自從同Miss喺一齊，我就忽然變得好受歡迎: 第271章 眾女之父
第271章 眾女之父
再次見到白蘭花，已經係另一次趕功課，喺剛考完試，準備放聖誕假前，同一個電腦室，差唔多嘅時間，我正埋頭苦幹之際，一把熟悉聲音響起：「一直都未有機會同你講番聲「多謝」，有機會我請番你食晏。」
「唔使咁客氣。」我望向身旁嘅白蘭花：「舉手之勞啫，大家叫做係同一陣線奮戰緊嘅戰友，互相幫助係應該嘅。」
好明顯白蘭花覺得我有啲九唔搭八，佢不經意咁望咗我部電腦畫面一眼，然後話：「咦？呢part我啱啱做好，呢度唔應該咁寫，唔係會不停出error。」
「真係？唔怪之得我搞咗成個鐘都loop死喺呢個位。」我彷如遇到救生員嘅遇溺者：「你介唔介意…」
我未講完，白蘭花已經先一步話：「好吖，就當報答你上次份三文治。」
三兩下手腳，白蘭花就幫我搞掂咗個bug，我一直認為自己喺電腦方面係中上水平，估唔到今次竟然要搵人幫手，仲要係應該唔多擅長IT嘅女仔。
「跟住嚟到呢度我就棘住咗，所以頭先想停一停出去行下，點知見到你。」白蘭花微微一笑。
「呢度我知點做，同上次個project差唔多。」我接番手，有機會表演番下：「不如我搬過去你側邊，我哋互相幫忙，應該可以早啲完成。」
白蘭花略作猶豫，就點頭話：「好吖，咁就拜托你，我見你上次都比我早做完。」
「呀！差啲唔記得自我介紹，我係Wesley。」我醒起未知白蘭花叫咩名。
「我係Magnolia，多多指教。」因為鍾意白蘭花而叫Magnolia，定係叫Magnolia所以鍾意白蘭花呢？
讀電腦以嚟除咗做group project，我都係一個人完成所有作業，因為group親啲人大部分唔肯做嘢，反正最後靠自己，冇必要益其他人。
不過一個人始終會有盲點，有時棘死咗做極做唔到，如果有個第三者幫下眼，可能好容易就睇到問題癥結所在。
事實亦正如我所想，原本以為又係另一晚嘅通頂，結果三點喥就做完，比預料快咗接近一半。
「多謝你幫手，唔係我一定唔可以咁早做完。」交埋功課，我衷心感激Magnolia。
「唔使客氣，我哋互相幫助啫。」Magnolia笑答，其實佢個樣唔笑時有啲惡，一笑就令人如沐春風。
「而家早咗咁多做完，有冇人車你走呀？你唔介意我可以車埋你。」我見三點幾未必有車搭，就向Magnolia建議。
Magnolia今次唔係猶豫咗好耐，就爽快應承：「唔介意，麻煩你就真。」
「唔麻煩，難得搵到個學科上嘅好partner。」呢句係真心話，雖然我對佢有意思係主要原因。
上咗車後，我哋開始無所不談，我亦漸漸了解Magnolia嘅背景，原來佢喺香港考DSE成績唔理想，專登過嚟加拿大升讀大學，現時寄住喺親戚屋企，因為冇乜朋友，平時都係自己搭車返學，雖然間中有啲男同學會提議車埋佢，但係佢一不想欠人人情，二又驚人哋有企圖，所以上次我話一齊去downtown啲Cafe，佢先會拒絕我。
Magnolia嘅坦誠令我對佢更有好感，我亦都將自己嘅情況話咗俾佢知，當然冇提已經有四條女同埋係五個小朋友老豆呢兩件事。
「如果第時有需要，你可以打俾我，我車埋你返學。」Magnolia住喺學校半個鐘車程喥嘅小區，勉強算係順路。
「咁唔該定你先。」Magnolia冇可冇不可咁答。
今年聖誕假雖然冇咗Miss Cheung，但係有大有細一大堆仍然過得好熱鬧，小朋友眨吓眼已經幾個月大，開始爬嚟爬去，不過仲未識講嘢，幾個靚媽追住佢哋周圍走，成日驚BB唔小心整親，搞到Chloe屋企變咗育兒中心。
Miss Cheung確定咗農曆年會過嚟，到時惜頤剛好滿一歲，可以順便幫佢慶祝埋生日，而家同Miss Cheung母女視像通話時，惜頤已經識得「巴，巴！」咁叫我，個樣亦成個小Miss Cheung咁可愛，令到我呢個做老豆嘅都想快啲見到佢，抱下佢。
另外我亦都瞞住阿媽搵日帶咗成班心抱、孫女去探阿爸，阿爸好頑強，成棚人差唔多迫爆間病房都嘈佢唔醒，不過聽醫生講最近阿爸身體各方面指數都呈上升趨勢，似乎係甦醒跡象，或者啲孫女嘅呼喚或多或少對叫醒阿爸呢個懶瞓爺爺有啲幫助。
聖誕假後返多個零月就係新年，自從同Magnolia熟咗後，有時上堂見到佢都會一齊坐，放學亦會送佢返屋企，當然我哋唔係拍緊拖，一切只係順其自然咁發展，如果唔係有咩特別事件發生，或者我哋永遠都只會維持喺同學關係。
其實Magnolia外表雖然冷冷地，但係熟咗就好多嘢講，可能如佢所述，喺加拿大冇乜朋友，難得遇到我呢個冇乜企圖嘅人，又對我有種咩都講得嘅奇怪信任，當然冇企圖呢方面我冇認過。
其實Magnolia質素中上，唔好話女神級嘅Miss Cheung，連周穎、Chloe同邱雅琳都明顯比唔上，我對佢有興趣嘅原因起初連自己亦有啲懷疑，事後諗番轉頭，可能就係我嘅自卑心作崇，覺得完全配唔起Miss Cheung佢哋，所以當一個較接近自己水平嘅人出現時，就不禁被佢吸引。
人就係咁犯賤，永遠想得到更好，但係當得到最好時，又會覺得自己唔配，有時放棄身邊嘅人，並唔係因為佢唔夠好，而係同佢一齊太大壓力，所以想搵番一個比較平凡、水準比較接近嘅人，咁樣相處起嚟反而會輕鬆、舒服一啲。
喺我同Magnolia嘅關係慢慢發酵期間，Miss Cheung嚟加拿大嘅日子亦漸漸接近，時間過得好快，眨下眼就一年，惜頤亦迎嚟人生第一次生日，而且仲係好特別嘅生日，因為可以同四個妹妹一齊過。