自從同Miss喺一齊，我就忽然變得好受歡迎: 第113章 假手於人
周穎好番之後，身體仲係有啲虛弱，所以我哋冇周圍去，只係喺屋企花園度踱下步、種下花，連最近嘅商場仔都冇去，以免周穎唔覺意又攝親病番。
星期三朝早，周穎突然同我講：「今日你可唔可以幫我做少少嘢？」
「可以，冇可能唔可以囉。」我諗都唔使諗就答。
「你幫我攞呢幾本書去圖書館還吖。」周穎指指身邊嘅書，呢啲書係之前周穎去附近圖書館話想借，而結果搵咗阿妹幫佢借嘅書。
唔使我專登去玩啫：「都未到期，等到期叫阿鳯去還咪得。」
「唔好喇，我已經麻煩咗Phoenix幫我借，仲要叫佢幫我還。」周穎出奇地堅持。
「咁好喇，等你過兩日好啲，我同你一齊去還，順便散下步。」咁小事，我都冇再同周穎爭辯。
「你頭先又話可以幫我嘅？」周穎面色一暗。
突然咁認真嘅？「好，我即刻去還，但係我唔放心你自己一個喺屋企。」
「我有咩事可以打俾你，你速去速回咪得。」周穎笑番。
雖然成件事有啲奇怪，但係經過呢段日子，我明白女人有時係不可理喻嘅，無謂為咗啲咁嘅小事而搞到鬧交收場，睇戲睇得多，啲情侶好多時就係為咗呢啲本來無關痛癢嘅嘢而斷送多年感情。
我用最快速度去圖書館掉低啲書，諗起周穎之前去商場買過啲零食，佢啱啱大病初癒，應該需要多啲高熱量食物補充下。
離開圖書館，身穿連身白色長裙嘅Amy出現喺面前：「咁啱嘅，你嚟借書呀？」
喺呢一刻，我明白周穎係都要我嚟還書喇：「你又咁啱嘅？」
Amy見我話裡有話咁，塊臉一剎那紅到腦充血咁，睇嚟周穎同Amy經過Wonderland之旅後，唔係一般嘅熟。
「我要去商場買啲零食，不如你陪我去吖。」令女仔難堪，唔係一個男仔應有嘅行為。
Amy默默跟喺我身邊，以我第一次同佢相遇時嘅情況，佢俾我嘅感覺係連三九唔識七嘅事都要管一餐嘅人，唔會有嘢都唔敢講。
「阿Wing係咪好番好多喇？」買緊零食嘅時候，Amy終於開口。
其實唔使問我吖，你應該咩都知道：「差唔多好番晒喇，不過身體仲有啲弱，所以今日留喺屋企冇出嚟。」既然Amy要扮傻，咁我都唔忍心踢爆佢。
Amy本來仲想講啲咩，但係結果都係冇開口，反而嘆咗口氣。
見Amy個樣咁為難，我只好話：「其實你係咪有啲嘢想同我講？」
「對唔住，其實我都唔知點解對住你嗰陣會咁緊張，變到咩都唔識講咁。」Amy稍為恢復番啲，話就話唔知講咩好，但係就冇再欲言又止。
「阿Wing其實同你講過啲乜？」既然安排我同Amy見面，周穎除咗得到當事人同意，當事人都應該有啲諗法。
「阿Wing話我有咩想講，應該當面同你講清楚，佢點諗唔係最重要，最重要係你點諗。」Amy望住我，眼神好清澈。
「如果你想講嘅同我心裡面所諗嘅一樣，我諗我要令你失望。」我回望Amy，大概知道佢想講咩，喺幾日前，或者我嘅反應會同而家唔同，但係經過短短數日時間，我對身邊人嘅態度已經有好大轉變。
「我都係咁諗，所以我都冇諗住再講。」Amy冇唔開心，至少表面上睇嚟冇。
「對唔住。」即使冇必要，我都同Amy道咗個歉。
「你冇對我唔住，更加冇對阿Wing唔住，如果你唔係咁嘅人，我都睇唔上眼。」Amy拍拍我膊頭，好似覺得我拒絕佢至啱。
「嚟緊可能有好多嘢要你幫手，因為我啲成績其實喺中線以下，特別係英文，係中線以下下。」以後對待其他女仔嘅時候，我都應該係咁嘅態度，friend可以，超友誼就唔得。
「我聽Phoenix講過，你會過嚟加拿大升學，仲同我哋同一間學校，起初適應係有啲困難，但係有我哋幾個幫你，你出年一定入到大學。」Amy拍心口保證。
同Amy道別後，我攞住幾袋零食返屋企，入房見周穎瞓喺床度望住天花板發緊白日夢，佢見到我有啲訝異：「咦？你咁早返嘅。」
「還完書，買完零食俾你咪返囉，要幾耐呀？」我揚下手裡面嘅零食。
「你…冇發生咩事呀？」周穎想問又唔敢問。
我見周穎個樣咁得意，就上前坐喺床邊：「呀！仲撞到Amy。」
「咁你哋…」周穎望住我，個樣有啲似做錯事嘅細路仔咁。
「傾咗幾句，跟住就各有各返屋企。」我將塊臉𢵌到同周穎鼻貼鼻。
「你𢵌到咁埋做咩喎。」周穎想側臉避開我，但係俾我用雙手夾住塊臉唔郁得。
「我想睇下你跟住落嚟會唔會講大話囉。」我同周穎近到可以互相感受到對方嘅心跳聲，而周穎個心就跳得好快：「係你叫Amy去圖書館等我㗎？」
「係…係呀。」周穎顫顫兢兢咁答。
「點解呢？」我繼續問。
「因為我知道Amy對你有好感，而你又好似對佢都有啲feel，咁咪幫你哋製造機會囉。」周穎講到後來有啲淆底。
「你好想我同Amy一齊咩？」我冇放過周穎。
「你之後要留喺加拿大，我又冇辦法即時過嚟陪你，咁你都要有人陪下，所以我咪…」周穎講到後嚟把聲有啲沙。
又係為晒我，聽到呢度，我仲點好意思怪周穎，我嘆咗口氣，坐番起身：「呢啲嘢一係就你自己做番，唔好假手於人喇，其他人點可以取代你喺我心目中嘅地位。」
「子龍。」周穎起身攬住我，俾我感動到係咁錫我。
「有啲嘢，都係要自己做番先啱，你話係咪呀？」我將手伸入周穎件衫，直接接觸冇戴Bra嘅雙乳：「你今日身體o唔ok呀？我哋都有幾日冇好好親近過。」
周穎點點頭，雖然Amy對竹筍波係幾吸引，但係整體嚟講，現階段嘅周穎係佢絕對無法比得上嘅。