[陳子鋒系列] 大學入學篇: （十五）O-Day（6）

「彼德，彼德，你喺邊呀？」
 
「安德烈，我喺度，到底發生咩事？」
 
「我都唔知，淨係知道突然眼前一黑，本來以為係停電，但呢種令皮膚刺痛嘅感覺，唔係咁簡單。最重要係，其他人好似唔見晒咁。」
 
「我哋都係離開呢度先啦，再喺度等都唔係辦法。」
 
安德烈正想回應的時，突然感覺到有點不對勁。
 




「咪住，等等先。」
 
「你做咩呀，快啲離開呢度先啦。」
 
「唔係，有啲唔妥。」
 
安德烈被彼德催促的同時，剛剛那股異樣的感覺漫延至全身，就好像在內心深處，有甚麼警告着安德烈一樣。
 
「你係咪唔舒服呀，嚟啦，捉住我隻手，我拉你出去。」
 




彼德說話同時，安德烈仿佛在黑暗中，看見了彼德的右手。
 
然後安德烈便反射性地伸出右手，就在快要觸碰到彼德之際，突然一把熟悉的聲音在他腦內響起。
 
「安德烈！主禱文！」
 
「阿爾先生......」
 
安德烈在心中默念起主禱文，在他眼前的右手，突然變成暗紅色，指甲亦變化成發亮的黑色，那是魔鬼的姿態！
 




「哦，發現咗啦？」
 
在身份敗露的同時，魔鬼的右手已然抓住了安德烈。
 
如果只是低階的魔鬼，安德烈絕對能夠應付，但在雙方接觸到的瞬間，安德烈本能地明白，眼前的魔鬼，並非他能應付的對手。
 
黑暗的力量猛然侵蝕着安德烈的身軀與心靈。
 
「安德烈，你以為自己真係主耶穌嘅第一個門徒嘅後代咩，只係因為你容易擺佈，拉斐爾先會將你放喺身邊。」
 
「你自以為引領咗好多人去認識主耶穌，但入面有好多都係魔鬼嘅門徒，你只係將一個個嘅炸彈送去主耶穌面前。」
 
「安德烈，你嘅存在連一個非主耶穌嘅門徒都比唔上，就連你最敬重嘅拉斐爾，佢都係重視陳子鋒多過重視你。」
 
一句又一句的話語，都準確地攻擊着安德烈內心脆弱的部份，慢慢污染他的精神。




 
「安德烈，你，只係一個小丑，一個連普通人都比唔上嘅小丑。」
 
「呀～～～～～」
 
安德烈大嘁同時，他的眼眶，皮膚開始泛紅，有甚麼東西正在他體內萌芽。
 
而正在享受着安德烈咆哮聲的魔鬼，卻突然放開了抓住安德烈的右手。
 
只見安德烈突然停止了咆哮，身體發出強烈的光芒，而這正是拉斐爾的光芒。
 
「晨星，神嘅門徒唔係你可以隨便玩弄！」
 
「拉斐爾，又係你？上次放過咗你同個女仔，依家又嚟阻頭阻勢。」
 




「只要你一日與神為敵，我就會繼續阻止你。」
 
「阻止我？就憑你呢種不完全嘅附身方式就想阻止我？」
 
「你將力量分成兩邊，仲想虛張聲勢？」
 
拉斐爾和晨星互相對望，誰也不打算退讓。
 
「哼，的確，依家未係時候對付你，安德烈就還返畀你，至於另一個邪惡嘅存在，就由我接手！下次再見面，我會將你同米迦勒一次過殺死！」
 
放下狠話的晨星，化作一團黑霧消散，安德烈身處的空間亦像玻璃般破裂。
 
「晨星，如果可以，我實在唔想與你為敵。」
 
拉斐爾抱着昏倒的安德烈，慢慢走向LT401，與黃炎冰集合。




 
「拉斐爾，安德烈佢......」
 
「佢無事，只係精神稍為受到污染，休息下就無事。」
 
「Multi ABC啲人點呀？」
 
「暫時無事，應該全部失去咗意識，只要陳子鋒成功擊退晨星，佢哋醒返就會無事。啱啱我再同晨星稍為對峙過，佢嘅力量比之前更強，你真係認為陳子鋒可以贏？」
 
「佢會贏。」
 
「好，就等我睇下，陳子鋒到底係咪真係有能力去對付晨星。」
 
兩人默默在LT401坐下，等待着陳子鋒的歸來。