自從同Miss喺一齊，我就忽然變得好受歡迎: 第227章 善良的心
喺Miss Cheung嚟到之前，首先要招呼咗身邊三個女仔先，周穎住埋一齊，呢幾日隨時都可以見，反而Chloe同邱雅琳就要專登出去搵，不過好在佢哋住喺同一屋簷下，可以一次過見晒。
Chloe已經完全康復，變番以前嗰個搞搞震嘅有錢女，令我反而有啲懷念佢瞓喺床上面楚楚可憐嘅時候，嗰陣佢有種令人好想保護佢嘅感覺，唔同而家俾佢激到唔知好嬲定好笑咁款。
「你嚟搵我定搵Joyce㗎？三句唔埋兩句就問起佢，仲成日周圍望。」我啱啱坐低冇耐，Chloe就串我。
「我嚟搵你…哋，乜Joyce唔係你私人看護咩，唔見佢嘅。」我確實有四圍搵邱雅琳嘅身影。
「話就話做私人看護，其實我冇嘢俾佢做，大家平起平坐，我冇恰佢㗎。」Chloe驚死我話佢以大欺小。
咁都好，話晒兩個都係我條女，萬一有咩投訴都唔知幫邊個好：「咁Joyce喺邊呀？」
「喺房睇緊書啩，你等陣，我打俾佢。」Chloe打電話俾邱雅琳：「喂，Joyce，你條仔嚟咗，話想見你，你而家過嚟吖。」
「乜你講嘢咁粗魯，咩條仔啫，Joyce咁斯文，你唔好教壞佢。」我忍唔住向Chloe訓話。
「係嘅，Joyce斯文，阿Wing大方，你就嚟嚟個Miss都一定係斯文大方㗎喇，就我最粗魯，你初初識我嗰陣都唔係咁同我講嘢嘅，家陣叻喇，有護士又有Miss，唔使理我呢啲波大無腦嘅女朋友。」Chloe忽然借啲意發起大小姐脾氣。
波大無腦？你唔止波大，仲唔知幾有心機，就啱啱講到自己懶可憐，但係對眼明明碌嚟碌去唔知諗乜，就知你幾奸：「我唔係咁意思，係我錯，你呢啲係豪爽，唔係粗魯，你哋幾個各有各特色，個個我都咁鍾意，咁在乎。」既然係扮嬲，我就扮下氹番Chloe，呢啲都係相處嘅情趣。
「見你肯認錯，咁就算喇，一陣等我同Joyce一齊服侍下你。」Chloe冇再追究，見我讓步就打完場。
咪住？頭先Chloe嘅意思係咪話3P呀？好耐冇3過，間中3下都好喎。
「子龍，你嚟咗呀！」一講曹操，曹操就到，身穿便服嘅邱雅琳行入房，睇嚟Chloe冇吹水，真係冇當邱雅琳係工人，連護士服都唔使佢著。
「Joyce你嚟得好合時，我啱啱同Wesley講起同你一齊玩3P啲嘢。」Chloe真係唔怕醜，乜都夠膽死講。
「吓？3…」邱雅琳聽完塊臉即刻紅晒，連個「P」都唔敢講出口。
「喂，都叫你唔好教壞Joyce。」想還想，Chloe同邱雅琳始終唔算得上熟，更加唔好話要「袒誠相對」。
「哦，你唔想嘅，頭先你明明笑淫淫咁樣。」Chloe果然唔係咁容易對付。
邱雅琳聽到Chloe咁講，擰頭望向我，見我冇即時反駁，就一幅下定決心嘅樣：「如果子龍真係想，咁我都冇…冇問題。」
唔係唔想，只係見你個樣咁驚就無謂喇：「你唔好聽Chloe亂噏，我一個人得一條…唔係，即係呢啲身心靈嘅交流，梗係兩個人最好。」
「唔好扮清高喎，我又唔信你冇試過3P。」Chloe一臉挑釁咁望住我。
咁又真係試過幾次，感覺都唔錯，我見Chloe笑笑口咁望向邱雅琳，就知又露咗饀：「我哋唔好理佢，不如你帶我參觀下你間房。」我啤咗Chloe一眼，俾咗個等陣先慢慢泡製你嘅眼神佢。
Chloe對我伸咗下脷，臨尾都攞番個彩：「唔好「參觀」咁耐喎，同埋記住你仲要返嚟「參觀」我個…房。」
邱雅琳俾Chloe搞到有啲唔好意思，話晒佢哋名義上係主僕關係，一嚟就搶走咗老細個男友似乎唔係幾好。
我知道Chloe唔會介意，所以好放心咁叫邱雅琳帶我返佢房，邱雅琳住喺Chloe樓下，間房大約等如主人家嘅一半，裝修用品又高級，似係嚟探訪嘅客人多過打工，都算Chloe識做，冇侍薄千里迢迢走嚟搵我嘅邱雅琳。
「其實我同Chloe講住工人房就得，但係佢偏偏俾咗呢間客房我住。」邱雅琳見我兩眼放光，怕我覺得間房唔合身份。
「咁又唔得，如果佢夠膽俾間工人房你住，我即刻飛咗佢。」講啫，吹大啲都冇所謂。
「你唔好亂講嘢，俾其他人聽到就唔好。」邱雅琳話俾我聽其實佢嘅直屬上司係呢度個管家，只不過俾Chloe調咗嚟做親兵。
「咁你喺度做會唔會唔慣？」諗真邱雅琳寄人籬下，萬一第時我同Chloe有咩拗撬，佢夾喺中間咪好尷尬。
「唔會，呢度人工好、Chloe對我又好似姊妹咁。」邱雅琳微笑拖我坐喺床邊：「而且可以成日見到你，我就心滿意足。」
「如果Chloe有咩對你唔好，或者你做得唔開心，記住話俾我聽。」雖然我未必幫到手。
我突然發現，Chloe叫邱雅琳嚟打工會唔會另有目的？點解我感覺邱雅琳變咗做人質咁。邱雅琳喺Chloe手上，我仲點敢對佢唔好，萬一Chloe將啲怨氣發洩喺邱雅琳身上點算？
「你唔使擔心，我識照顧自己，我知道你同Chloe都對我好就夠。」邱雅琳挨喺我膊頭，成個小鳥依人咁，我望住呢個為咗我抌低晒家人、朋友同事業嘅女仔，內心充滿感動，伸手攬實邱雅琳略顯單薄嘅雙肩，同佢一齊望向落地窗外嘅開揚景色。
「其實我對你一啲都唔好，唔單止喺香港抛低你，你嚟到受咗咁多苦又唔知，而家仲要你幫另一個女仔打工，唉！」我良心發現，數落原來真係辜負咗邱雅琳。
「你唔好講埋啲咁嘅嘢，你咁講我仲內疚，如果唔係我死纏難打，你都唔使咁辛苦。」邱雅琳雙目含淚，個樣仲傷心過我。
吓？唔係應該我內疚啲咩，邱雅琳竟然仲內疚過我，咁我仲算係人嚟嘅。
喺大家都咁唔開心嘅時候，唯有做番啲開心嘅事，我吻乾邱雅琳臉上嘅眼淚，吻落佢嬌艷嘅唇同柔滑嘅胸，用行動嚟回報佢對我嘅深情。