自從同Miss喺一齊，我就忽然變得好受歡迎: 第255章 回歸平淡
喺Waterloo最後呢幾個月，除咗應付final就係返工，為咗還清責務，我考完試後冇即刻出Toronto，而係做到8月尾先走。
June對於我可以氹番Miss Cheung並冇太意外，仲話本來就對我好有信心，唔走轉香港事情未必可以咁順利，雖然係有啲燒錢，不過可以同Miss Cheung過咗個甜蜜嘅復活節假，使幾多都係值得嘅。
喺我離開Waterloo之前，我冇再見過Miss Lee，或者對於以為破壞咗我哋嘅感情，佢已經心滿意足，而且佢亦應該知道我發現俾人陰咗後，係冇可能會再理佢嘅。
走前一晚，我幫雄叔閂埋門執好晒嘢先走，平時我唔使留到咁夜，今日係最後一日，好頭好尾留番個好印象，第時講唔埋仲有機會見，其實我同June熟咗後，雄叔一直以為我哋之間唔止係純友誼，而係有啲嘢。
June車我返屋企期間冇講咩特別嘢，只係如以往咁閒話家常，講下學校啲男女朋友，亦都八下我同幾條女嘅生活。
「聽日你唔使我車你出Toronto，咁今晚就係我哋最後見面，你出到去努力讀書，醒醒定定做人，唔好再激嬲班女喇。」臨落車前，June以大家姐語氣訓誡我。
「見過鬼都怕黑喇，以後我會小心身邊嘅人，你都要小心，一腳踏幾船好容易出事。」我以過來人身份語重心長咁話。
「我明呀，不過我都唔係真心鍾意佢哋，同佢哋玩下之嘛，我好記得以前未減肥前佢哋點對我，所以我都會點對番佢哋。」June冇將班男友嘅事放喺心上，仲語帶相關咁話：「但係有啲人由始至終都對我好、關心我，我係知嘅。」
我當然知道June講乜，我唔敢正面回答呢個問題，亦都冇打算澄清番呢個美麗嘅誤會：「喺Waterloo嘅時間，尤其係下半學期，多得有你，令我覺得入嚟Waterloo係好值得嘅事，因為識到你。」
June定定望住我，好似喺度判斷緊我說話嘅真偽咁，最後突然伸手將我攬入懷：「我都要多謝你，你令我改變咗好多。」
我回擁住June，腦裡面泛起初次喺downtown見到佢，俾佢夾硬請咗嘅畫面，一切遙遠而溫馨，呢刻即使俾變咗靚女嘅June抱實，我都冇絲毫歪念，反而有種家人嘅感覺。
我感到肩膊有啲濕熱，於是加大力度抱實June以作安慰，直到佢鬆開手，臉上已回復笑容：「咁拜拜喇，我有機會出Toronto時記住要好好招呼我喎。」
「一定，我有時間都會入嚟探你。」我冇再講太多，對於June，其實我都係有啲唔捨得，不過我身為男仔，當然唔會好似June咁喊出嚟。
間房啲嘢已經執好晒，等聽朝石克隆入嚟接我就走得。
除咗June，Waterloo仲差啲令我同Miss Cheung分手，雖然經過有驚冇險，但係如果唔係我當機立斷即刻返香港箍煲，Richard同Miss Yip未必唔可以乘人之危，到時再要補救就複雜好多，亦都驚險好多。
呢晚我瞓得好稔，第二朝石克隆打俾我先起身，好彩佢到前半個鐘就打俾我，話驚我唔係自己一個瞓，要俾啲時間我做準備。
聽個衰仔咁講，我先驚覺竟然冇喺Waterloo搞多條女出嚟，甚至冇搞過其他人，唔計邱雅琳，對上嘅新女已經係Chloe，呢個情況連我自己都覺得不可思議。
查實就係淨照顧身邊幾個女仔，已經教我有啲力不從心，仲邊有心情同能力外出搵食，做人係要知足嘅，下下領完嘢要氹來氹去夠辛苦喇。
「你幾時去搞轉學啲嘢呀？使唔使車你去？」石克隆開車冇耐就問。
「唔使喇，搵日周穎返開U我先順道搞埋。」呢排少咗同石克隆傾偈，唔知佢最近點呢：「你同Amy點呀？有冇重大消息宣佈先？」
「係都你宣佈先喇，你咁活躍，幾時突然話要奉子成婚我都唔會意外。」石克隆反串我。
我而家小心…咗好多，邊有咁容易出事，而且係結都返香港搵Miss Cheung結咗先，呢個係我一直對佢嘅承諾。
石克隆冇直接車我返屋企，而係車咗我去Chloe度，因為成班人話聖誕party後冇好好聚過，難得我終於成功入番多倫多大學，點都要慶祝下。
不過所謂慶祝，咪又係一大班人飲飲食食，講埋啲無聊嘢，Amy同小琪係我比較少見嘅人，即使同一屋簷下，小琪好多時都出咗街，嚟緊或者會見番多啲，不過話唔埋佢隨時會搬去同男朋友仔同居。
我一拖三，加埋石克隆一對、小琪一對、阿妹同Betty當一對，啱啱好十個人，圍坐喺張長方形枱度，頭尾主席位由我同Chloe各據一方，其他人分坐兩邊，我左手面係石克隆，右手邊係周穎。
去得Chloe屋企，梗係由佢大廚負責準備食物，除咗枱中間位置嘅幾盤特色食物，每一道送上嘅都係未食過，但係一望就知係高級食材嘅菜色。
我覺得自己忽然升呢變咗古時嘅貴族，正喺度大延親朋，老實講都幾唔慣，睇嚟我係著起龍袍都唔似太子嗰種人。
飯後Chloe仲喺泳池邊搞咗個甜品加雞尾酒會，得我哋幾個其實唔係好撐得起場面，旨在見識下世面。
「下次不如你叫多啲人嚟玩，咁大個場好似有啲冷清同嘥料。」我見大部份人走咗去欣賞調酒師表演，就細細聲同Chloe講。
「好呀，多啲人熱鬧啲，又多啲嘢玩。」Chloe爽快答應：「你咪走住，我仲有嘢問你。」Chloe見我想返去搵石克隆吹水，叫住我。
「你有嘢問我？問咩呀？」我停低反問。
「睇你個樣，應該已經氹番Miss Cheung，呢個時候係咪要補償下我呢？」Chloe嘅微笑睇落好奸咁。
「你知道Miss Cheung嘅事？」我著實有啲訝異。
「我當然知道，而且仲知你返咗香港。」Chloe一副高深莫測咁款。
「你點知㗎？」唔通周穎唔小心透露咗俾Chloe知，定係June？似乎都唔太可能。