[陳子鋒系列] 大學入學篇: （四十六）營火晚會（4）

我還在想着怎樣才能留下來的時候，炎冰便主動建議。
 
「唔駛，你哋去食堂啦，Raymond等我睇住啦。」
 
「嗯，但同性嘅我照顧佢方便啲喎。」
 
看着兩人在討論着應該由誰照顧時，Raymond則裝出恢復精神的樣子。
 
「你哋唔駛討論啦，我無事，啱啱太攰休息陣啫，依家好好多啦。」
 




「你真係無事？真係唔舒服可以出聲，我同Irene都可以陪你，又或者送你去保健室都可以。」
 
「嗯，我無事，我同子鋒佢一齊去食堂就得啦。」
 
本來家琪還想說些甚麼，但炎冰則搶先表示。
 
「咁你同子鋒去食堂啦，但如果有咩事記住出聲。」
 
Raymond點了點頭，便拉着我離開了營舍，而炎冰則和家琪繼續待在營舍，大概是有甚麼要說吧。
 




然後Raymond和我走着走着，他突然停下了步伐，然後把我拉到一旁去。
 
「搞咩呀你？又唔舒服呀？」
 
「係......呀，唔係。」
 
「咁係定唔係啫？係唔舒服我陪你去保健室啦。」
 
「我係仲有啲唔舒服，但唔大問題。我真正覺得有問題嘅係......你，你覺唔覺得，其他人好似變得好奇怪？」
 




「奇怪？咩意思？」
 
「我驚講完你會覺得我好奇怪。」
 
「吓？咩呀，你講啦，你依家已經夠奇怪啦。」
 
「嗯，唉，好啦。頭先去營舍嘅時候，你咪因為要聽電話無跟上嚟嘅。本來都無乜嘢，我仲同其他人有講有笑，不過入去營舍之前我煙癮起，就走埋一邊食煙，但我食完煙準備入去營舍嘅時候，我發現房入面有啲奇怪嘅聲，感覺上係做緊啲儀式或者禱告咁，我聽到佢哋好似喺度講咩helel。」
 
「Helel？咩意思？」
 
「我都唔知呀，但總之聽起上嚟就唔方係啲咩好嘢啦。當我諗住推開門偷睇入面發生咩事嗰陣，突然間有兩個學生會嘅人出現喺我後面，佢哋行路好似完全無聲咁，唔係佢哋拍我膊頭問我咩事，我都唔知佢哋喺我後面。跟住我求其廢Up咗幾句，我就推門入去啦，但入到去之後我發現成間房都變得好唔同，所有人感覺都變得好冷漠，而且望住我嘅眼神好似好有敵意咁。之後頭先嗰兩個學生會嘅人都入咗嚟，同家琪講咗幾句之後，就話想我去食堂嗰邊幫幫手，咁我梗係求之不得啦，與其留喺度被其他人睥到實一實，不如去幫下手郁下好過。但奇怪嘅係，我淨係記得自己跟住佢哋出咗去，之後就咩都唔記得啦。」
 
我聽到這邊，已經大概猜到發生了甚麼事情。
 
「咁你入去營舍嗰陣，見唔見到炎......Irene喺入面？」




 
「Irene？咁又好似無喎，當時好似係得家琪同其他組員，Irene唔喺房。」
 
想不到我只是接了通電話，竟給貝爾菲格製造了可乘之機，看來此刻除了Raymond跟炎冰外，我便沒有任何同伴了。
 
「子鋒，子鋒。」
 
「吓？做咩事？」
 
「無呀，我見突然間呆咗咁，你係咪唔信我講嘢呀？我講嘅都係真㗎！啱啱我之所以死都唔肯跟佢哋去保健室，就係因為我覺得佢哋又要對我唔知做啲咩，所以先死都要跟你去食堂咋。」
 
我抓了抓頭，突然有點後悔自己把Raymond的意識救回來，本來以為他會甚麼也記不起來，想不到他竟保留了這麼多的記憶，而且更本能地察覺到事情有不妥當的地方，我實在不知道應怎樣和他解釋才好。
 
「我問你，點解你又唔驚我，萬一我其實都好似其他人咁，已經變得奇怪，但只係無表現出嚟，咁你咪好危險囉？」
 




「呢層，咁樣講雖然有啲怪，但我大概可以分辨到人嘅善意同惡意。講明先，我唔係咩中二病覺得自己有咩特殊能力，我只係因為由好細個開始就比人恰，所以慢慢學識點樣睇人，同埋要做啲咩嘢可以減少比人恰嘅機會。我依家嘅打扮都係因為咁樣可以更加融入其他人而特登去整出嚟。」
 
聽到這邊，我知道不能棄他不顧，如果真的如他所說，他能感受到善與惡，待會去到食堂時，他大概會被嚇得不知所措。
 
而且是我選擇把他的精神救回來，那只能負責到底了。
 
「好啦，既然你都講到呢個地步，我都無辦法唔理你。接落嚟輪到我要講嘅嘢，你可能完全唔會相信，但如果你真係能分辨善意同惡意，陣間去到食堂，你就會明我講嘅嘢都係真。」