野性呼喚: 第七章 ： 攞咗我電話號碼

 “喂，van仔，仲有無遲啲呀！”
 
唔知點解，van仔今日遲咗兩個幾鐘頭先嚟到我公司。
 
一入門口，我哋個主任就攔住佢，好大聲咁問佢做咩遲到。
 
平時佢哋兩個都有講下賭波，交換吓賽馬貼士，有時我仲見到van仔將嗰啲學生妹嘅相俾主任睇，兩個人咸感濕濕咁給聲講，大聲笑，所以估唔到佢會咁惡鬧van仔。
 
“塞車嘛，我想架咩。”
 


“塞車咪早啲開車囉，係咪唔想做呀？”
 
以van仔火爆性格，我驚佢會同主任嘈交，不過我唔出得聲，心急到幾乎喊咗出嚟。
 
“係嘅，係嘅，聽日一定早啲！”

我見van仔好似要發火，好彩佢望到我，突然改變晒態度，同主任道歉。
 
“靚仔，出嚟撈醒啲啦！”
 


主任得勢不饒人，教訓van仔一餐。
 
“係嘅，係嘅，尋晚溝撚咗條學生妹，佢send咗幾張露點自拍俾我，夜瞓咗啫！”
 
“係咪呢，塞車？我都話你遲咗出車啦，乜女嚟架？真係咁正？”
 
“梗係正嘢啦。波大樣甜！”
 
“張相喺手機？開嚟睇，開嚟睇！”
 


“哎吔，唔撚好意思，正話唔小心刪除咗添！”
 
“屌你，死靚仔。想玩嘢！細C，唔好淨係坐喺道，同條衰仔夾吓日後嚟收貨、送貨時間，如果再遲到，打電話去佢公司投訴佢！”
 
講完後，主任就一支箭咁走咗。、
 
我好失望，正話我仲替佢擔心，原來van仔佢真係掛住同啲學生妹玩，搞到唔知醒。
 
“抵你死！”
 
我點貨嗰陣忍唔住，嬲爆爆咁單打咗佢一句。
 
“咩抵我死呀！”
 
“睇埋啲鹹濕相，睇到遲到！”


 
“哦，依家幾點呀？小姐，唔通我瞓到下晝先開工咩，塞車之嘛，邊有咁多相睇丫！”
 
“咁你又話…咩大樣甜！”
 
我唔忿氣，重複佢嘅說話，但有啲字句我講唔出口。
 
“我呃鳩佢啫，我望到你，咪隨口同佢講，我係話緊你呀，波大樣甜嘛！”
 
“黐線呀你，講埋啲鹹濕嘢！仲有呀，同你講過好多次，唔好再講粗口啦！”
 
俾佢讚幾讚，佢呃我都唔知，就信咗佢係因為塞車先遲到，我怪錯咗佢，有啲歉意。
 
“不過你小心啲，唔好再遲到，我驚主任真係投訴你！”
 


“唉，無法啦，出嚟搵食，我都怕無咗份工呀，老闆娘炒我魷魚就無命喇，我要養阿爸，細佬妹！”

van仔講到佢身世好淒涼咁，不過，佢成日講笑，我唔知佢今次係真定係假。
 
“係囉，咁你就要小心啲啦，所以正話我好驚你同主任抝。”
 
我唯有咁安慰佢。
 
“唉，我都知佢好小器！”
 
“不如咁啦，日後如果你塞車趕唔切，你先俾個電話我，等我同主任或者老闆講聲先！”
 
係真係假都好，始終我唔想佢俾人鬧，就將我電話號碼輸入佢手機度。
 
事後我諗下，點解我會咁易俾咗自己個電話號碼俾佢呢。