自從同Miss喺一齊，我就忽然變得好受歡迎: 第217章 特別日子
星期六同周穎渡過咗愉快嘅一日，由朝早起身整花園，晏晝去睇戲行街，到夜晚去咗一間地道餐廳撐枱腳。喺呢一日我暫時忘記其他人，專心同周穎拍拖，讀書期間雖然要為學業煩惱，但係都叫做比較無憂無慮，起碼唔使為生活打拼，將來出咗嚟做嘢，我哋就未必有而家咁悠閒嘅日子。
而且我意會周穎喺人生路上應該比我成功，可能賺嘅錢比我多幾倍，到時我哋仲可唔可以喺埋一齊，我都唔敢講，更加唔好話Chloe呢啲有錢女或者Miss Cheung嗰種早我出嚟做嘢多年嘅事業型女性。
咁似乎邱雅琳同我會接近啲，起碼佢只係大我兩年嘅護士，雖然護士都有幾萬鈫人工，不過我諗我唔會連幾萬鈫都搵唔到啩，咦？我竟然又不自覺諗起邱雅琳，話晒仲同周穎食緊晚飯，只係佢啱啱行開咗去廁所。
「你諗乜諗到入晒神呀？」周穎把聲將我拉回現實，原來佢已經坐番喺枱度。
「咪諗住你囉，你今日好靚呀，比平時更靚。」周穎今日著咗條冇見過嘅淺黃色長裙，睇落既青春又青純，其實以佢嘅質素，唔使點打扮已經好吸引，何況仲特別打扮過。
「口花花喇你！」周穎笑罵：「咁你知唔知點解我要專登化晒妝同著新衫吖？」
呢啲問題我睇戲見過好多次，通常女仔盛裝出嚟，唔係生日就係咩咩紀念日，講起生日，我從來都冇問過啲女，因為年齡係女仔嘅秘密？梗係唔係喇，實情係我以往一向單身，生日都唔會同自己慶祝，所以從來冇問人生日嘅習慣，諗落有機會都要問番Miss Cheung同Chloe幾時生日，唔係miss咗就唔係幾好。
我估唔係生日啩，咁就即係紀念日喇，上年呢個時間我同周穎喺香港，好似係差唔多時候開始，當然正式日子好難計，因為我哋好似冇特別向對方表白過，扑扑下嘢就順理成章咁喺埋一齊。
嘢都扑埋，仲表咩白吖，除非當對方係SP，咁就反而要講清楚，既然係咁：「因為今日係我哋拍拖一周年吖嘛。」我幾有信心咁講。
周穎聽我咁講好開心：「你真係記得㗎，我見你成日冇咩表示，仲以為你唔記得。」講到咁就有啲尷尬，我都唔記得，點會有表示啫，周穎接著話：「除此之外，今日仲係另一個特別日子。」
「你唔會話俾我聽仲係你生日啩？」我心諗，口裡面則問：「咁啱，係咩日子呀？」
「今日係我生日。」周穎講完有少少面紅：「可以喺生日當日同你開始，一直係我覺得最不可思議嘅事。」
我諗周穎所謂嘅開始，應該係我哋第一次扑嘢啩，唔怪得知佢當時表現咁怪喇，原來係因為生日，生日當日反而送隻豬俾我做禮物，真係恩重難報：「生日快樂！咁即係話我哋係註定喺埋一齊。」以後生日同紀念日一齊慶祝，可以慳番啲又唔使驚唔記得。
「多謝！我都係咁諗。」周穎含情脈脈咁望住我。
死喇，乜都冇準備，唔好話禮物，蛋糕都冇個，睇嚟惟有見步行步。
喺咁嘅關頭，友情變得十分難能可貴，我借意去廁所，然後打俾石克隆：「克仔，有啲緊要嘢要你幫手。」我將周穎生日同一周年嘅事講咗俾石克隆知：「你可唔可以幫我準備份禮物同蛋糕。」
「得，你俾半個鐘我，我即刻去幫你準備。」石克隆不愧係好兄弟，半句都冇多問就應承幫我。
「我喺度拖多陣，你搞掂叮我，一陣再搵機會同你交收。」我放下心，出去同周穎叫咗啲甜品慢慢嘆，直至石克隆Whatsapp我，先賣單離開。
石克隆話將蛋糕同禮物放咗喺我屋企後花園一個指定位置，我車咗周穎返屋企後，叫佢喺我間房度等，將蛋糕同禮物攞入屋，喺樓下個廳set好晒啲嘢，先帶佢落去。
生日就多啲人一齊慶祝開心啲，加埋一周年就我哋兩個單獨好啲，而且屋企都係得阿媽，阿妹同小琪都未返。
個蛋糕好靚，睇得出係高級嘢，因為我啱啱先知周穎生日，所以為咗掩飾我叫石克隆喺個蛋糕面寫一周年就夠。
「嘩！你真係有準備㗎，你又知我鍾意食呢間餅店啲千層蛋糕嘅！」周穎見到個蛋糕成個細路仔咁撲落我度：「我仲以為你扮記得，原來真係記得㗎。」
「梗係記得喇，本來諗住俾個驚喜你。」去到咁環境，我只好死撐落去：「呢份係一周年禮物，生日禮物我冇買，你將就收住一份先。」我將石克隆幫我準備好嘅禮物遞俾周穎。
份禮物包好晒，我都唔知係乜，四四方方應該係首飾，我估石克隆知我家底，唔會買啲太貴嘅嘢啩。
周穎拆開包裝紙，喺我都幾緊張嘅氣氛下打開個盒，係一條閃閃發光，造型有啲似心型嘅獨特鏈墜，睇唔出貴唔貴，但係就好靚。
「你點知我鍾意呢條鏈㗎！哦，我知嘞，你一定係問咗石克隆。」周穎滿臉驚喜咁攞條鏈出嚟，要我即刻幫佢戴。
我冇問石克隆，我係叫佢幫我買啫：「最緊要你鍾意，你鍾意就好喇。」
「我好鍾意呀，多謝你呀，子龍。」周穎攬住我係咁錫，開心到想即刻以身相許咁。
我反手抱住周穎，乘機同佢打起茄輪上嚟，周穎熱情回應。老實講，我心裡面除咗感激石克隆喺重要時刻救咗我一命，我仲有另一種奇怪嘅感覺，覺得好似石克隆比我更識得氹周穎。
半個鐘就可以買到周穎鍾意食嘅蛋糕同心儀嘅禮物，係咪有啲唔太現實呢？諗到呢度，我有啲唔敢再諗落去，或者都係等見到當事人嘅時候，再問下佢好過自己亂諗嘢。