自從同Miss喺一齊，我就忽然變得好受歡迎: 第275章 不想遇上
「係呀，因為我聽子龍講過Uncle而家嘅情況，覺得Aunt你一個人照顧成頭家好犀利，所以難得有機會就想拜會下。」Miss Cheung不愧係Miss，即時幫周穎完到謊。
「咪就係咁囉，唔係阿媽你以為係咩原因呀？」我一邊佩服Miss Cheung一邊接口。
阿媽聽到Miss Cheung讚自己好開心，即時拉住Miss Cheung隻手同佢傾偈，仲講埋啲咩多得Miss Cheung教導我嘅說話，Miss Cheung點止睇住我，仲不知對我幾好，千依百順之餘連囡都幫我生埋。
對付阿媽呢啲級數，Miss Cheung梗係綽綽有餘，做咗咁多年班主任，有咩怪獸家長未見過，三兩下散手就令阿媽連我同周穎都唔記得咗，淨係掛住同Miss Cheung吹水。
呢個係最理想情況，第時阿媽知道Miss Cheung係心抱嗰陣唔會咁shock，亦容易啲接受。
結果阿媽係都要留Miss Cheung喺屋企食飯，仲話要周穎幫手煮，盛情難卻，亦唔知用咩籍口推，於是我就話趁有時間帶Miss Cheung周圍行下，實則係去出面安置好幾個BB。
「Miss，你好勁，頭先充滿班主任風範。」一上番車我即刻讚Miss Cheung。
「梗係啦，你估我做咗咁多年Miss係白做㗎。」Miss Cheung少有咁認叻。
為免喺車入面嘅小琪尷尬，我哋冇繼續打情罵俏落去，我將事態發展話咗俾佢聽，而家唯有先將幾個阿B車番Chloe屋企先，交俾保姆照顧。
小琪陪我哋送咗啲BB返去，好彩幾個阿B呢幾日彼此熟絡咗，就算媽咪短時間唔喺身邊都冇詐型，只係返到Chloe度，又出現另一個問題。
「我又要去同奶奶食飯。」Chloe聽完我哋嘅事就嚷住話。
唔怪得佢，側邊嘅邱雅琳就算冇出聲，亦都一副想跟埋去嘅樣。
「咁一於一齊去喇。」既然大家咁有心，冷落邊個都唔好，我打電話話俾阿媽聽，今晚要再加多兩雙筷。
安置好晒啲B後，我揸車帶住幾個女仔浩浩蕩蕩返屋企，忽然見到咁多靚女嚟拜年，阿媽意外得嚟仲好興奮，Chloe係大小姐脾氣，但係出身豪門嘅佢氹人自有一手，而邱雅琳咁乖，更加係冇人唔鍾意。
小琪見功德完滿，就叫Ryan嚟車佢去未來外父度拜年，喺呢度又要讚下小琪，越大越靚又幫得手，如果唔係Ryan嘅出現佢絕對有可能成為第五夫人。
做咗咁多年人，無論係阿媽定我，今個年初一絕對係有史以來過得最開心，又熱鬧又融洽，如果幾個孫女可以嚟埋，阿媽分分鐘會頒個大獎俾我。
快樂嘅時光過得特別快，飲飽食醉後幾個女人坐咗出廳傾偈，我就做乖仔洗碗，洗洗下突然有人行入嚟，喺我估緊係周穎定邱雅琳時，原來係阿媽。
「出面嗰幾個女仔，除咗阿穎，其他係咪都係你女朋友？」阿媽果然知阿仔心思，一擊即中要害，連Miss Cheung身份都估到。
我一臉心虛咁望住阿媽，唔知應該點答。
阿媽點點頭，一副咩都明晒嘅樣：「頭先我同佢哋傾咗幾句，就乜都知道晒喇，最難估係你班主任，不過就係因為佢太小心，反而露出馬腳，真係專登嚟同學生阿媽拜年嘅話，一定好關心個學生嘅嘢，點會好似頭先咁提親你就扮唔在意。」阿媽金田一上身。
所以話「道高一尺、魔高一丈」，Miss Cheung食嘅米始終唔夠阿媽食嘅鹽多。
「作為阿媽，個仔受歡迎係值得開心嘅事，但係咁多個，萬一處理唔好傷害到任何人都唔啱，阿媽可以幫到你嘅，最多就係第時生咗孫仔、孫女時幫你湊下，其他嘢就要靠你自己。」阿媽好少同我講女仔，因為以前根本冇得講。
孫就生咗喇，有五個，不過都係唔好講住：「阿媽，我知㗎喇，你放心，佢哋每一個對我嚟講都係咁重要，我唔會令佢哋傷心。」講就天下無敵，如果唔係啲女大人有大量，我已經傷咗佢哋唔知幾多次。
新年主要係拜年，喺加拿大又冇乜親戚，得幾個疏疏地嘅叔父輩，所以我哋大部份時間留喺屋企享天倫樂，呢日幾個女仔話Miss Cheung就嚟走，叫我同Miss Cheung出去拍下施，於是我就帶咗Miss Cheung去睇戲。
睇咩戲唔係最緊要，拍拖先係重點，難得嘅係可以同Miss Cheung重溫下戀愛感覺，套戲講乜唔係咁記得，都係啲公式愛情喜劇，只要Miss Cheung睇得投入又開心就好。
睇完戲食咗啲嘢，我哋就拖住手漫無目的咁逛商場，原本一切都好平常，但係偏偏喺呢個時候，遇到一個唔係咁想遇到嘅人。
喺商場廁所外等緊Miss Cheung時，忽然見到一個熟人喺廁所行出嚟，係Magnolia，呢排因為陪Miss Cheung冇乜點返學，所以少咗見佢，加上上次石克隆嘅說話，亦令我有少少反省，避免同Magnolia太熟絡，估唔到會喺呢個時間點撞番。
Magnolia見到我都好意外，仲有啲想扮見我唔到咁款，我拖住Miss Cheung就話驚俾佢見到啫，佢又驚乜呢？
答案好快出現，一個睇落成五張嘢嘅鬼佬咸咸濕濕咁上前攬住Magnolia條腰，Magnolia本能地想掙開，但係個身郁一郁就停住，由得鬼佬隻大手捉住佢條腰，然後臉容僵硬咁向住我個方向行近。
當Magnolia同鬼佬正要經過我身邊時，Miss Cheung啱啱喺廁所出番嚟，我上前拖起Miss Cheung，立眼發現Magnolia都見到呢幕，僵硬嘅表情瞬間轉為錯愕，然後唔知係嬲定不恥咁擰轉頭跟住鬼佬走咗。
你話鬼佬係Magnolia男友就絕對唔似，如果唔係冇理由冇聽Magnolia提過，亦冇見過，咁唔通Magnolia做…稍為諗下個心已經好唔舒服。
「係咪我去得太耐所以你嬲呀？」Miss Cheung突然滿臉歉意咁問我。
我嬲？乜我個樣似嬲咩？「梗係唔係喇，我個樣衰啫，唔笑就好似嬲咁，我等你一世都唔緊要，何況嗰一陣。」
Miss Cheung微笑錫咗我塊臉一下，有個咁好嘅女朋友，我仲理咁多其他女仔嘅嘢做乜？專心照顧好身邊人仲好喇。