自從同Miss喺一齊，我就忽然變得好受歡迎: 第199章 兼職奇遇
「你早啲入去適應下都好，嚟緊得番自己一個，悶嗰陣就打下俾我，只要唔係返工時間，我都係喺屋企做嘢多。」一聽到Miss Cheung把聲，腦裡面就會浮現佢絕美嘅臉容同驚世嘅身材，已經好耐冇同佢搞過，希望Miss Cheung聖誕節真係可以過嚟探我。
「Miss，你聖誕係咪真係可以過嚟？我好想見你呀。」我充滿期待咁問。
「我已經請咗聖誕前後兩星期假，我都未喺外國過過白色聖誕，到時你要幫我準備定啲行程。」Miss Cheung果然守諾言。
「冇問題，行程食宿所有嘢都包喺我身上，保證你有個難忘嘅聖誕。」相信對我嚟講一樣難忘。
「咁我旨意晒你，遲啲book咗機票再話你知日期。」Miss Cheung心情似乎好好：「係呢，你冇蝦阿Wing吖嘛，人哋專登走去咁遠陪你讀書，你要好好報答番佢。」
「梗係冇喇，阿Wing對我咁好，我點會蝦佢。」事實係第一日落機我就整喊咗周穎。
「算你喇，咁Chloe呢？你哋相處成點，冇咩問題出現嘛？」可以咁關心男友身邊嘅其他女仔，我估除咗Miss Cheung外應該全世界都搵唔到第二個。
我知Miss Cheung係問Chloe同周穎嘅相處問題：「你放心喇，Chloe同周穎差唔多年紀，好多共同話題，識咗唔係好耐就已經變得好熟。」
所謂「言者無心，聽者有意」，我簡單嘅幾句說話，竟然觸動咗Miss Cheung嘅心事，只聽佢嘆咗口氣：「咁又係，佢哋都係後生女，梗係啱傾。」
「Miss，你喺我心目中先係最完美嘅情人，佢哋同你係喺唔同level，根本冇得比，只係細路女，或者將來佢哋大個咗，可以同你拉近少少距離，不過永遠都唔可能超越到你嘅地位，就好似龜兔賽跑咁，你係小白兔，佢哋只係烏龜。」我即刻講盡好說話氹Miss Cheung，講到有啲語無倫次。
Miss Cheung俾我逗到笑番：「乜又白兔又烏龜咁，你當我哋係寵物咩？而且咁講我仲唔可以偷懶，唔係一陣容乜易被後來居上。」
「冇得後來居上，Miss你呢隻小白兔已經抵達咗我心靈上嘅終點，佢哋只係喺度爭緊第二同第三名。」我越吹越大，反正Miss Cheung又唔會將呢番說話講俾當事人聽，俾周穎知道我比喻佢係烏龜實嬲死我，Chloe反而冇所謂，佢分分鐘仲會走去cosplay做忍者龜嚟同我搞嘢。
「得喇，唔使咁誇張喇，我知你對我好，只係有啲嘢始終係無可改變嘅事實，所以Miss一時有感而發啫。」Miss Cheung語氣輕鬆，似乎真係冇放喺心上。
再傾咗陣，講多好多肉麻說話後，Miss Cheung先叫我早啲瞓，養足精神聽日去搵兼職。
原來Miss Cheung都係會介意我哋之間嘅年齡距離，呢點我以後要小心啲避免觸及，老實講我真係唔會嫌Miss Cheung大過我，仲有少少優越感添，溝到女神Miss喎，係幾多宅男嘅夢想呀。
第二日我好早就起咗身，見到義仔喺度食緊早餐，因為尋日Chloe嘅事，對住義仔時我或多或少都有啲尷尬，不過義仔就好似咩事都冇咁，佢都讀到Year 3喇，相比起之前嘅租客，我暫時應該都算檢點。
我問義仔知唔知學校附近有冇咩地方請我哋呢啲學生做兼職，佢建議我去市中心度試下，因為近學校嘅兼職好搶手，做開嘅人一般都唔會唔做，而且就快開學，要搵工嘅學生都搵晒，不如去市中心碰下運氣仲好。
搭車落市中心要成半個鐘，都幾唔方便，好彩Waterloo算細，唔係就算搵到兼職，日日搭個幾兩個鐘來回都幾甘。
上次有石克隆介紹，好快就搵到強叔呢個好老闆，今次冇咁順利，去咗幾間美式連鎖餐廳都見唔成，唔係冇請人，就係覺得我英文唔夠好唔請，其實佢冇話我英文唔好，只係啲經理見我連佢講嘅英文都聽唔足，講就更加有啲㪐㩿，就擰頭請我離開，我起初喺強叔度做咪仲差，而家都好咗好多喇，做餐廳啫，使唔使俾埋IELTS成績你睇呀？
正當我只係敢喺心度小，但係又唔敢出口同啲老細爭辯嘅時候，身旁突然有人衝門而出，我呢啲練慣嘢嘅人(雖然嚟咗加拿大後扑嘢多過練嘢)點會俾佢撞到，眼明手快閃身避開，立眼見到係一個滿臉怒容嘅亞裔男仔喺間餐廳度衝出嚟。
個男仔都未走遠，就有一個龐然大物跟住出現，喺男仔身後指住佢大罵：「你走吖，走咗唔好返嚟，我唔會出埋啲人工俾你㗎！」
就算俾人咁樣喺後面指罵，亞裔男仔都冇任何回頭嘅意向，仍然直直咁向前急步離開，直至消失喺街頭轉角。
我戇居居咁同龐然大物一齊目送咗男仔後，不其然互相對望，對上一次我用龐然大物嚟形容嘅女仔，已經係邱雅悅，用得同一個詞彙，當然係一個過之而冇不及嘅大肥婆，邱雅悅都有對籃球喺心口，呢個肥婆只係得對手球，乜波唔係越肥越大㗎咩，又肥又冇胸都算罕見。
肥婆見我目視佢身材，竟然覺得我係對佢有意思咁，挺一挺個胸：「𥄫咩呀，未見過咁好身材嘅靚女呀？」
如果唔係見大家都算同鄉，我真係好想大巴大巴咁𢫏過去：「唔好意思，我諗你有少少誤會，我絕對冇任何意圖或者企圖係稍為望下你嘅，只係對眼尾唔覺意睄到你，你知喇，你咁「突出」，基本上好難睇你唔到。」
「咁即係𥄫我喇，我都知我呢啲咁「大」嘅人係特別引人注目㗎喇。」肥婆繼續挺起佢嗰對一啲都唔合乎身體比例嘅手球，好似想𢵌埋我度咁。
平心而論，肥婆係肥，但係都唔算醜，回復正常體型甚至有可能係中上之姿，但係呢種過度自戀嘅性格，實在係有啲得人驚，我本能地覺得再同佢糾纏落去，必定會陷入萬劫不復嘅地獄，所以選擇咗同頭先亞裔男仔一樣嘅做法，轉身準備逃走。
但係肥婆跟住落嚟嘅說話，竟然令我停咗落嚟：「咪走住，你係咪想搵兼職呀？」