[陳子鋒系列] 大學入學篇: （二）木人巷（1）

「喂，做乜鬼搞咁耐？」
 
男生從登記處離開後，一名女生滿臉不耐煩地看著他。
 
「唉，無呀，又係啲麻煩嘢囉，陣間再同你講。我想問登記完之後通常會去邊？」
 
「新生登記完之後會去出面嗰個木人巷度被學會Sell下咁囉。」
 
「木人巷？」
 




「係呀，頭先你上嚟咪見出面有個位被啲白色圍板圍住嘅，入面呈S字型，得一條通道。基本上所有學科聯會同屬會都喺晒入面，如果你想報迎新營或者參加屬會，行一次基本上就可以做晒。但因為入面得一條路，啲新生會不斷受到拉客攻擊，就好似入咗木人巷咁，所以我哋都習慣叫呢度做木人巷。」
 
「咁啫係會好多人聚集？」
 
「咁梗係啦，我諗至少有七成嘅新生登記完之後都會入去木人巷。」
 
「唉......咁就煩啦，我哋快啲入去啦。」
 
「煩？究竟發生咩事？」
 




「一路行一路講，入咗去先。」
 
男生沒有直接回答，只催促女生帶路，而女生雖然臉有不悅，但仍然乖乖地前行。
 
兩人從登記處慢慢走去木人巷的位置，而這一切，剛好被輪候在後面的一位同學。
 
「同學，呢邊係大O迎新營，想認識更多唔同學科嘅人，就要揀我哋嘅迎新營啦。」
 
「水會報名呢邊，飛魚嘅你哋快啲過嚟參加啦，我哋好多靚仔靚女㗎！」
 




「有興趣觀星研究天文嘅，快啲埋嚟啦，睇星嘅時候話唔定搵到同你星座夾嘅朋友㗎！」
 
「喂，附屬學會嘅唔准走出嚟拉客，快啲入返去你哋個攤位度。大O嘅都一樣，你哋已經排頭位，唔好再放啲Banner出嚟阻住其他人。」
 
剛好避開了登記處的混亂，並來到入口處的陳子鋒，看著熙來攘往的人群，忍不住嘴角上揚。
 
「新生同在校生聚集，簡直係慾望嘅聚集地。唔錯，唔錯！」
 
陳子鋒邊笑邊前進，神奇的是，明明在這樣密集的地方下，依然能輕鬆地在人群中行走著。
 
而旁邊的人仿佛看不到他一樣，全然沒有嘗試勸誘他加入學會或迎新營。
 
「唔係，唔係你。唔係你......明明應該有先啱㗎？」
 
陳子鋒觀察著四周，邊前進邊掃視每一個人，像在尋找著甚麼似的。




 
走完了第一條巷後，陳子鋒拐彎進了第二條巷子，在走到一半的同時，突然有一把女聲響起。
 
「同學，你讀邊科㗎？」
 
陳子鋒聞言停下了腳步，指了指自己。
 
「係呀，我問緊你㗎，你讀邊科㗎？」
 
陳子鋒聽到後嘴角上揚，心中想著「搵到你啦」。
 
「我讀BBA Marketing。」
 
「咁啱晒啦，你係咪搵緊我哋個攤位呢，呢邊就係啦。快啲過嚟，等我同你介紹下我哋學科同O Camp啦。」
 




這名熱心的女生，向陳子鋒招了招手，邀請他到攤位旁。
 
「好，好呀！」
 
陳子鋒臉上雖然掛著笑容，但有種讓人心寒的感覺，但女生好像絲毫沒有察覺，開始為陳子鋒進行著講解。