野性呼喚: 第一百零二章 ： 我仲要傷害幾多人
“喺咪放埋假先返香港？”
同XX傾開，我順便問佢。
“係呀，不過一切未有定案！”
仲未有定案，Julie成個月前已經喺佢face book宣布晒啦。
“視像傾好唔好？”
XX要求我，佢唔俾我回覆好定唔好，已經俾視頻通話我。
除咗近來互傳相片，但都係硬照，可能佢都想見吓我啦。
我對上一次見佢，係佢借調去總公司之前，時間上已超過一年。
咁耐無見，雖然隔住個mon，第一眼見到佢，我情緒好激動，控制唔到眼淚，完全出唔到聲。
“C，⋯⋯”
佢叫我之後亦都哽咽起嚟。
接近十分鐘，我哋情緒先平伏落嚟。
“你好嗎？”
我眼淚仲未流完，又高興到笑起上嚟。
“你憔悴咗！”
我唔敢同佢講，呢一年我經常失眠，有時諗吓自己將來，諗吓佢，思潮起伏，要借助安眠藥先瞓到幾個鐘頭。
估唔到佢第一眼見番我，對我評價係我好似個「搲烏婆」咁難睇，我嚇到即刻擰轉身，唔想俾佢見到我。
我慌忙失措到唔記得我係揸住手機同佢講嘢，我擰轉身，鏡頭仍然係對住我呢個「搲烏婆」。
“咦～我係咪好肉酸呀？”
我「乸」起面口問佢，唔記得咗我已經「搲烏婆」咁，而加仲要眼耳口鼻走埋一堆咪更加難睇。
“傻女，仲係咁貪靚，你憔悴咗唔代表你唔靚！哈哈。”
佢雖然咁講，我仍然唔想俾佢睇得我咁清楚，又唔捨得唔同佢視像，唯有自己背住光，等個樣貌無咁清晣。
“見到你開朗番，我都替你高興！”
XX可能好事近，見到佢回復番以前嘅陽光氣息。
“期待兩個月後嘅來臨！”
XX滿臉期盼嘅表情。
我唔敢插口佢兩個月後同Julie嘅假期。
我有啲後悔個幾星期前send俾佢露後張相。
雖然XX唔係四圍拈花惹草嘅人，但係經過近排嘅通話，我相信佢對我嘅感情無減少過。
佢就快同Julie訂婚，如果我哋繼續咁聯絡，我怕我忍唔住會再次黐上返佢。
我自己介入咗van仔同Gigi中間，唔通又會介入埋XX同Julie中間。
對van仔我尚且決斷唔到，抖纏不清，何況係XX。
我傷害咗Gigi，而加又怕會傷害埋Julie，我係咪天生破壞人哋關係呢壞女人？想到呢點，我出咗一身冷汗。
⋯⋯⋯⋯
Van仔吃喝玩樂過活，縱使佢樂觀對待人生，都有高低潮，順逆境。
同珠女慶生後，個幾月嚟van仔都過得唔係太如意。
喺私生活，Gigi每晚煮飯、做家務、等佢放工，就好似一條無形嘅繩索將佢緊緊綁住，一向同佢玩開嘅朋友疏遠佢，背後取笑佢。
佢期望Gigi可以俾多啲空間佢，到佢願望成真，Gigi每星期都返佢阿媽屋企食飯，定期喺埋度過夜。
就輪到van仔班小妹妹唔理會佢，甚至連我都少見面。
..................................
喺公司，有個早佢一年入職嘅中年司機，佢平日已經對van仔冷言冷語，話佢奉承老闆娘，目的俾謀奪老闆娘間公司。
最近呢個大叔仲夾埋幾個新入公司做嘅司機，一齊針對van仔，孤立佢。
呢班人可能背後向老闆娘講van仔壞話，攪到老闆娘對van仔變得好冷淡。
有時老闆娘喺佢個位，斜眼望吓van仔，表情好似對van仔講：「抵你死」。
過往每個零月，van仔會約佢食一次飯，而家老闆娘都推辭咗，甚至連Gigi係佢契女，佢都唔關心吓、問候吓。
呢年多以嚟，我係處於人生低谷，喺寂寞失落嗰啲時候，van仔俾我好多支撐，而加大家雖不至於叫「同是天涯淪落人」，但係算得做失意，所以只要佢有咩唔開心，我一定會陪佢，安慰吓佢。
每次見到佢，佢除咗向我訴苦，佢仲想同我有進一步接觸，不過我越嚟越覺得咁做係對唔住Gigi，而且令我同佢泥足深陷，不可收拾。
所以我只係接受佢拖吓我手，擁抱吓我，其他再進一步，我都一律拒絕，即使佢失望，我都硬住心腸。
..................................
我啱啱重溫完同XX影嘅相，喺what's app同佢傾過嘅說話，已經接近一點，我接到van仔電話。
佢到咗我樓下，想見吓我，而家已經咁夜，我唔係好想落街，想喺電話同佢傾，但係聽到佢好失落，一定遇到好大挫折，我唔忍心佢一個人面對，於是答應佢。
"做咩你？！"
我見到佢滿身酒氣，一隻眼瘀腫晒，眼角貼住塊紗布，不過塊紗布鬆晒，又染滿血漬，我叫佢等我一陣，我返上屋企攞埋啲急救用品，喺佢架車度，同佢清潔吓傷口，換過晒啲紗布。
之後佢叫我扣好安全帶，準備開車。
"唔好揸車喇，我哋行去海濱公園傾吓啦。"
我怕佢醉駕之餘，更加怕佢好似之前咁，車我去海灘仔呢啲僻靜地方，我建議佢去附近海濱走廊行吓。
我哋一路行，van仔一路講今朝嘅發生咩事。
原來佢今朝俾針對佢嗰班人挑釁，佢沉唔住氣，同佢哋爭執起上嚟。
佢俾人打傷隻眼之時，佢亦都打傷其中一個同事。
"你收斂吓你啲脾氣啦，如果佢哋報警，蝕底嘅係你自己咋！"
我哋喺張長櫈坐低，我勸佢收斂一吓啲脾氣。
"呢度做得好無癮，我想轉工。"
佢埋怨老闆娘偏幫嗰幾個同事，佢做得好唔開心。
佢一路講，一邊伸隻手嚟拖住我。
"喂呀，佢係唔想將件事搞大，我諗佢係想𠱁住嗰班人，但佢哋唔好報警啫，你老闆娘都係為咗你好咋，而且同你講過啦，轉工對你無好處㗎！"
我諗老闆娘都係想息事寧人，我勸van仔，嘅然佢立心有自己公司，就應該好好哋跟老闆娘學吓點做生意，喺第二度搵唔返好似老闆娘對佢咁好嘅老闆。
"我好撚悶呀！"
van仔攬住我，我早前失落，曾經攬過佢，理解到俾人攬住，或者攬住一個信任嘅人，可以得到一份安慰，一份安全感，所以我由得佢攬。
不過van仔唔淨止攬住我，佢箍實我，錫我，隻手仲伸入我件衫裡面，愛撫我乳房。
我唔想佢咁做，我唔係怕咩蝕底俾佢，而係怕自己按奈唔住情緒，再一次同佢發生關係。
我明白到再同van仔繼續落去，我哋只會越纏越實，佢遲早放棄Gigi，到嗰時我點內疚都無作用。
我一隻手掩得住佢個口時，佢隻手就推開我個bra，好大力咁揸，我捉住佢隻手之時，佢個嘴又錫咗落我度，係咁伸條脷入嚟。
"上我屋企，Gigi今晚唔返。"
佢不停咁錫我，愛撫我，喺我耳邊遊說我。
我好辛苦先掙扎得開，我立即企起身，擺脫開佢，整理好自己啲衫。
"屌，而家係咪淨係你條仔屌得你呀？"
van仔好失望，佢失咗常性咁叫，凌晨時分，海濱長廊好靜，佢嘅叫聲傳到好遠。
一時間我感覺都好難堪，受到好大侮辱。
但係我睇吓佢，佢滿面通紅，我相信佢係一時酒醉，唔係有意侮辱我。
"你飲醉喇，聽我講，唔好再牛脾氣，唔好諗住轉工！"
不過佢正話嘅說話，更加令我下決心，以後唔再傷害Gigi。
"今晚唔好揸車，我同你call車返屋企，你聽朝再返嚟攞返你部van。"
van仔已經腳步浮浮，行都行唔穩，我扶佢行返出大路等Uber，佢仲想話先送我返屋企，我點都唔肯，等佢上咗車，架車開走埋，我先返屋企。
................................
過往我好細膽，好怕黑，今晚雖然沿途好靜，一個人都無，淨係自己街燈下嘅影子同腳步聲，但係我心境好平靜，只係考慮日後同van仔都應該少見面，自己諗辦法適應孤寂嘅生活。