野性呼喚: 第三十四章 ： 打情罵俏

今次游水前，我有啲心緒不寧，唔係咁想去游水，更加唔想上van仔屋企，但最後我都係輸咗俾自己，同佢攬攬錫錫，玩到過哂鐘。

不過我無得選擇，van仔一早講明唔上我男友屋企，而加比較夜，我又唔想帶狗狗返屋企嘈住屋企人，唯有上van仔屋企。

我乜都無準備，唯有同van仔分工合作，佢車咗我同狗狗返佢屋企，就即刻趕去竉物店買狗狗食嘅乾糧，我負責同狗狗沖涼。

狗狗好百厭，每次同佢沖涼都好似打場仗咁，今次都唔例外。

辛辛苦苦同佢沖乾淨，佢又掛住玩，未抹身就通屋走，我全身濕晒唔在講，連van仔間屋都濕埋。



Van仔返到嚟，仲未放低啲狗糧，見到狗狗喺度四圍走，成屋都濕晒，佢嚇一跳。

佢即刻幫我手追狗狗番嚟，踎低捉實佢，等我可以同佢抹乾個身，然後用風筒吹乾佢啲毛。

“唔好意思呀，搞到你屋企好似打完仗咁！”

我彎攣腰服侍狗狗，同時間向van仔道歉。

我講對唔住，佢好自然抬起頭望回應我。



“唔緊要，係我屋企細啫！”

van仔定晒眼望住我。

見佢眼神有啲唔妥，我先發覺，我件tee嘅領口啱啱喺佢眼前，正話趕時間，我就咁著返件tee，裡面乜都無。

人嘅心理好奇怪，剛才喺小海灘，同我佢攬過，同佢錫過，又俾佢摸過，同佢有好親密接觸，但而家喺燈光之下，俾佢睇到我對乳房，始終覺得有啲難為情。

不過我對自己嘅身形好有自信，唔介意俾喜歡嘅人欣賞一吓。



我拉吓件tee，收窄番個領口，繼續服侍狗狗。

van仔都好有風度，佢見我做得辛苦，一手搶咗個風筒，叫我坐一陣，由佢嚟服侍狗狗。

van仔喜歡動物，佢對狗狗好似對細路仔咁，一面服侍佢，一面同佢傾計，好好心機同佢吹毛、梳毛，足足搞咗個幾鐘頭，我靜靜哋坐埋一邊，望住佢，腦裡面竟然諗番起正話喺沙灘同佢一齊跳嘅情景。

狗狗乾乾淨淨，自己走埋去食乾糧，van仔就做到成身汗，我扐張紙巾同佢抹吓額頭，同個面。

成晚無食過嘢，依家靜落嚟，我同佢開始感覺到肚餓。

“我去賣……”

van仔正想落街賣啲嘢返嚟食，我個電話響起嚟，我知道係男友打嚟，有啲尷尬。

“我落街去賣宵夜，順便食口煙先翻上嚟。”



van仔好知情識趣，唔等我開口，交帶一聲，就離開屋企。

門啱啱刪埋，我驚男友等得耐，即刻接聽。

“喂，係呀….今晚咁夜，好多嘢做？……”

唔喺自己屋企，感覺私隱無乜保障，雖然而家間屋得返我同狗狗，我下意識都係一路傾，不自覺走出去騎樓，向住街，背住大門，中間又隔咗一個廳，無人偷聽到，感覺安全啲。

..................................................

“唔制，唔俾你睇，哈哈，同你一齊咁耐，仲未睇夠咩？”

"哈哈，唔制呀，過幾日你都返香港啦，到時我咪上你屋企囉！”



男友今次去回教國家出差，行程好枯燥，特別掛住我，我唯有安慰佢多啲，答應佢一返嚟，就去陪佢。

同緊男友講情慾說話嗰時，突然俾人從後拍一吓膊頭，van仔已經企咗喺我後面。

我掛住講電話，佢幾時返咗嚟都唔知，到底佢聽到幾多我同男友講嘅露骨說話。

"唔講咁耐啦，好掛住你呀，拜拜！”

van仔走返出去，我同男友傾多一陣就收線。

我無呃男友，每次佢出trip，第一日還可以，但第二日開始，我就會好掛住佢，感覺非常孤單同寂寞，如果可以，我真係想佢去邊，我跟埋去，日頭佢做嘢，我四周圍行吓，或者喺酒店寫吓故仔，一面等佢放工，咁我哋可以日日見。

但係諗深一層，我邊度會有咁多假期，就算辭咗份工，跟出跟入，但成日有個人跟住佢，佢喺同事面前，都會影響形象。

我出番廳，van仔已經攤開晒啲宵夜，一見到我，就即刻開啤酒。



“有無濕呀？”

我以為佢問同狗狗沖涼時，我件tee有無濕。

“濕晒呀！”

我直覺回答咗佢，先見到佢咪咪嘴，喺度奸笑。

“咁快濕晒？哈哈…..”

原來佢係笑我正話同男友講情慾話。

“喂呀，衰人！衰人！衰人！”



我面都紅晒，走埋佢度，打佢一吓，鬧一句“衰人”，打到自己手痛。

佢順勢攬住我條腰，一路狂笑，任我打。

“哈哈，我講笑咋！我同你道歉！Ok？”

我想掙扎，唔俾佢攬，不過佢係都唔放手。

“唔准搵佢嚟講笑呀！”

我好認真，越同van仔關係親蜜，越唔想佢攞男友嚟講笑，半句都唔想。

“對唔住呀！我好珍惜你呀！”

佢好真誠，好柔情咁講。

“我知！”

佢對我點，我唔通唔知咩。

佢見我唔再怪佢，就錫咗我塊面一吓，我無積極避開，佢就錫多幾啖。

“食嘢啦，肚餓喇！”

我推開佢。