電影少女 (2): 淫眼碌碌逐個郁 (20)

淫眼碌碌逐個郁 (20)
~~~~~~~~~~~~~



「我想食咗妳！」
 
Jay突然講啲咸濕笑話，搞到侍應都响度笑，Percy撤嬌咁講：「人哋問你食咩海鮮呀，成日掛住食我…」
 
一講完全場dead air，之後Jay同侍應大笑，Percy知道自己講錯嘢，無辦法唔面紅。


 
一個絕色美女話人哋掛住食佢，哩番說話引起無窮遐想，兩個笑到唔停，Percy就講：「唔好掛住笑，嗌嘢食喇！」
 
「好喇，好喇！」Jay連隨點咗幾款海鮮，食完之後Jay嗌埋單。侍應將帳單遞俾Jay果時Percy搶咗張單，講：「等我俾。」侍應無諗到Percy搶住找數，將帳單交俾Percy果時同Jay講：「你條女又靚又豪，你真係有褔！」
 
「當然喇！！」Jay講完就拖住Percy去租單車，揀好單車之後Percy俾錢，哩個時候Jay講：「次次都係妳俾錢，妳會唔會介意？」
 
「介意？」Percy好驚訝咁講：「我做嘢有錢吖嘛，你係學生都無收入，咁我俾好正常吖。」
 
「妳又擺Miss款？？」Jay好認真咁同Percy講，嚇到Percy即刻解釋：「唔係呀，唔係擺款呀！只係…」


 
Jay伸出手指放落Percy嘴唇上面停止佢，同佢講：「嚟到長洲俾妳做返Miss，我做返妳學生…」
 
「我哋玩師生戀，不過妳都係要聽我話，好唔好？？」
 
「師生戀，聽你話？？」Percy望住Jay雙眼，再次感受佢雙眼魅力之後笑住講：「好喇，Jay同學！」
 
「Percy…」Jay講：「應該係Miss Chan…」
 
Jay攬住Percy，再講：「May I kiss you？」


 
兩個啱啱講出師生關系，轉過頭就攬埋一齊要打車輪，咁突然舉動令到旁人愕然…
 
更愕然嘅係一對旁人，因為哩對旁人識得Jay同埋Percy…
 
「哦，仲唔捉到你哋拍拖！！」
 
突然聽到有人捉到佢哋拍拖，嚇到Percy即刻推開Jay！！
 
推開之後見到一男一女，佢哋熟口熟面但係一時諗唔起係邊個…
 
個女仔講：「傳過話你哋拍拖，估唔到係真嘅？」
 
「唔係呀，唔係呀！！」Percy甩手否認：「我哋咁啱撞到咋！！」
 


「撞到要攬埋一齊？？」女仔繼續質問。
 
「唔係呀…」Percy勁慌張回應：「頭先撞…所以…」
 
「撞咩呀Miss？？」女仔講：「撞到我哋？」
 
「我…我…」Percy唔知點樣講，委屈到眼泛淚光，見到咁Jay就講：「有口話人，咪一樣踢爆妳同Wilson拍拖！」
 
「我哋係拍拖呀！」女仔拖住佢身邊個男仔Wilson，講：「咁你哋係咪拍拖唔敢認吖？」
 
「咩唔敢認！！」Jay拖住Percy隻手舉高，講：「我哋係拍拖，Percy呵？」
 
Jay公開關系，要Percy都同樣承認。Percy心情好惶恐，真係要認？？
 
望吓Jay再望住果對男女，雙手緊扣响佢哋面前又爭啲打車輪，無得再抵賴…唯有


 
驚驚青青咁點頭承認…
 
Percy點頭承認，女仔拍拍Percy隻手講：「Miss Chan，拍拖咪拍拖囉，唔駛唔好意思喎！」
 
「吓？」聽到個女仔講得咁普通，不期然抬高頭望佢。見到個女仔笑容滿面，果種笑容係好溫雅，唔係恥笑佢。Wilson都講：「Jay你係勁嘅，咁正嘅Miss都媾到！」
 
「講哩啲！」Jay笑住答：「你都媾到校花Alice喇。」
 
「咪係囉，我同你去街你執到喇！」Alice搣Wilson忽肉，搣到佢嗌痛！！
 
「你哋諗住去邊到玩吖，一齊吖。」Alice問。
 
一齊玩？？
 


望真啲，Percy認得佢哋係自己做班主任果班學生，點可以拍住拖同佢哋玩嫁…
 
唔得！！
 
「我要準備家課，返去嫁喇。」Percy講大話，Alice望一望佢身邊嫁單車就講：「明哂喇，我哋去玩唔阻住你哋。」
 
「Wilson，我哋行咯。」Alice講完都行咗去，Jay就講：「妳死喇，身為老師講大話！！」


（待續）