我破咗個文青處，但佢唔肯同我一齊。//《偏偏喜歡你》: 喂（二）
過了三天，阿樂和青青突然像關係不睦的鄰居，已無昔日温馨。
他們都不敢多講什麼，兩個人都不方便；她是未想清楚，他是只能等她想清楚，才敢表白，他連敲她的門也不敢，吃飯亦不敢多言，怕她若不接話就太尷尬。
太頹，太無所適從，就要找人聊。阿樂故約Tim少落樓下講兩句。
「煩咩？女人？你屋企嗰條女？」
Tim少見阿樂很頹，如同他早一陣子被Tanya拒絕。
「係。」
「得，啤啤佢先。」
Tim少又真的抽住一打啤酒停阿樂，飲不完大不了帶回家再飲：
「咩事呀？媾唔掂呀？」
「未媾——」
「咁你就收皮啦，都未媾就頹，你叫嗰啲媾完都失敗——啫係好似你以前咁嘅人情何以堪？」
Tim少向來嘴賤，偏偏阿樂實在令他忍不住開炮；阿樂沒好氣的回應：
「唔係啊，佢都唔俾機會我追佢，因為我哋上咗床啊……」
除了瞪大眼、擘大口——阿樂唔再係青頭仔，但佢喺度唉聲歎氣——Tim少只能以聲浪證明自己的驚訝：
「咩話？上——咗——床？」
阿樂向左右看了幾看，才大力地推了Tim少一下：
「屌你！就嚟成個香港都知啦，洗唔洗咁大聲啊？」
「你同佢上咗床？Very good吖！你破咗處啦喎！非常叻仔呀！」
Tim少反應過來；阿樂深呼吸，整個人癱倒在椅上：
「但佢避我啊。」
「益你喎完全係。有乜好煩呀，屌你呃酒飲。」
阿樂趕忙多喝兩啖：
「你明唔明？我唔係想同佢上床，我係想同佢一齊。但宜家就係因為我哋上咗床，跟住佢勁尷尬咁避我，我都唔知點追，而且，其實我破咗佢處……」
「人哋隻豬你就識食，媾女就唔識，你係咪廢㗎？嗰日屌得佢唔夠爽係咪呀？」
反白眼大概是他的最佳反應——
人哋俾你屌，破埋人處，仲媾唔到？咩料呀。
「唔關呢啲事……嗰晚呢，我哋都飲哂少少酒，佢就醉啲——」
Tim少打斷阿樂：
「你哋無啦啦做咩飲酒？」
「佢失戀，其實都失咗兩個月，但佢又知咗更多嘢，所以好唔開心囉。」
「哦，所以係你乘虛而入、趁佢病，攞佢命嘅？死仔，真係識玩；我都冇你咁衰呀，嘖嘖。」
無辦法。
很難不揶揄，他的林子樂同學已經長大，不再是昔日純情的薯仔，Tim少和他一起連續多灌幾啖；阿樂低聲說：
「唔係呀……第一啖係我錫嘅，但係之後係佢叫我錫佢㗎……」
「咁真係好委屈你喎，仲屌埋閪，慘呀慘呀，快啲問佢收返錢啦，蝕底哂啦係咪？」
Tim少擺出一副委屈巴巴的扁嘴樣。
阿樂笑一笑，又「妖」了一聲：
「咪潤我啦，我好後悔啦……我真係鍾意佢㗎。」
「你有冇戴套？」
「有。」
Tim少笑着指住阿樂：
「啫係醉唔哂啦，仲識做安全措施。扮哂嘢，你有心扑人哋嘅。」
「嗰吓係——」
阿樂承認。
「咁咪好囉。嗱，你媾女嚟做咩？搞完一大輪媾返嚟，之後呢？咪係同佢上床囉。宜家你呀，又唔洗媾，又唔嘥時間陪佢，又唔使洗錢買嘢𠱁佢，就直接到達終點。你仲想點？幾多人恨都恨唔到啊，仲要冇手尾跟。」
Tim少擺出一副演講的姿態，搞到阿樂都半信半疑，當然他肯定這個說法不適用於他：
「我係真係鍾意佢，想同佢一齊㗎。」
「想翻焯咪講，問佢肯唔肯囉。」
阿樂開始沒有力氣，他呢喃：
「唔係呀。佢好特別㗎，同其他人唔同，我真係想做佢男朋友。」
「咩特別？特別大波？多水？哦——緊吖嘛，你見識少啦，我帶你去媾。」見阿樂狠狠地鄙視他，Tim少續道：
「明哂，佢下面大碌過你，或者有三個波。」
「屌你咩。」
他們忍不住笑。
「飲啦。有咩好講喎。」
結果，他們不斷閒聊，說着說着又回去青青的話題，但總是無果。
「媾佢老母囉！首先，你要表白，可能佢以為你只係想繼續同佢扑嘢呢！」
「如果直接咁講，佢唔應承咪柒囉……」
「你柒得少？之前夠失敗啦？Tanya點對你啊，咪仲衰，你咪仲柒。」
「唔係、唔係呀，我哋宜家係同屋主，好老尷喎。」
「挑，宜家就唔尷咩？」
「尷，但冇理由再尷落去……」
「乜你咁麻煩㗎，男人老狗，連女都搞唔掂？」
「搞得掂就唔洗揾你，我宜家已經拖住佢攬住佢啦屌你！鬼唔知呀媽係女人咩！」
「得啦得啦，喺度發酒癲就叻。佢可能未諗清楚咋嘛，啱啱失戀就即刻同你一齊，你都驚啦吓話？」
「……」
他們住得很近，阿樂已經飲得很醉，勉強行到路，由Tim少送他回家。
青青聽見門鈴，前去開門，卻看見面紅紅的Tim少扶着頭已低垂的阿樂；Tim少立刻進屋，將阿樂放倒在梳化上，回頭看青青：
「佢好醉，你睇住佢。」
青青問：「佢做咩醉成咁？」
「你知㗎啦。男人愁，唔係為錢，就係為女人。」
Tim少打量青青，說；她似掩飾愕然一般地、昂了昂首：
「好。麻煩哂你。」
「喂，林子樂係好仔嚟。
雖然，我唔知咁多啦，可能佢做咗啲衝動嘅嘢，但未必有心，佢會對佢鍾意嘅人好好，同佢一齊一定會幸福。」
青青意會，不可置否地點點頭，然後送走Tim少。