使出所有力量，那為甚麼他們仍要執意奪取人的軀體。
 
「你唔覺得，呢個根本就係神嘅玩笑咩？」
 




「神嘅玩笑？」
 
「神自詡為全能至善，但點解又要容許惡嘅存在，另外又要創造出有缺陷嘅人類，而我哋復活又要奪取人嘅軀體。呢啲真係全能至善嘅神，可以做出最好嘅方案咩？」
 
貝爾菲格的話語，大概是我在跟拉菲爾有所接觸後，第一次從另一方聽到的想法。
 
「就算你口中所謂嘅神並非全能至善，咁又關我咩事？」
 
「陳子鋒，你諗下，如果莉莉絲復活，所引發嘅並唔單只係向神發出挑戰，佢喺排戰之前一定需要自己嘅軍隊，到時佢會將人類變為惡魔嘅溫床，除咗你之外，你身邊所有嘅親朋戚友，以及所有唔認識嘅人，都會變成惡魔，到時候，無論贏嘅係邊個，你熟悉嘅地球，都唔可能再存在。」
 




「哼，好似你咁講，莉莉絲嘅復活係阻止唔到，你同我講呢啲嘢又有咩用？」
 
「你哋阻止唔到莉莉絲嘅復活，但我可以。」
 
「你？哈，哈哈，你阻止佢復活有咩好處？唔好講咩為咗人類，我真係會笑死。」
 
「頭先我講過，呢個提議係百利，但有一害。我可以阻止莉莉絲復活，亦可以阻止人類滅亡，你身邊嘅所有人都可以獲救。而犧牲嘅，只係需要你一個。」
 
「犧牲，我一個？」
 
「無錯，我相信你應該從拉斐爾口中聽過我嘅事蹟，我唔會好似莉莉絲咁，希望消滅神，我憎恨嘅來源，係路西法！只要我擁有絕對嘅力量，我可以壓制住其他惡魔，莉莉絲亦只可以聽我指揮，繼續喺地獄深處匍匐前進。但依家嘅我係做唔到。」
 
「你嘅意思，係要我交出自己嘅軀體畀你？」
 
「無錯，雖然我寄身嘅呢個女仔已經算係天賦異稟，但我極其量只能發揮一半左右嘅力量。打破規則嘅我，喺未成功對付路西法之前，就會被拉斐爾佢哋消滅。但如果喺你嘅軀體，我唔單只可以發揮百分百嘅力量，甚至可以有所突破。到時我只要殺咗路西法，就會去地獄度繼續折磨佢，根本唔會嘥時間去對付人類或者神。」




 
「你講就講到好美好，但咪又係想要我嘅軀殼，同埋我點知道你會唔會遵守約定。」
 
「我以貝爾菲格嘅靈魂起誓，只要你，陳子鋒，交出你嘅軀體，喺你有生之年，我唔會傷害你身邊嘅任何人，亦唔會對其他任何人出手。」
 
靈魂起誓，要說這個世界上的法則之一，起誓絕對是其中一種。
 
但當然，並不是說隨便哪人來發誓就會受到約束，不然的話，這世界應該不會再有人發誓了。
 
還記得當初在暗算天命叔時，略施小計硬是讓他收了小詠為徒，那就是以靈魂起誓所帶來的約束效果之一。
 
這就是世界的法則，只要你還在這個世界的規範下存活着，就必然需要某程度上遵從這種法則，而我亦相信，暫時仍在法則規範下的貝爾菲格，如果以靈魂起誓，他也是會被法則所規範。
 
但是，他那明顯有問題的起誓，我才不會落入他的圈套之中。