自從同Miss喺一齊，我就忽然變得好受歡迎: 第135章 澳門一日遊
上咗船，我梗係坐中間，左邊係Miss Cheung，右邊係周穎，嘩！呢種左擁右抱，享盡齊人之福嘅虛榮感真係唔錯，仲要前排不停有艷羡目光射過嚟。
「一陣去邊度玩呀？」周穎首先開口。
「去酒店check-in咗先。」Miss Cheung見我露出雀躍眼神，即刻接著話：「放低啲行李，然後再去玩，你做咩咁嘅樣，我知你諗乜，但係我哋係去旅行，最多早啲返酒店。」
「咪係，你聽Miss講喇，你慌今晚會走咗你咩，牛…先生。」周穎即刻加把口。
我啤一啤周穎，佢伸伸脷唔敢再講，平時我講乜周穎都聽晒我話，就算我話要返酒店扑完嘢先出去佢都唔會有半句怨言，點知今日見有Miss Cheung撐腰，當堂咁大膽逆我意！
不過我完全冇嬲，仲覺得有啲打情罵俏嘅新鮮感，拍拖就係要咁，太聽我話或者太唔順我意都硬係踭咁啲嘢，就係要有啲你來我往先正。
船程太快，坐低冇耐同兩個靚女吹咗陣水就要落船，出咗碼頭，再次踏足N年前嚟過嘅澳門，因為對於當年嚟澳門嘅印象已經好模糊，所以彷如有種第一次嚟嘅感覺，加上以前都係同屋企人嚟，而家就拍住拖，中間嘅分別顯而易見。
我聽Miss Cheung話去咗酒店先，check-in咗放低啲行李，雖然我好想去酒店房抽下周穎同Miss Cheung水先，但係其實間房係未有得攞嘅，要下晝兩點後先有，係有啲失望，不過懷住期待心情先去周圍玩下都唔錯。
等Miss Cheung搞掂酒店啲嘢，我哋就先去咗大三巴牌坊，對於呢啲所謂名勝古蹟，我其實冇乜興趣，只係嚟到澳門，唔嚟呢度好似唔得咁，而且都係影下相，再附近逛下，影相我反而好有興緻，因為可以為周穎同Miss Cheung留影之餘，亦都可以有啲合照做紀念，平時都冇乜點影，係上次去加拿大同長洲影咗啲，今次仲可以三人合照添，呢種機會將來都唔知幾時先會再有。
喺大三巴牌坊逼留咗一個鐘度，跟住就去咗澳門旅遊塔，旅遊塔高度比天際100仲矮，景觀算幾好，天朗氣清，望到整個澳門，叫做到此一遊，我哋當然冇玩「笨豬跳」同「空中漫步」嗰啲又貴又自己嚇自己嘅收費活動，但係就睇咗陣啲人嗌晒救命咁跳。
本來Miss Cheung話去360度旋轉餐廳食自助餐，但係我同周穎都覺得有啲貴，而且同香港個自助山應該差唔多，所以就話不如去氹仔官也街食下地道嘢，順便仲可以買下手信，雖然所謂手信香港都周街有得賣。
另一個原因係我始終唔想洗Miss Cheung太多錢，酒店船飛各樣已經係佢俾晒，仲下下豪華遊咁享受有啲過唔到自己條底線，身為男朋友，冇理由乜都要條女負責，Miss Cheung表面雖然唔介意，次次係咁總會有啲哽住，唔好話我大男人，男仔就應該擔當照顧女仔嘅角色，我相信Miss Cheung同周穎都會咁諗。
去到官也街我哋先去間喺網上幾出名嘅地道食店食飯，呢度最出名係魚翅撈飯，唔係出名在啲魚翅貴，而係出名在平，我都請得起有餘。Miss Cheung同周穎怕肥叫咗魚翅撈麵，只有我叫飯，結果兩個都剩咗半碗麵俾我埋尾，令我體會咩叫做飽到上心口。
對於啲fit到Miss Cheung同周穎咁嘅女仔都成日話怕肥，我個人其實唔係咁理解，或者就係因為佢哋成日戒口，先可以保持到咁優美嘅身形。
食完飯就去咗官也街逛，因為條街唔係咁大，所以我哋冇拖住手一齊行，拖Miss Cheung定拖周穎都會冷落咗另一個，結果梗係我一個喺後面跟住佢哋行，從後望前，無論係Miss Cheung嘅黑絲襪定係周穎嘅白滑美腿都非常吸睛，諗起今晚就興奮，咦？今晚我哋三個人住埋同一間房，到時咪可以3P？咪住先，周穎有啲怕醜，到時唔知肯唔肯喎，而且我一個人，點應付兩個呢？史上唯一一次3P就係同Miss Cheung加Miss Yip嗰次，仲搞到精疲力竭，喺呢方面我不嬲係想做唔識做，不過機會難逢，除非有人唔肯，唔係點都要試下。
喺我諗緊今晚點進行3P運動嘅時候，Miss Cheung同周穎已經行完大部份舖頭，我手上面亦都多咗幾袋手信，主要係嘢食，有啲聽佢哋講話係留番今晚返酒店食，因為頭先食到好飽，晚餐唔係咁使食，吓？我就話有啲濟啫，佢哋食半碗麵都話飽，咁我咪應該聽日都唔使食。
雖然抽住一袋二袋，但係Miss Cheung同周穎仲未打算返酒店，佢哋話喺頭先我發緊3P夢嘅時候，同啲舖頭打探咗澳門有個黑沙海灘可以睇日落，所以打算去睇埋日落先，又話早啲返酒店嘅？點解搞搞下越嚟越晏㗎。
心裡面係咁諗，表面上當然係另一回事，而且呢啲睇日落咁浪漫嘅事我都冇同Miss Cheung或者周穎做過，上次去長洲本來係好好機會，結果掛住搞嘢錯過咗，反正今晚流流長，到時搞乜都得，並唔急在一時，而家都係浪漫咗先。
黑沙海灘位於路氹島嘅另一邊，由官也街去都要成個鐘車程，去到仲有一個鐘先日落，黃昏嘅景色都唔錯，沙灘唔多人，通常嚟澳門嘅人都係入賭場，專登嚟旅遊嘅好少，而且除咗啲沙係黑色同可以睇日落，黑沙海灘都唔覺有咩特別之處。
回復番左擁右抱嘅情況，Miss Cheung喺左邊，周穎喺右邊，三個人拖住手漫步沙灘係幾浪漫嘅，我哋搵咗個比較空曠，可以清楚睇到日落嘅地方坐低。
周穎同我都ok，但係Miss Cheung呢身咁性感美艷嘅打扮其實唔係太適合沙灘，坐低嗰陣仲走晒光，好在沙灘冇乜人，唔係俾人睇蝕晒。
雖然我有好多嘢想同兩位靚女講，但係日落前嘅四周好寧靜，靜到令人唔忍心稍有破壞嘅程度，於是我哋三個都冇出聲，我張手攬住Miss Cheung同周穎膊頭，佢哋就分別攬住我條腰同胸口，等待日落嘅來臨。
感覺除咗平靜，仲好安心，如果將我哋三人嘅身影同日落嘅美景畫落嚟，一定係幅動人嘅名畫。