野性呼喚: 第一百一十七章 ： 蠢蠢欲動嘅野性
Julie向我提出借XX俾佢一晚，呢個咁荒謬嘅要求，我有啲愕然，正如師姐評論佢做嘢有部署，我唔知佢用意係咩，純粹講笑，定係為佢計劃嘅下一步鋪路。
我最怕佢係呼應番之前話睇到van仔嘅艷事，暗示要將XX 作為同我保密嘅交換條件。
不過Julie無再進一步講明，我唯有見步行步。
我之前講過，喺結婚前，接受XX同Julie來往，其他人睇落亦都係好荒謬，不過我要嘅原因。
我同van仔糾纏咗咁多年，我內心對XX非常歉疚，XX同Julie曾經有過非比尋常嘅關係，接受佢哋繼續交往，可以當係對XX嘅補償，同時亦都表示我對XX嘅信心。
⋯⋯⋯⋯
XX話想招呼三幾個生意客户上嚟屋企玩，問我同唔同意，我一向都遺憾自己不善應酬，朋友少，又點會反對佢正常嘅社交來往，況且佢工作上嘅應酬，我一定會全力支持。
同XX一齊生活以嚟，習慣咗無拘無束，而加係第一次陪佢招呼客戶，唔想有咩失禮嘅地方，我有壓力。
“唔使咁緊張，我諗住喺花園燒烤，唔使你咁辛苦，煮咁多嘢。”
XX講得好技巧，我諗佢怕我要親自下廚煮飯嚟招呼佢啲客，就話唔想我辛苦煮飯，哈哈，佢可以放心，就算佢要我煮，我都會拒絕，因為我一定會搞到一團糟。
不過我呢幾個月不停惡補烹飪，到而家都不至於乜都唔識，我打算發揮我有限嘅廚藝，焗一啲我失敗過好多次，終於叫做逸強見得人嘅曲奇，同迷你芝士腸仔包，再訂購一啲party小食，燒烤前嚟一個cocktail party嚟招呼佢哋。
跟住幾日，我忙於做準備功夫，買食物、飲品，清潔地方，整理屋企嘅裝飾擺設。
⋯⋯⋯⋯
為咗人同狗狗都有大一啲嘅居住空間，早幾個月，我哋搬咗屋，新居有個好大嘅花園，每日狗狗都喺度玩。
平日要返工，無乜點打理個花園，今次就要花好大體力去整理。
呢幾晚半夜都扎醒，擔心自己有嘢遺漏，要走出睡房去點算吓先安心。
XX講過好幾次，嚟探我哋嘅都係佢合作好耐嘅客戶，大家已經十分熟絡，叫我唔需要緊張。
佢雖然咁講，但係我又點會因一句說話而放心落嚟。
⋯⋯⋯⋯
星期日一早，未夠七點我已經醒咗，我輕輕推開攬住我嘅XX，先一晚佢藉口話同我減壓，我做緊最後檢查，佢都硬拉我上床，見佢情緒好高漲，我雖然唔係咁想做，都盡力去滿足佢。
XX惺惺忪忪跟我起身幫我手做準備，佢平日咁忙，唔想剝削佢瞓覺時間，而且我覺得將屋企打理得井井有條，係女人嘅責任，我呃佢話去廁所，叫佢瞓番。
我先帶狗狗出去花園同佢沖涼，吹乾同梳好毛，就換上一條新頸帶，等佢有個靚靚型象見客人。
跟住我入廚房開始焗俾客人做點心嘅曲奇同迷你麵包，經過之前好多次失敗，今次係第三次嘗試到製作成功嘅喜悅。
⋯⋯⋯⋯
我剛剛喺花園set好咗個燒烤爐，Julie已經嚟到，XX邀請嘅客戶，其中一個竟然係Julie，佢比約定時間早咗少少，佢一身衣著同早前落吧差唔多，低胸露腰背心配超貼身運動褲，性感得嚟突出佢修長高挑身型。
喺佢身邊仲有兩個外國男仕，XX逐一同我介紹，短短分零鐘，Julie同呢兩個男士互相調笑，熟不拘禮，兩個外國男士對Julie就更加肆無忌憚，不停取笑佢，喺佢面前大講鹹濕笑話，Julie毫不示弱，周不時向幾個男士反攻。
XX事後同我講，呢兩個男客戶係Julie介紹俾佢，合作咗一段時間，趁搬新屋，招呼佢嚟玩。
XX帶佢哋簡略參觀吓我哋屋企，我好似跟班咁喺佢哋後面，坐返低之後，我就將啲曲奇、預訂嘅party小食通通搬晒出嚟。
"C，啲曲奇一定係你嘅傑作！"
Julie見到啲曲奇，就估到係我做嘅，原因好簡單，因為我技術未到家，唧啲粉漿出嚟嗰時，形狀控制得唔好，啲曲奇形狀唔係咁完美，一眼睇落就知係自家製作。
我唔識佢哋公司業務、生活圈子又有差距，再加上我英文唔似XX同Julie流暢，佢哋傾偈，我只可以一直坐喺旁邊做陪客，間中回應一吓佢哋向我嘅提問。
佢哋飲完一輪紅酒，食咗一輪小食，就開始佢哋喜愛嘅橋牌牌局。
"係啦，你在場佢哋好拘謹㗎，哈哈。"
我陪咗佢哋一陣，XX見我無聊坐喺度，叫我休息一陣，佢哋打完橋牌先開始燒烤，Julie聽到XX叫我入房休息，佢眼望住旁邊兩個男士，講笑咁講。
佢講完仲刻意挺起個胸，引到兩個外國男士哈哈大笑。
⋯⋯⋯⋯
我走番入房，終於可以放鬆一吓，搵皓皓傾偈，可惜講唔夠十分鐘，佢就話趕住出街。
無無聊聊咁碌下手機，重溫吓我同XX影嘅相，時間過得好慢，無意間摸吓條頸鍊，呢幾日我換咗van仔送俾我個吊墜，嗰日佢提醒咗我，數起日子，呢日應該係我同佢認識第五年零七十日，上次我推咗佢，無同佢食飯，唔經唔覺，又過咗兩個幾月，到而家仲未安排到幾時可以同佢食飯。
"做緊咩？"
我一時好奇，唔知佢做緊咩，send咗個message俾佢。
"悶撚到癲！"
佢即刻覆我。
佢話佢無乜order，下晝返咗寫字樓，一個人喺度做啲文書工作。
佢selfie咗張相俾我，佢周圍真係一個人都無，好寧靜。
佢而加兼顧內外，日頭照舊送貨，到黃昏或者夜晚七點零鐘，視乎佢自己安排，就趕返去寫字樓做案頭工作，都幾辛苦。
佢話唔介意做多啲嘢，不過就唔習慣曰日要坐喺寫字樓啫。
“我猛講我啲嘢，咁你而加又做緊乜？”
佢轉咗用電話同我傾。
“咪同你傾緊偈囉！哈哈。”
我捉佢字蝨。
“其實我真係無嘢做，淨係專心同你傾偈咋！”
我正經向佢解釋。
“咁過嚟陪我一齊做嘢囉。”
“唉，行唔開呀！”
我嘆咗一口氣，如果行得開，我真係想去搵佢，起碼無同XX啲客咁拘束。
“大家都咁悶，不如視象傾啦，可以見吓你。”
我都未同意，佢就轉咗視象。
“睇吓。”
咁我都想見吓佢嘅，我解開頸頭兩粒鈕，影住佢送俾我嘅吊墜，等佢知道我重視佢送俾我嘅禮物，事實上呢排我日日都戴住呢個吊墜。
“我想睇你解開多啲`衫鈕，哈哈！”
“好吖！哈哈。”
van仔勾起我同佢玩到癲嘅回憶，既然咁悶，不如同佢玩吓，我解開衫腳兩粒鈕。
“多幾粒啦。”
van仔知我同佢玩。
我扮猶疑一陣，在慢慢解開晒所有衫鈕，不過解開唔代表打開，我解開哂啲衫鈕，手仍然緊緊捉實件衫，一啲都無露出胸前俾佢睇，接住我即係扣好番所有衫鈕添。
“你小腹收緊晒，好fit！五年零七十日喇！”
正話解開晒衫鈕，van仔留意到我小腹收緊咗，呢啲係我近來搏命做收腹運動嘅成績。
佢同我講完笑，好正經咁回應返正話我俾佢睇我戴住佢送俾我個吊咀，估唔到佢每日都數住我哋認識咗幾耐。
“一千八佰幾日喇，真係快！”
我好快咁回應佢，證明我都深刻記住同佢嘅日子，呢千幾日發生過好多事情，令人好感觸。
“做咩？”
見到Van仔眼定定咁望住個mon。
“唔好郁，擺定個鏡頭，等我睇清楚你！”
“有咩好睇啫。”
佢咁講令我有啲面紅。
“記得我哋做過咩？”
Van仔咁問我，我以為佢講嘅係我同佢喺佢屋企、喺澳門、喺小海灘做過嘅情事。
點知佢講番起一啲我同佢一齊經歷過嘅瑣碎事，雖然好細碎，完全唔重要，但佢將當時我哋嘅心情，無論開心唔開心，都重複得好仔細，有啲事情如果佢唔提番起，我真係忘記晒。
van仔呢份人就係咁，同佢相處，表面上佢顯得好粗疏，但係佢內心就真係好care你。
好開心同佢傾做嘢、生活近況，間中講吓笑，忽然聽到Julie佢哋好嘈嘅笑聲加叫囂聲，唔經唔覺同佢傾咗成個鐘頭。
“快啲做完嘢，早啲返去陪Gigi啦 ！”
我同van交代一聲，跟住走出去，睇吓發生咩事。
XX佢哋四個人轉咗玩board game，玩到興高采烈之時，Julie不停高呼大叫，仲挨晒落兩個外國男士身上面。
今次見Julie同平日冷傲嘅外表好唔同，佢好熱情豪放，佢酒量竟然咁好，可以陪住幾個男仕，一面玩，一面飲。
“嘈醒咗Sleeping beauty添 ！”
Julie以為我正話喺房瞓咗。
我身為主人家之一，唔好意思長時間匿埋喺房，於是就坐喺佢哋旁邊做陪客，幫佢哋斟茶遞水，開紅酒，間中又出花園同狗狗玩吓，順便回覆van仔不停傳送過嚟嘅message。
隨著住酒越飲越多，board game玩得越嚟越激烈，Julie就越嚟越豪放，佢索性坐咗喺兩個男士中間，玩得性起，就攬住兩個男士親吓嘴，拍吓佢啲大髀，兩個男士亦都唔客氣，乘機摸吓佢露出嚟，纖幼嘅腰肢，XX就一臉無奈。
呢兩個男士對Julie非常著迷，夜晚燒烤嗰時，不斷喺佢身邊團團轉，大獻殷勤，飲到半醉嘅Julie亦毫不吝嗇，不停向佢哋派福利。
Julie雖然酒量好，但係都有飲醉嘅一刻，當佢已經語無倫次，XX借意攞走佢杯酒，同時俾咗個眼色我，示意叫我帶走Julie。
我藉口要Julie幫我準備甜品，就拖咗佢返入屋。
“帶Julie入客房，叫佢唔好再出嚟，詳細一陣再同你解釋 ！”
我剛扶Julie喺梳化坐低，XXsend咗個message俾我。
我照XX意思同Julie講，佢唔係咁願意，但最終都跟咗我入客房。
之後我攞埋啲甜品返出花園。
“Julie醉咗？”
XX走埋我身邊，好大聲咁問我。
我點吓頭，配合佢做戲。
XX跟住同兩個外國人解釋Julie飲醉咗，打算留低佢喺度過一晚。
佢哋雖然有啲失望，但無可奈何，食咗少少甜品，陪XX傾多一陣，就起身離開。
“我唔放心Julie跟佢哋走 ！”
送咗兩個客人上車，XX同我解釋。
“不過你都唔可以永遠阻止Julie同佢哋交往喎 ！”
XX顯示出對Julie嘅微妙關心。
“我明白，最低限度，我唔想佢今晚跟佢哋返酒店 ！”
“同兩個鬼佬？”
我好詫異，同兩個男人？！
“佢好傻！”
XX嘆咗一口氣，敲門入咗客房同Julie傾，我呆呆咁企喺門口等佢。
我明白XX對Julie只係出於關心，無論如何心裡面都湧起一股醋意，唔係咁好受。
“你唔要我，就唔好理我同邊個一齊，對我嚟講，只要唔係你，其他所有人都係同阿豬、阿狗無分別，我將我個身體交俾邊個都無分別 ！”
佢哋傾咗好耐，Julie越嚟越激動，大聲到我喺門外面都聽得好清楚。
靜咗一陣，Julie都冷靜咗落嚟，佢哋似乎討論緊一啲嘢咁，不過完全聽唔到佢哋討論啲乜，無幾耐XX咩終於返出嚟。
“幫我忙，搵啲衫俾Julie，好唔好？”
XX托起我個頭，錫下我個面。
我攞咗一套新睡衣入客房，見到Julie面上邊仲有淚痕。
⋯⋯⋯⋯
我默默收拾花園，XX埋嚟幫我手。
“你不如入去安撫吓Julie，呢度等我善後啦。”
XX係重情義嘅人，佢唔放心Julie，但又怕我誤會，而家夾喺我同Julie之間，我無謂難為佢，所以我先開口，等佢安心去開解Julie。
XX好夜先返入房，佢件衫膊頭位置濕咗，可以聯想到Julie伏喺佢膊頭度喊。
佢攞咗我幫佢準備嘅乾淨浴巾，就走入浴室。
“Julie考慮，同佢移民咗外國嘅爸爸媽媽團聚。”
XX無刪浴室門，佢一面沖涼，喺浴室裡面嗌出，向床上面嘅我講。
“幾時返去？”
早前同佢見面，佢都有同我講過，唔同嘅係，當時佢似乎已經決定咗，而唔係考慮緊。
XX無即時回應我。
佢好快就沖完涼出嚟，坐埋梳妝枱前，
我走落床，攞走佢手上面風筒，幫佢吹乾啲頭髮，佢透過梳妝鏡望住我。
“遲啲佢生日，想我同佢慶祝。”
XX卻言又止咗一陣，佢終於鼓起勇氣同我講。
“兩個人？我可唔可以參加？”
“唔知係咪兩個呀！”
XX無正面回應我可唔可以參加。
如果係一班人同Julie慶祝，XX唔駛猶疑咁耐先開口，我諗佢哋正話喺房裡面已經傾過，XX應該知道只係佢哋兩個人慶祝，但係佢唔敢承認。
Julie好可怕，我諗佢一早已經計劃好，上次同我講要借用XX一晚，佢唔係徵詢我，只係要挑戰我有無能力阻止佢。
佢約兩個客戶同XX聯誼，當住XX面同佢哋親熱，應該係佢計劃嘅一部份，目的係刺激XX，挑番起佢哋之間嘅舊情。
⋯⋯⋯⋯
個幾星期以來，我哋再無提起Julie，但係唔代表忘記咗同Julie慶祝生日呢件事，唔單止我，我知道XX都默默將呢個日子記喺心裏面，Julie嘅心理戰成功咗，呢幾日我同XX之間好似少咗一絲坦誠，互相多咗一絲顧忌。
有一朝，XX輕描淡寫同我講佢放假，夜晚都唔返嚟食飯，要嚟嘅日子終於嚟咗，不過係好事嘅，唔駛日日有啲嘢喺心裏面掛住。
我相信XX唔係三心兩意嘅人，接近一年前，佢經過深思熟慮做咗嘅決定，我唔相信佢咁快會改變。
「幸福嘅一日啱啱開始，XX佢好開心，多謝你嘅慷慨！」
Julie 一早就send咗張同XX喺酒店餐廳食早餐嘅相俾我，佢笑得好燦爛，係勝利嘅笑容，笑我制止唔到XX同佢一齊。
我心裡面好似有嘢壓住咁，我之前仲以為自己可以好大方，可以任XX同Julie交往，但係到事情發生，就唔係好似自己所想咁輕鬆。
Julie成朝不停咁update佢同XX嘅行蹤，每張相、每個message都強調XX有幾開心，我每次睇完佢啲相或者message都會感到失落。
我不停同自己講，呢啲係Julie嘅策略，佢只係想我唔開心，我越唔開心，佢就會越成功，但係情緒始終係情緒，我想控制但係做唔到。
“我今日工作好忙，你唔需要再update有關你同XX嘅節目喇。”
當我睇到Julie 傳送俾我嘅相，佢挨係XX胸前，XX喺後面扶住佢條腰，我竟然回覆咗佢。
“我只係想同你分享我同XX嘅喜悅啫，哈哈！”
Julie即刻覆我。
我知自己好愚蠢，剛才等於向佢承認咗失敗。
Julie無因為我嘅message而停止，只不過佢知道已經贏咗我，佢嘅message亦都無send得咁密，但係挑釁性就越嚟越強。
我討厭Julie不停咁update我，我甚至軟弱到唔敢俾message XX，怕佢話我小器，當Julie嘅message減少落嚟之時，我又不停猜估佢哋呢一刻做緊乜，成個人好煩躁好落寞。
希望呢一日早啲過去，XX可以快啲返到我身邊，但係時間過得好慢，直至van仔送貨嚟到。
我好悶，想佢陪吓我，況且之前我答應過佢一齊食飯。
近來我公司交俾佢哋運送嘅貨物，無論數量同體積都減少咗，門口接待嘅同事接收咗，van仔就可以離開，無需要經過寫字樓，搬啲貨入貨倉。
我聽到佢喺大門口同接待嘅同事交收緊，就急急趕出去截停佢，叫佢入嚟我度。
“今晚陪我食飯得唔得？”
上次佢突然邀請我，我拒絕咗，今次輪到我無預先通知，就想佢陪我食飯。
“唔得就下次先啦！”
van仔有啲猶疑，佢而家夜晚要返寫字樓做一啲行政工作，我唔想強佢所難。
“可以嘅！”
佢唔想我失望，一口答應。
佢仲有兩個行程，叫我等佢，佢轉頭返嚟接我，我唔想佢太花時間，提議係餐廳等佢。
“不如你跟我車，之後買嘢想我寫字樓食，唔知你介唔介意啫？”
我坐過van仔架貨van好多次，但從未試過陪埋佢一齊做嘢。
“我係你第一個女性跟車，哈哈！”
我知道貨運有「跟車」呢個職位，van仔之前，負責送貨間公司，司機只係揸車，貨物運送係由「跟車」負責。
點知van仔講我唔係第一個，乜咁多女仔鍾意做呢啲粗重嘅嘅咩。
⋯⋯⋯⋯
van仔間寫字樓好細，擺咗三張寫字檯，佢而家係主任，其中一張係佢工作用嘅，另外兩張長嘅摺檯，就係一班司機每日出車前，喺度整理訂單嘅地方。
佢喺茶水間攞咗啲餐具出嚟，我怕妨礙佢做嘢，堅持佢做完嘢先。
我坐喺佢旁邊，了解吓佢哋點運作。
“係咪想做嘅老闆娘呢？”
“我無咁肥呀！”
van仔形容佢老闆娘做肥婆，可想而知佢體重唔輕。
“第日我做咗老闆，你可以做老闆娘喎，哈哈！”
“我無咁嘅福氣啊，留番俾Gigi啦！哈哈。”
“呢個客房套餐萬零蚊，一晚double bed room加兩位晚餐！”
我同van仔講緊笑，Julie俾咗個message我，無上文下理，只係講個酒店客房套餐價錢。
呢個係佢慣常作風，以前喺face book係咁，而家又係咁，佢想俾我一個想像空間，我雖然了解，但個心仍然俾佢刺中咗。
“咩事呀？唔好咁啦！”
van仔見到我情緒突然間一百八十度轉變，佢知道有事發生，我積壓咗幾日嘅鬱悶終於爆發出嚟。
“同條仔有關？”
我點吓頭。
van仔嘆一口氣，只要同XX有關，佢知我好保留，所以沒再多問，淨係細心同我抹眼淚。
“呢兩年幾以嚟，你唔單止疏遠我，對我越嚟越防範，係咪因為我影響都你同條仔嘅關係？如果係，我就大撚罪！”
van仔講出佢心裡面嘅說話。
“唔好咁講，唔關你事㗎！”
我怕佢誤會。
我對van仔好內疚，自從佢認識咗我，一直無條件關心我，我有咩困難，佢都義不容辭咁幫我，相反，我就好似利用緊佢咁，我寂寞嘅時候，就搵佢解悶，之後又積極避開佢。
“年幾前我已經估到你哋有啲唔妥，不過你唔想講，我亦都唔敢問，到底你哋係咪搞緊大鑊？”
“已經過去咗！”
“咩話？！你同條仔散撚咗？”
van仔誤會咗我意思。
佢咁關心我，我唔應該再隱瞞佢，不過件事咁長篇，我只係好簡略同佢講。
“van仔，呢幾年我好對你唔住，你對我咁好，但係我就只係利用你，我疏遠你，因為我真係喜歡你之時，又怕對我男朋友唔住，我唔知點做好，唯有逃避你！”
“你喜歡我就乜都無問題，我保證過啦，我唔會破壞你同你條仔嘅關係，我哋而家已經咁少機會喺埋一齊，我哋應該珍惜呢啲機會，同我一齊嗰時，放低你條仔，開開心心同我過一兩個鐘，好唔好？”
Van仔令我迷惘，如果照佢所講，我要放低所有嘅道徳規範，之前所壓抑嘅將前功盡廢。
Van仔無俾時間我考慮，佢搭住我膊頭，我好自然就依偎住佢。
“無謂諗你條仔同條女咁撚多，食啲嘢先啦。”
Van仔扐住買嚟當晚飯嘅雞髀，遞埋我口，我一啲胃口都無，不過係我叫佢一齊食飯嘅，如果自己乜都唔食，就令van仔太難受，我就咬咗一細啖。
而加過咗正常晚飯時間好耐，van仔已經好肚餓，我咬完一啖，佢就大大咬咗一口，又將雞髀送埋我嘴邊。
“我唔想咁早返去，可唔可以俾我留低到夜一啲？”
XX可能唔返屋企，我唔想一個人孤獨喺屋企。
“你條仔擺盟車馬攪通頂？屌，幾夜都好，我陪你！”
我怕影響Gigi，要佢走先，但係van仔堅留低。
佢帶咗我入佢哋司機休息室，裡面有一張雙座梳化同茶水，可以俾我喺度唞吓。
“你唞一陣，我做撚埋啲嘢再人嚟。”
Julie全日以嚟，無論食緊嘢，行緊街，唔到一個鐘頭就俾一個message我，而加過咗兩個鐘，仲未見佢嘅message，唔通佢哋已經上咗酒店？佢唔會顛到上緊床都send相俾我嘛。
XX同Julie纏綿嘅影象不停喺我腦度出現。
“仲掛住條仔？”
隔咗一陣，van仔沖咗兩杯茶入嚟，張梳化好細，佢迫埋嚟，坐喺我旁邊。
我將XX同Julie嘅事講埋俾佢知。
“唉，放心啦，佢最後都同番你一齊，佢唔會變心嘅，加上你又咁撚靚，男人出去玩一兩晚啫！”
Van仔不停講啲安慰我嘅說話。
“有時我懷疑，我係咪配唔起佢，Julie各方面都比我叻，佢哋先適合喺埋一齊！”
我覺得一對伴侶嘅長期關係，除咗有愛情基礎，其他生活上嘅匹配亦都重要。
“唔好諗咁多啦，起碼你有我吖，我點都會睇住你嘅！”
“呢兩年好彩有你，多謝你呀！”
我衷心感謝van仔。
“呀~我忘記咗，我有嘢送俾你！”
一直想住Julie同XX嘅事，我幾乎唔記得有份禮物要送俾van仔。
我喺手袋擺咗隻古銅色、磨砂硬手鈪出嚟，我拉住佢隻手，同佢戴上。
呢隻手鈪係回報佢送俾我嘅吊墜，更重要係感激佢將我記喺佢心裡面。
Van仔喜出望外，可能佢無想過我都會擺佢喺心上啦。
佢好開心攬住我，錫我。
我由得佢，不過唔使我制止佢，同佢錫一陣，Gigi已經打電話俾佢。
“返呀，不過正話攰得滯瞓著咗，好彩你電話叫醒我，我做埋啲嘢就即刻返！”
我趁佢同Gigi講嘢嘅時候，用紙巾幫佢抹乾俾佢錫到濕晒嘅嘴唇。
“唔好啦，我無心情呀，你返屋企啦，Gigi等緊你。”
Van仔講完電話，又攬番住我，仲想除我衫，今次我真係制止佢。
佢知道我無mood，但係都摸咗我一陣先肯放開我。
如果我唔離開，van仔點都唔會自己一個人走，就算唔想，都只好返屋企，van仔想送我，我唔想阻晏佢返去，就自己叫車走。
XX兩點幾先返到屋企，佢一入房，我已經聞到淡淡嘅香水味，顯示成日以嚟，佢同Julie有頻密嘅身體接觸，我背向住佢，我唔知同佢講咩好，唯有扮瞓著咗。
“Julie好快要走喇！”
XX沖完涼，佢瞓上床，估到我係扮瞓，佢都向我講，可能想話俾我知，因為Julie就快遠離，所以先同佢相聚，不過我聽到佢充滿依依不捨嘅語氣。
⋯⋯⋯⋯
撇除工作上面嘅接觸，雖然次數唔頻密，但每逢XX私下同佢見面，Julie都會瞞住XX，用各種方法知會我，佢係不懷好意，目的只係想我產生妒忌。
嗰次同Julie慶祝生日，有同我講，之後佢哋有三幾次見面，XX無向我提起過，既然佢唔想講，我都咋唔知，橫掂Julie發放俾我嘅消息亦無乜大不了，XX同佢都係食餐飯，最多落吓吧啫。
自從van仔知道XX同Julie嘅事，佢一方面安慰我，一方面就頻密咗同我見面，亦都回復返每晚what's app我傾一兩句。
以為克服咗嘅內心野性，感覺上又蠢蠢欲動，令到我好恐懼。