[陳子鋒系列] 大學入學篇: （四十三）營火晚會（1）
家琪和炎冰帶着我們組進入到營區，然後由裡邊的工作人員再帶我們先前去禮堂的位置。
進到禮堂後，發現其他組別已經在裡邊，情況好不熱鬧。
「試咪試咪，好啦大家，又係我，MC Andy，旁邊係我嘅好拍檔，Angel。我都知大家等咗好耐㗎啦，不過大家唔駛擔心，因為最後一組嘅成員，已經順利嚟到渡假營，大家畀啲掌聲先。」
聽到Andy的說話，雖然不知道鼓掌的原因為何，但大家還是十分配合，先鼓掌再說。
「好啦，咁最後一組成員到咗，只要計埋佢哋嘅得分，我哋就會好快知道今日City Hunt嘅贏家係邊個啦。不過Andy，我記得規則好似有講過，話如果遲入營嘅組別係要扣分㗎喎，佢哋呢組好似，哎呀，遲咗十分鐘喎。」
「Angel你真係醒，無錯，遲到係要扣分嘅！不過！」
「不過？」
「不過呢，我透過小道消息收到風，佢哋遲入嚟係有原因嘅。」
「咩原因呀？」
「聽返啲工作人員講，佢哋嗰組開始無幾耐，就有一位組員Andrew因為個人原因所以要先離隊，本來咁樣已經令佢哋嘥咗啲時間同埋人數上無咁多優勢，點知去到西貢嘅時候，佢哋諗住做埋最後一個任務嗰陣，佢哋嘅組媽Judy，竟然突然間暈咗！」
「吓？佢無事呀嘛？」
Angel的聲音突然變得真誠，看來他也是剛剛才知道Judy的情況。
「唔駛擔心，我哋嘅工作人員已紅經陪咗佢入醫院，相信唔會有事嘅，同埋佢哋如果一有消息就會通知我哋。」
「咁都好啲，希望Judy可以盡快好返啦。」
「無錯，好啦，言歸正傳。我想講嘅係，呢個就係家琪佢哋嗰組遲入營嘅原因，而面對呢啲不可抗力嘅情況，我相信大家都會體諒嘅係咪。所以我Andy，大膽咁喺度問大家，係咪唔應該扣佢哋分先。係嘅同我大力啲拍掌。」
想當然，面對這樣的情況，大家的掌聲又再次響起，相信沒有人會為了這種遊戲性質的迎新活動而去計較甚麼。
「既然大家都贊成，咁我哋就咁決定啦！而好彩嘅係，你哋肯同意，咁樣嘅話我哋就唔駛再去計過一次大家嘅分數啦。無錯，分數已經計好啦，你哋嘅排名已經喺我手上，大家畀啲歡呼聲我！」
台下馬上傳來一陣歡呼聲。
「好啦好啦，Andy，唔好再吊大家癮啦，快啲公佈啦。」
「得啦，唔好催我啦，不過公佈結果之前，你係咪漏咗啲嘢未講呢？」
「呀，你又啱喎，今次被你捉到添。無錯，大家都應該聽自己組嘅OC講過，今次最高分嘅一組同最低分嘅兩組，分別會有獎勵同懲罰嘅！」
「哇，懲罰，正呀！」
「哎呀，你咪鬼成個變態佬咁啦。」
「咩啫，我替大家緊張咋嘛，咁到底有啲咩懲罰啫？」
「陣間解散之後，大家就可以返房擺低嘢休息下，到晚飯時間去食堂就得啦。但係，最低分嗰兩組呢，喺放低嘢之後，就要返嚟食堂呢度，幫手擺下嘢佈置下咁。」
「咁慘？咁贏咗又點先？」
「最高分嗰組，陣間食飯嗰陣會由最低分嗰兩組嘅人服侍，唔駛自己郁手。雖然係咁講，但都係十分鐘啫，之後就可以返去自己枱度食飯。」
「好啦，咁事不宜遲，我哋即刻宣佈最高分同最低分嘅組別。」
在宣佈了結果後，各組別都準備回到自己的營舍之中。
「另外，提提大家，食完飯之後就係營火晚會，返房可以練習下之前教大家嘅舞步。」
就在我跟着組員們來到營舍，我口袋裡的電話震動起來，我看了一下來電，是安德烈。
我跟組員交待了一聲後，把我的背包交給了Oscar，便走到營舍附近一個接收比較良好的地方去。
「喂，安德烈，打畀我做咩事？唔係你嗰邊有咩問題呀嘛？」
「我呢邊無問題，而且可以話係好順利添。」
「好順利？你唔係話其他人可能都被操控咗咩？」
「呢樣嘢講起就奇，我同你哋分開之後，就即刻去搵彼德，同我估計嘅一樣，佢都係中咗招嘅，不過佢嘅意志力比我更強，所以喺發現自己有異樣之後，佢就匿埋咗喺自己宿舍，我喺旁邊稍為輔助佢之後，佢就恢復正常。原本我仲喺度諗要搵埋其他門徒逐個處理，但處理到一半嘅時候，我突然收到教廷畀我嘅訊息。」
「訊息？」
「嗯，佢通知我哋，本身已經被我哋包圍，受困於別墅之中嘅祭司，突然之間好似失去咗力量咁，之後我哋好快就突破咗佢嘅防線。當我哋搵到佢嘅時候，佢全身都好似燒傷咁，身體亦都發出濃烈嘅臭味。我哋本來想再逼問佢其他成員嘅下落，但佢依家個人神志不清，我哋仲照顧緊佢，希望佢清醒之後可以接受我哋嘅勸導，唔好再去提供力量畀貝爾菲格。」
「咁你嗰邊搞掂晒，係咪準備返入嚟？」
「我仲有啲手尾要跟，可能要再多啲時間，但我會盡快返入嚟。你嗰邊無咩事呀嘛？」
「無事就假啦，啱啱喺西貢碼頭爭啲出事，好在我聰明絕頂先可以安全走返出個死人結界。」
「總之無事就好啦，你同Irene撐住，我一搞掂就會過嚟幫手。好啦，唔講啦，我要同彼德佢哋搞掂埋啲手尾。記住，小心身邊嘅猶大，唔好信任何人，特別要小心Judy。係咁先啦，bye bye。」
似乎安德烈那邊仍要忙好一陣子，本想告訴他Judy已經入院，暫時不用擔心，但還來不及說出口他便掛線了。
「算啦，反正都係小事嚟。」
我邊想邊走回營舍，而我發現，在跟安德烈通話的期間，在入口處感受到的惡意毫不掩飾地針對着我，當我稍為警惕着一個方向的時候，惡意便又從其他方向往我襲來，仿佛惡意滿佈在營區當中一樣，看來，今天不會是平靜的一夜了。