[陳子鋒系列] 大學入學篇: （三十四）迎新營 - City Hunt (4)

被九字護身法驅除邪氣後，我和安德烈兩人把他們半拉半拖的帶回到七樓的位置，等待着他們清醒過來。
 
而在等待期間，安德烈把他所遭遇的事情告訴我。
 
原來在追查晨光教的時候，他和其他門徒各自追尋着晨光教的信徒，而他和安德烈追查到應該是晨光教的總部。
 
當他們在接觸總部的教徒時，遭遇到激烈的反抗，然後自從那天起，他就感到精神有點不集中，只是沒有想到已經被操控了。
 
「所以我有啲擔心彼德，而且佢哋處理緊總部嗰個祭司，我怕會影響到處理嘅情況。」
 




「你會唔會可以聯絡到佢哋。」
 
「得係得嘅，但我都唔肯定其他人會唔會同我一樣被操控住。」
 
「米迦勒呢？」
 
「唉，佢唔會出手幫忙，呢啲事對佢嚟講只係人嘅糾紛，應該由我哋自己去解決。」
 
「可惡，一個二個都咁食古不化。一係你陣間諗辦法離隊先，直接去搵佢哋，處理好後再返嚟。」
 




「唯有係咁，但你要小心啲，如果我哋真係受到操控，貝爾菲格可能隨時會復活。」
 
「唔駛擔心，我同炎冰喺度，應該唔會有事，你放心去幫其他人手啦。」
 
「嗯，我嗰邊有咩消息再通知你。雖然我唔知你信呢一套，不過都係一句，願主祝福你，阿們。」
 
等到七樓的人全部清醒後，由於他們都處於迷糊的狀態，我和安德烈很快便完成了任務，取得了印章後，便馬上離開。
 
在下樓的同時，我發現五樓，三樓和一樓的人都是迷迷糊糊的感覺。
 




「睇嚟頭先嘅九字護身法好有效，但估唔到全部人都已經受到貝爾菲格嘅操控。」
 
「我諗你將所有人都當成敵人會好啲。」
 
我和安德烈回到偉智街遊樂場時，其他人已經先一步回來，而其他組員看到我時，發出了歡呼聲。
 
「Yes，我哋係最後一組拎到分數，快啲出發去下一個地點啦。」
 
Raymond興奮地說，其他人也附和着。
 
「唔好意思呀，家琪，Judy，我有少少嘢同你哋講，幾句㗎咋。」
 
三人於是走到一旁，我知道安德烈是告知他們要先行離隊。
 
而我亦爭取時間，走到炎冰身旁。




 
「安德烈嗰邊遇到麻煩，佢啱啱被貝爾菲格操控咗，懷疑其他門徒都出咗事，所以佢要去睇下情況。」
 
「原來係咁，唔怪得頭先大廈有咁強大嘅靈力，睇嚟啱啱發生咗唔少事。」
 
「貝爾菲格聲稱好快會復活，而且頭先入面嘅人，基本上都被控制住，所以我先要用咁大嘅靈力整醒佢哋。安德烈估計，可能全部人都已經被貝爾菲格操控住。」
 
「哈，你唔驚我都被佢控制住咩？咁大膽同我講。」
 
「如果你都被佢操控，咁我死硬啦。不過唔好講笑啦，我好似第一次被咁多人追住，出手又唔係，唔出手又唔係。」
 
「唔係呀，你之前幫我手對付嗰班道士，出手都快狠準㗎。」
 
「點同呢，嗰次係為咗救你阿爸阿媽，同埋佢哋本身都唔係咩好人嚟。但今次身邊嘅，幾乎都係普通人嚟。」
 




「你要記住，無論對方係唔係普通人都好，甚至對方係你嘅朋友，親人，必要時一定要出手，因為能夠救佢哋嘅，只有你自己。」
 
「我盡量啦，其實頭先我有諗過你會入嚟幫手，所以有一刻諗住拖時間就算，但佢哋實在太煩，連拖時間都好難做到。」
 
「好在你無等我，啱啱我中途突然感受到邪氣嘅時候，Judy突然間拉住我同我討論好多嘢，令我完全無辦法去幫手，我覺得佢應該就係猶大，想阻撓我嘅意圖太明顯啦。」
 
「唉，依家先迎新營第一日，點頂到第三日......」
 
「話唔定未到第三日貝爾菲格已經出手......唔好講啦，佢哋似乎傾完。」
 
安德烈、家琪和Judy向我們走來。
 
「同大家講個消息先，安德烈因為屋企有啲事，所以要先行離開。」
 
聽到家琪的說話後，其他人都紛紛表示慰問，但都沒有再追問太多。




 
「多謝你哋，我處理完屋企啲嘢之後會盡快返嚟，希望可以趕得切啦。」
 
安德烈說完後，再看了我一眼，似乎在再次提醒我；然後同一時間，我也感受到Judy那刺人的視線。
 
唉，為甚麼我的大學生活剛開始就是這個模樣。