自從同Miss喺一齊，我就忽然變得好受歡迎: 第182章 柳暗花明
因為心情嘅改變，餘下嘅時間雖然手裡面拖住嘅係Chloe，但係心裡面諗嘅就係Miss Cheung同周穎，一日過得好快，表面愉快，心深處卻開始有啲忐忑不安。
離開Town仔後，石克隆先車咗Amy同Betty返屋企，然後就車Chloe，Chloe落車嗰陣以為我會跟住佢，連石克隆都有咁嘅諗法，但係我只係落車錫咗佢一啖：「今晚我有啲嘢做，過兩日先再搵你。」
「有咩咁緊要呀？我哋都好耐冇好好相處下。」Chloe話裡嘅意思我當然明白，但係我冇乜心情，亦都唔想求其交貨。
我攬Chloe入懷，輕輕撫摸佢柔順嘅長髮：「一係你聽日嚟接我放工，到時我哋先再慢慢相處。」
Chloe仰頭望向我，原本仲想講啲咩，但係見到我一臉冇情講嘅樣，就低頭大力攬咗我一下，然後放開手，微笑話：「咁我聽日去接你。」
我點點頭，目送Chloe離開後上番車，石克隆好疑惑咁望咗我一眼，見我唔似想解釋，就冇追問。
返到屋企我打咗俾Miss Cheung先，今日香港係假期，Miss Cheung好快就聽咗電話：「你今次咁早打嚟嘅？」
我深吸咗口氣，然後用充滿歉意嘅語氣話：「Miss，對唔住，我諗我今年入唔到大學。」
Miss Cheung沉默咗一陣：「你肯定？會唔會有啲大學要遲啲先收到通知。」
「應該所有通知都出晒，除非有人唔讀空番個位出嚟，但係因為我英文未達標，就算係waiting都唔會有。」如果仲有一絲機會，我都唔會打定輸數。
「咁讀多一年就一年喇，你咁遲先過加拿大係蝕底啲，我相信你都盡咗力，唔好太介懷。」Miss Cheung安慰我，但係安慰嘅說話反而令我更難受。
「Miss，我應承你過咗嚟後會努力，盡快讀完大學返去搵你，點知無端端又要嘥多一年，對唔住。」我係咪真係出盡全力呢？我自己都唔敢講。
「一年啫，你唔使太上心，出年入大學後努力啲，一樣可以提早畢業，最緊要你知道自己今年嘅問題出喺邊，出年唔好再犯同樣錯誤。」我覺得Miss Cheung好似輔導緊學生咁。
突然間好想見到Miss Cheung，好想將佢一擁入懷：「Miss，對唔住，我辜負咗你對我嘅期望。」
「你傻咗咩，講埋啲咁嘅嘢，我對你期望好高㗎喎，相對於餘下嘅日子，入大學遲咗一年咁小事，我係唔會介意，最緊要係你點對我、同埋我哋將來嘅日子。」Miss Cheung話裡充滿愛意。
「我一定會好好對你，俾最好嘅嘢你，Miss你一定要等我。」對現在嘅我嚟講，冇嘢俾心愛嘅人對自己嘅信心更能令我振作起嚟。
「你咁諗就啱喇，我都預咗要等你幾年，等多一年等少一年分別唔大，只要最後你返番嚟我身邊，咁就足夠。」Miss Cheung真係好好，永遠能夠令我最安心。
同Miss Cheung再山盟海誓咗一輪，我先依依不捨咁收線，我本來仲以為Miss Cheung會話我兩句，結果佢只係鼓勵我，令我有種自己好細路仔嘅感覺，而事實上比起出嚟做咗幾年嘢嘅Miss Cheung，我確實係太唔成熟。
跟住落嚟就係周穎，比起Miss Cheung，周穎更難面對，因為佢嚟緊就會過嚟加拿大升學，到時佢讀大學，我讀中學，都幾樣衰！
接通電話後，周穎甜美嘅聲線傳入耳際：「子龍，我好開心呀，今朝早起身就有預感你會打嚟，點知你真係打俾我。」
早排因為驚阻住周穎溫書，所以唔係成日打俾佢：「阿穎，我要同你講聲對唔住，因為我今年應該入唔到大學。」
「出晒結果喇咩？我都未收到取錄消息，仲要等DSE result，或者你都係遲咗，未必入唔到嘅。」周穎好樂觀咁話。
「如果而家仲未收到信，就唔會再收到，而且我英文衰咗，根本都唔合資格入大學，除非有間大學可以唔計英文科喇。」我老實講俾周穎知。
「咦？好似真係有間唔使英文喎，你都有報㗎，University of Waterloo嘛，呢間大學最鍾意收啲數學好嘅人，就算英文攞唔夠分，都可以入讀後再考試補番。」周穎竟然仲熟過我。
講起上嚟我真係有報University of Waterloo喎，仲係貪得意咁報咗心理學，嗰陣都好似係因為有人同我講咗周穎頭先嘅一番說話，先諗住報嚟做後備。
「等我聽日打去問下，話唔定仲有機會。」我突然間有番信心：「不過University of Waterloo係out of town，如果你入University of Toronto，我哋就唔可以返同一間大學。」
「唔緊要喇，到時我哋是但一個轉校咪得囉，只要入咗大學先，第二年再轉唔係咁難，當然第一年要努力啲。」周穎不以為然，讀唔同大學唔重要，最重要同喺加拿大，我又考咗車牌，只要有車，要見唔難。
「到時我轉校，轉番去University of Toronto搵你，你放心，今次我唔會再失手，你俾一年時間我，我一定會再次追上你。」其實我未知係咪入到University of Waterloo，但係已經開定空頭支票。
「就算你唔追我，我都會追你，最多轉去University of Waterloo陪你。」周穎聽我話會追上佢好開心。
「唔得，你讀商科梗係喺University of Toronto好啲。」University of Waterloo出名嘅係數學，所以先會有數學夠分連英文都唔使呢個收生條件。
同周穎講完電話後，好似發現新大陸咁，本來絕望嘅心情，忽然迎嚟一線微弱嘅曙光，因為心情太緊張，搞到成三、四點先瞓得著。
第二朝一早起身就打過去University of Waterloo問，俾人轉來轉去一大輪之後，終於有個知道答案嘅人接聽電話。
「你嘅入學通知上星期已經寄咗俾你，應該差唔多時間收到。」
我急不及待去信箱查看，果然見到封由University of Waterloo寄嚟好厚嘅信，打開一睇，佢哋收咗我讀Bachelor of Science (Psychology)。
總算唔使浪費多一年時間，可以同周穎一齊入大學。