不如我地一齊跑愛情長跑？: 夜空中最亮的星

「搞錯啊，遲咗兩個鐘啊你！」Doris和Cathrine起哄道。

「Sorry囉，塞車遲左。喂陳芷欣，咁耐冇見，你感情有冇咩新進展啊？」剛踏進K房的Cherry笑笑口望著我。

「咪又係咁，你知我讀嗰科女人多㗎。」我訕笑。

今日約咗半年無見嘅中同唱K。俗語話三個女人一個墟，何況四個？每次見面都講八卦，各自感情狀況走唔甩，其中又以我為話題中心。因為其餘三位都出咗pool，而且今年畢業都搵到穩定工作。唯獨我，大學讀到第四年依然無聲氣，雖然課程編排緣故仲有兩年先畢業，可惜圈子女多男少。女人之間嘅比較，無非男人、名牌同身材。雖然大家老友鬼鬼，但相形之下難免有啲失落，所以拍拖一直係我避而不談嘅話題。

「不如試下交友app啦！你揀啲冇咁多人約炮嘅咪得。」身邊不乏追求者的Cathrine興致勃勃地建議。





「係啊。反正武漢肺炎有排都未完，你咪當消磨時間囉。」

「咁啊，我試下啦。不過你地幫我揀相得唔得？我冇咩相好見得人。」專業學位學業繁重，呢幾年我埋首學業，哪有時間出去chill同影靚相吖。打開電話相簿，似乎來來去去都係風景相同出placement嘅工作照。諗深一層，咁耐唔拍拖，可能係關兩年前一段霧水情緣事。可能係我一直未放低愧疚掛⋯⋯

「就咁話啦！嚟，比我地睇下你有咩相先！」八卦果然係女人嘅精神食糧，佢地即刻圍爐埋首，七嘴八舌幫我揀相。而我喺隔離靜靜拎起咪高鋒，唱起下一首歌。

夜空中最亮的星，能否聽清，那仰望的人，心底的孤獨和嘆息？我祈禱擁有一顆透明的心靈，和會流淚的眼睛，給我再去相信的勇氣。

希望緣分可以帶領我遇到對的人啦。如果有咁樣嘅人出現，我一定會好好珍惜佢。