自從同Miss喺一齊，我就忽然變得好受歡迎: 第201章 兼職生活

第一日返工，我就喺廚房幫手煎同炸嘢，有時又會跟發哥學執料、跟雄哥學煮餸，雖然我平時都有煮下，不過同而家重量不重質嘅煮法唔同，我就話為咗氹女仔啫，點可以同做生意相提並論。
 
間舖人流唔算多，除咗食飯時間，基本上冇乜人，比較奇怪就係雄哥連送外賣都冇請，佢話因為太少人叫外賣，所以萬一有都係發哥或者以前個幫廚阿豪送，真係多嘢做就索性唔接。
 
結果我都幫手送咗兩單外賣，比起喺強叔度做，呢度明顯悠閒好多，始終Waterloo比起Toronto無論繁盛程度同人口都差好遠。
 
去到第三日，June開始有啲奇怪舉動，成日喺廚房門口靜靜企咗喺度唔知做乜，每次我望向佢，佢就會即刻移開視線然後出番樓面，雄哥同發哥見到都搖搖頭一臉無奈，唔通我咁快就成為咗June嘅下一個目標？
 
果然呢日放工，雄哥冇好似平時咁先車我走，然後同June返屋企，而係改由June單獨車我，而雄哥就跟咗發哥車，等發哥車佢同珍姐。
 


車程只有十幾分鐘，所以開車冇耐，June就主動開口：「呢幾日你做乜成日偷望我？」
 
咦？開始嚟料喎，為咗份工，都要應酬下阿大小姐：「我冇偷望你，只係有時以為你有嘢搵我哋，所以望下。」
 
「唉，乜你哋啲男仔個個都咁細膽，敢做唔敢認。」June嘆咗口氣，轉臉望向我。
 
我望住June塊肥臉，一時都唔知點答好。
 
「由第一日喺街度見到你望向我嘅眼神，我就知你對我有意思，我已經專登請你返嚟，俾多啲機會你接近我，點解你仲唔敢踏出第一步？」June趁住架車停紅綠燈，成個肥身擰晒過嚟。
 


呢幅尊容，就算我係以前嗰個冇女嘅毒男，都唔會落搭囉：「June姐，我諗你有少少誤會，我好多謝你請我做part time，但係對於感情方面，其實我已經有女朋友。」
 
「你有女朋友都對我有意思，真係難為咗你，邊個叫我咁麗質天生，我唔會迫你同女朋友即刻分手，因為我唔想做搶人男朋友嘅壞女人。」June好似好為難咁，好彩啱啱轉燈，佢俾後面架車響「安」催開車。
 
唔怪得以前啲part time俾你嚇走晒喇，你下下俾咁大個「驚喜」人哋，有幾多個正常男仔可以頂得順：「咁真係多謝June姐你咁為我著想喎，對你有冇意思呢啲嘢，不如第時得閒先再傾，而家我都係想努力讀書同做嘢多啲。」
 
「點解你哋啲男仔總係唔能夠坦白面對自己，次次都要我哋女仔做主動？」June繼續自說自話，好似完全聽唔到我講嘢咁。
 
你鍾意點諗就點諗喇，反正我好有信心絕對唔會衰喺你手上：「多謝你今日送我返嚟，咁聽日見喇。」架車駛入行車道後慢慢停落嚟，我終於可以甩難。
 


「咁我聽朝過嚟接你食早餐，然後一齊返工。」June滿面期待咁望住我。
 
呢個樣，真係可以殺死大部份男人，仲要係撤底死亡嗰隻：「唔使客氣喇，我聽朝要返學校搞啲嘢，搞完會趕返舖頭。」
 
我冇俾機會June再講其他嘢，就急急腳落車返入屋，我初次感受到原來受歡迎都唔係一定好，遇著June呢廷人都幾難頂，唔怪得當日阿豪要「逃走」喇。
 
返到房打電話同Miss Cheung等幾個女仔傾咗陣電話，之後就去沖涼瞓覺，雖然過程中June打咗嚟幾次，仲係咁Whatsapp我，不過我都冇理，希望佢可以知難而退，除咗June呢個麻煩，雄哥地對我好好，嚟緊一年我都想喺雄哥度打工，一年啫，之後我就轉番出去Toronto喇，只要我「潔身自愛」，應該都唔難捱。
 
第二日返到舖頭，June眼啤啤咁𥇣住我，我估係怪我尋晚返到屋企冇再應酬佢，如果因為咁嬲咗我就發達喇，始終呢啲咁重口味我真係食唔落，而且我仲要修心養性考好啲成績轉番出Toronto搵周穎。
 
不過重口味都一樣有市場，返多幾日工後我開始發覺好多鬼仔、鬼佬都好鍾意撩June傾偈，有日仲見有個鬼仔揸住扎花喺門口等June放工，貌似係同學，雖然June最後只係收咗花，冇同鬼仔出街。
 
可能鬼仔見慣肥婆，所以June呢啲異國風情對佢哋嚟講有一定吸引力，咁咪好囉，各有所好，我有機會都想搞下鬼妹喇，你有鬼仔搞都唔錯吖，外國人營養又好，睇4仔嗰陣個個都天生異稟，實滿足到你呢個大肥婆喇。
 
今日係星期六，我同June呢幾日叫做大家相安無事，佢冇再喺廚房門口出現同係咁打俾我，過多兩日我就開學，到時各有各忙，應該就會再少啲機會見到，點知呢個好唔聽話嘅Chloe走咗入嚟搵我，本來亦都唔係咁大件事，喺開學前見下Chloe，痴纏下都不失為一件美事，偏偏就係佢走咗嚟接我，俾June見到，咁就令件事變得有啲複雜。


 
Chloe見到June後，本能地覺得有啲唔妥，可能呢啲就係女仔嘅第六感、又或者只不過係Chloe比較多事，對我身邊嘅任何異性物體都有敵意。
 
「嗰個女仔邊個嚟㗎，望住你啲眼神咁怪嘅，仲好似當我係仇人咁死啤爛啤。」Chloe劈頭第一句就問。
 
「佢係老細雄哥個女，叫June，你敏感啫，佢對個個都係咁嘅樣。」我當然唔會話俾Chloe聽June對我「示好」嘅事。
 
「唔係喎，佢明顯對你有意思，唔係點會對我充滿敵意。」Chloe冇輕易比我帶過，一副唯恐天下不亂嘅神情。
 
「可能見你又好身材又靚過佢，所以妒忌你啫。」我拉Chloe上車。
 
「咁又係，而且我又有你做我男朋友，佢呢啲肥婆實冇仔溝。」Chloe見我讚佢，終於將注意力從June身上移開。
 
臨離開前我唔覺意望咗June一眼，嘩！眼神咁兇狠嘅，即使咁遠距離，我都好似可以feel到佢嘅殺氣。
 


而我唔知道嘅係，Chloe其實都有留意到呢一幕。