自從同Miss喺一齊，我就忽然變得好受歡迎: 第277章 日出

作為同學係冇問題，除非我唔止想做Magnolia同學：「冇話有冇問題，雖然我覺得你可以有其他選擇，但係呢個畢竟係你個人嘅決定。」

「咁點解上次喺商場見到我同鬼佬一齊之後，你就疏遠我？」Magnolia冇輕易俾我過關。

「我冇疏遠你，我以為你想疏遠我咋。」我好冇骨氣咁屈番Magnolia轉頭。

「上次見到你同女朋友一齊，唔知點解我覺得個心好唔舒服，跟住我以為你介意我做PTGF，所以唔再理我，結果我哋就變成不瞅不睬。」Magnolia比我大方，直認不諱。

「如果我唔理你，今次就唔會嚟幫你。」如果視對方為朋友，唔應該因為佢生活有困難，被迫做援交而歧視佢，反而應該積極諗方法幫助佢。



「咁我哋可唔可以忘記呢段時間發生嘅事，回復番以前嘅關係？」Magnolia嘅說話令我有啲遐想。

「當然可以啦，冇咗你幫手，我最近啲project都唔知做得幾辛苦。」我個人冇乜原則，見個女仔開到口，又唔忍心拒絕。

就係咁，我同Magnolia恢復番之前嘅「好朋友」關係，對於佢做援交嘅事，我冇再問過，正如Magnolia亦冇再提起Miss Cheung。

今年暑假比較特別，除咗係大學生涯最後一次暑假，仲有一大班囡陪我過，出年呢個時候我應該努力搵緊工，甚至可能已經返咗香港。

Chloe提議揸車過美國玩，不過帶住咁多個BB有啲麻煩，而且亦冇理由叫埋啲工人、保姆一齊去，結果只係去咗周邊啲主題樂園玩。



對於BB嚟講，就算去個大啲嘅公園或者沙灘已經好夠，喺好奇心咁旺盛嘅年紀，樣樣事物都咁新奇，加上四個BB互相陪伴，點會唔開心。

暑假後就係final year，周穎同Chloe因為想多啲時間湊女，所以今年雖然復課，仍然只係用遙距方式上堂，變相令到我每日仍然同Magnolia出雙入對。

Final project我自然同番Magnolia做partner，經過暑假幾個月嘅沉澱，我哋彷彿重新認識一樣，忘記之前嘅不快事，重新以同學身份交往。

不過男女間又點會有純友誼，加上經歷過上次鬼佬件事，我同Magnolia間似乎多咗重難以言喻嘅羈絆，簡單講就係知道咗對方秘密嘅特殊關係，對於一個知道自己秘密嘅人，你一係當佢係敵人，一係就當佢係最信任嘅人，好明顯，Magnolia揀咗後者。

其實我份人好單純，你對我好，我就自然對番你好，無論做同學、朋友定情侶都一樣，如果話我會介意人哋做援交，咁我一腳踏幾船加生埋一堆囡咁又好高尚咩，而且Magnolia起碼係賣藝不賣身，當然假設佢冇呃我。



Magnolia令我諗起Judy，Judy係唯一一個我有啲後悔同佢一齊嘅人，亦係對我最有心機嘅一個，我唔知佢有冇鍾意過我，但係我差啲就俾佢屈我哽咗Patrick個仔，講起上嚟都要多謝Chloe，唔係可能周穎已經離我而去。

咁同Magnolia繼續發展落去會唔會又導致近似嘅危機呢？

因為大學嘅忙碌，除咗上堂返工大部分時間我都係掛住做project，周穎佢哋知道我辛苦，連搞嘢都變咗係一至兩星期先一次，甚至有啲例行公事嘅感覺。

相處時間最多嘅，反而變咗係Magnolia，日久生情永遠係老土愛情故事嘅必然情節，時近聖誕假，剛好喺放假前趕及交到階段性作業俾Professor嘅我哋，並肩離開電腦室。

「原來已經差唔多天光，頭先咁順利我仲以為好早。」我見已經6點幾，於是就話。

「寫program啲時間不嬲過得好快，你睇下個天都開始光。」Magnolia微笑答。

就住漸亮嘅天色，身旁嘅Magnolia有種清純脫俗嘅美態：「不如我哋食埋早餐，我先送你返屋企。」

Magnolia點點頭，行咗幾步突然話：「我嚟咗加拿大咁耐都未試過睇日出，你估你會唔會帶我去呢？」



靚女嘅要求，我點會拒絕：「咁我哋去Scarborough Bluffs吖。」睇日出最靚梗係去Scarborough Bluffs，企喺斷崖邊望住鹹蛋黃從湖面慢慢升起。

以我手車，要趕喺日出前去到Scarborough Bluffs並唔係太困難，事實我哋亦如期抵達。

我哋沿住崖邊搵最佳位置睇日出，發現有條可以行出崖邊嘅小路，我見Magnolia躍躍欲試嘅樣，就帶頭沿小路向崖外行去。

條小路只夠一人通過，兩邊佈滿高過頭嘅雜草，行咗一分鐘喥後面前出現一個僅夠兩人並肩嘅小平台，再出就係畢直向下嘅懸崖。

我企喺平台邊望咗望，雖然我冇畏高症，但係個心都怯咗一怯，身旁嘅Magnolia望完更加嚇到捉實我隻手。

喺我哋驚緊時，陽光從湖面散射而出，太陽慢慢從地平線升起，個畫面真係好靚，靚到Magnolia唔知幾時攬住咗我條腰，而我就搭住咗佢膊頭。

「好靚呀，多謝你帶我嚟睇日出。」Magnolia嘅聲音喺耳邊響起，近到可以感受到口裡面呼出嘅熱氣。



我轉頭望向Magnolia，只要稍為前傾，就可以錫落佢微張嘅咀：「應該講多謝嘅係我至啱，因為你俾我見識到比日出更靚嘅你。」

Magnolia冇因為同我距離太近而縮開，反而雙頰微紅咁再靠近少少：「係咩？咁除咗講之外，你仲有咩實質行動多謝我？」

咁環境，仲忍得住就唔係我喇，微微靠前錫落Magnolia雙唇，柔軟嘅觸感令我不自覺攬實Magnolia，同佢作更深入嘅擁吻。

我諗起之前喺Waterloo讀嘅心理學，唔通呢啲就係所謂「吊橋效應」？Magnolia熱烈回應我嘅吻，我將舌尖伸入Magnolia口中，同佢唇舌交流，換轉第二個安全地點，我哋應該已經直落下一步埋身肉搏，但係而家畢竟喺崖邊。

直至俾漸熱嘅陽光灼醒，我同Magnolia先意猶未盡分開，Magnolia深深望住我雙眼，彷彿想望進我內心深處，察覺我真正嘅想法。

對望良久，最終由Magnolia先開口：「你送我返屋企吖。」