自從同Miss喺一齊，我就忽然變得好受歡迎: 第186章 坦白
天氣漸漸轉熱，我打開車窗，微涼嘅晚風使我精神一振，頭先同Chloe嘅對話，除咗提醒我即將要面對嘅問題，亦都令我不禁反省一直以嚟對待感情嘅不正確態度。
之前喺香港，因為太多女埋身，所以本住來者不拒嘅精神，同好多個女仔發展過親蜜關係，我唔敢講話每個我都真心鍾意，但係起碼唔係抱住玩玩下嘅心態同佢哋開始，難得Miss Cheung同周穎都唔介意，特別係Miss Cheung，佢仲好似鼓勵我出去見識多啲，而周穎則係默默承受我嘅不忠。
直到同邱雅琳分開，我先首次意識到，其實我係冇可能一直咁樣同時同幾個女仔一齊，然後又繼續與其他唔同女性發生關係，不過呢種覺悟唔係維持咗好耐，喺嚟咗加拿大之後，我又因為寂寞，變番以前咁濫交，Amy好彩同咗石克隆一齊，跟住係Judy、Chloe，反反覆覆再次犯錯。
而家周穎就快嚟加拿大，我唔可以再好似以前咁，要做番一個配得起佢嘅人，所以我要向Miss Cheung同周穎坦白，我希望Chloe係繼佢哋後嘅最後一個，從此以後，我有咗佢哋三個就足夠，雖然我知道咁樣其實都好貪心。
我冇直接返屋企，而係將車駛咗去附近一個公園嘅停車場，泊低架車後，我先打咗俾Miss Cheung。
「你最近一定好開心喇？阿穎就嚟去加拿大搵你。」Miss Cheung一接電話就咁講。
「如果Miss你都可以過嚟就好喇，我好掛住你呀。」Miss Cheung始終係我嘅第一次，喺我仲未有人要嘅時候，第一個接納我嘅人。
「DSE放榜後啲考生好需要我哋老師嘅幫忙同輔導，我點行得開呀。」雖然早知Miss Cheung會以學校嘅事為重，但係都有啲失望。
「我都明嘅，咁但係我都好需要你。」我儘最後努力囈下Miss Cheung。
「暑假真係有啲忟，一係遲啲聖誕假我先去搵你，呢個暑假有周穎陪你，你都唔會悶喇。」Miss Cheung提出另外一個方案。
「係咪真㗎？咁我留定成個聖誕假俾你，到時你一定要嚟探我喎。」知道Miss Cheung會過嚟搵我，即使唔係即刻嘅事，都已經令我好開心。
「梗係真喇，我應承得你就一定會去探你。」Miss Cheung話：「我都想見下你㗎嘛。」
「Miss，你對我真係好。」不過我對Miss Cheung就唔係太好：「Miss，仲有一件事我想同你講。」
「好呀，咩事呀？係咪識咗新女仔呢？」Miss Cheung唔知講真定講笑咁問。
「吓，Miss你點知㗎？」我真心驚訝，然後將Chloe嘅事一五一十講咗俾Miss Cheung聽。
Miss Cheung聽完之後話：「我都估到你去加拿大咁耐，身邊點會冇女仔出現，只係諗住睇下你幾時先肯同我講。」
「對唔住呀Miss，我唔係唔想同你講，只係一直唔知點講好。」就算而家，我講完俾Miss Cheung聽後都唔知點算好。
「有咩唔知點講啫，我咪話過你有咩都要話我知，你仲細，發生呢啲事一啲都唔出奇，你話我知喺加拿大修心養性專心讀書，我反而唔信喇。」Miss Cheung雖然語帶怪責，但係好似唔係怪緊我同Chloe一齊。
「Miss你唔嬲我咩？」我膽戰心驚咁問。
「嬲㗎！」Miss Cheung即刻話：「嬲你咁遲先同我講囉。」
「Miss，Sorry呀。」除咗道歉，我都唔知仲可以講咩。
「如果再有類似嘅事發生，你一定要早啲話我知，唔可以再好似今次咁遲先講。」Miss Cheung好似教細路咁同我講。
「知道，我保證以後有咩都即時話你知。」我拍晒心口應承：「咁Miss，我同Chloe…」
「你自己決定喇，呢啲事你話我知就夠，以後點做你自己決定。」Miss Cheung截住咗我嘅說話：「男人唔試過點會心熄，你而家揀清楚，好過第時結咗婚後先發現自己揀錯。」
呢幾句聽落有少少晦氣，嚇到我即刻話：「無論將來點樣，如果最後只可以揀一個，我一定會揀你。」
「我冇要你而家決定，你將來諗清楚先再同我講喇。」Miss Cheung見我咁緊張，反而笑咗出嚟。
聽到Miss Cheung笑番，我先放番少少心：「Miss，你對我好到我唔知講咩好，好到我懷疑自己係咪發緊夢。」
「發夢冇咁早喇，好啦，我要預備定DSE放榜後啲工作，總之你知道自己做緊乜，將來唔好後悔就得。」Miss Cheung對Chloe單嘢似乎唔係太上心。
「哦，我知㗎喇。」我見Miss Cheung話要做嘢，只好收線：「咁好喇，我聽日再打俾你。」
講咗Chloe件事俾Miss Cheung聽，我叫做放咗一半心，Miss Cheung對我嘅包容，大到我都有啲唔敢相信，可能佢以前同Richard一齊嘅時候已經習慣咗個男友周圍滾，所以對我都比較寛鬆，不過我係唔可以再咁落去，唔係有一日過咗Miss Cheung條底線，佢堅嬲咗我就大鑊。
跟住就係面對周穎，比起Miss Cheung，周穎俾我嘅壓力冇咁大，但係嬲嘅機會就比較大。
「你係咪好掛住我呢？就嚟有得見都仲成日打嚟。」周穎如佢之前承諾，一響就接聽。
「我梗係掛住你喇，不過今日仲有另一件事要同你講。」我鼓起勇氣，將Chloe嘅事講晒俾周穎知。
「唔怪得你冇同Amy一齊喇，原來同咗第二個，我都估到你冇理由咁清心寡欲，喺加拿大幾個月都冇識其他女仔。」周穎語帶揶揄咁話。
「係我衰咸濕，受唔住誘惑，你嬲我都係啱嘅。」認咗衰仔先點都著數啲。
「你咸濕我一向都知，不過嬲就唔係好嬲，我之前諗住你會同Amy發展，都預咗會多個姊妹，只係估唔到係Chloe啫。」周穎聽落又唔係好嬲：「講定先，我去咗加拿大之後，你唔准成日掛住陪Chloe，要陪番我多啲㗎。」
咁順攤？「你唔介意咩？」我有啲奇怪。
「介㗎，咁你係咪同Chloe分手吖？」周穎反問。
「誒…如果你要我同Chloe分手，咁我梗係聽你話喇。」就算幾唔想，周穎喺我心目中地位始終高啲。
「又唔使咁勉強，我一向都遵守呢個公平競爭嘅法則，如果我真係唔及Chloe，而俾佢搶咗你，咁我只好怪自己唔夠好，輸得心甘命抵。」周穎好豪氣咁講。
唔通呢啲就係「瘦田冇人耕，耕開有人爭」，Chloe嘅出現，反而激起咗周穎嘅好勝心？