自從同Miss喺一齊，我就忽然變得好受歡迎: 第111章 生病還是心病
我未開口，Amy已經好醒目咁答咗：「你男朋友囉，無端端走嚟嚇我，仲話自己唔係有心。」
我向Amy投以感激眼神，然後轉身同周穎講：「我頭先以為Amy係你，走咗去嚇佢。」
「以為係我？咁你做咩嚇我呀？」周穎似笑非笑咁問。
「我見你頭先玩過山車聲都唔聲下，驚你將啲情緒屈喺心裡面，所以咪諗住幫你抒發番出嚟。」我一路講嘅都係實話，只係冇講唔小心錫到Amy嗰part。
「吓？咁你有冇嚇親Amy呀？」周穎聽完關心起Amy嚟：「Amy，唔好意思，子龍有時就係大細路咗啲，我代佢向你道歉。」
「唔好咁講，都係因為我哋著得太似，況且Wesley本意係為你好，我好羡慕你有個咁好嘅男朋友。」Amy個樣睇落真係幾羡慕咁。
「你唔好聽子龍亂噏，佢分明就係想整蠱我。」周穎口裡面咁講，我知佢心裡面一定唔係咁諗，淨係睇佢個冧樣就知。
之後再冇咩特別事發生，主要都係周穎同Amy發言，我喺側邊做聽眾，間中插一、兩句口。兩個女仔惺惺相惜，Amy仲叫周穎過嚟加拿大升學，周穎冇即時反對，仲話會好好考慮，唔通佢諗住萬一我因為阿爸醒唔番而要留喺加拿大，佢就過埋嚟陪我？
玩到五點零我哋就起程返屋企，阿妹同Betty玩到好盡興。因為有過上次回程嘅驚險經歷，我堅持坐前面𥄫實，周穎同Amy雖然冇玩成日，但係淨上晝嘅活動已經令到佢哋心力交瘁，回程時同Betty一樣瞓到好腍。
早上出發嗰陣周穎同Amy勉強算係識，仲因為我而有少少芥蒂，而家兩個瞓到頭沓頭，十足好姊妹咁，真係應驗咗Betty上車時講嘅戲言。
「冇嗰陣就想有，有嗰陣就想要多啲，多得濟嘅時候又嫌煩，做男人有時都幾悲哀。」阿妹突然有感而發。
「呢方面你一定冇問題，睇你都係多多益善。」我見俾人串，梗係要反擊。
「又唔好咁講，拍拖我係多，但係每次都好專一，唔會一腳踏幾船，真係要開始新感情，都一定會同現任講清講楚先。」阿妹喺感情方面，始乎成熟過我好多。
對於一腳唔知踏緊幾船，仲有好多SP嘅我嚟講，阿妹簡直係聖女，令我無言以對。
「一日未結婚，一日雙方都仲可以揀，喺結婚前搞清楚自己最鍾意係邊個，總好過結咗婚之後搞婚外情，萬一有埋仔女仲大鑊，你做大嘅，自己識諗喇。」點解阿妹忽然間好似變咗愛情達人咁，仲情聖上身點化我。
我十八歲都未夠，講到咁遠有啲早，就係因為咁諗，加上Miss Cheung之前嘅少少放任，令到我有少少來者不拒嘅諗法，未試過梗係咩都想試下，初戀就結婚，一開齋就埋單，話唔遺憾就呃人嘅啫。
無可否認，Miss Cheung同周穎嘅大方令到我玩創咗個心，我一度以為即使發生咩事，佢哋兩個都會喺我身邊，唔會離開我，但係嚟加拿大同Miss Cheung分隔兩地，早幾日因為貪玩叫雞令到周穎差啲俾人強姦，在在話俾我聽如果唔好好珍惜身邊嘅人同事，隨時會落得比以前做宅男更慘痛嘅命運。
我望向後排，周穎同Amy兩個竟然都醒咗，眼光光咁望住我，呢下嘢個驚嚇程度仲大同刺激過玩過山車，嚇到我即刻望番前面，唔敢再擰轉面。
隱約好似聽到周穎同Amy細細聲唔知講緊乜，直到Amy落車先至停落嚟，Amy同我哋講咗聲「拜拜」就返咗入屋，Betty就啱啱瞓醒仲未知咩事咁跟住家姐行。
返到屋企阿妹首先去沖涼，周穎一入房就攤咗落床，睇個樣好似好攰咁。
我有啲想知周穎同Amy頭先傾乜咁神秘，但係又問唔出口，一來太八卦，二來驚周穎誤會我太在意Amy嘅事。
「一陣沖完涼早啲瞓，今日你玩咗成日，又驚咗半日，如果唔好好休息好易病。」我坐喺周穎側邊，輕撫佢嘅長髮。
周穎拉我落去瞓喺佢身邊：「你今日唔想做咩？」
「想唔想都唔重要，你嘅健康緊要啲。」我錫周穎，發現佢塊面紅仆仆，有啲嬌羞咁。
周穎翻身抱住我，用更強烈嘅吻嚟做回應，我伸手入佢件衫，佢個身又滑又暖，摸落令人愛不惜手。周穎都伸手入我條褲摸細佬，溫暖嘅手摸到細佬急速脹大。
咪住，唔係暖，周穎個人直情係有啲㷫喎，我從慾火中清醒過嚟，將周穎抱番落床：「你係咪唔舒服呀？你個身咁㷫嘅。」
周穎有啲迷矇咁望住我：「唔知呢，我淨係覺得個人好熱，好似平時想同你做嗰陣咁。」
我伸手摸下周穎額頭，發現都幾辣手：「你喺度抖下，我去攞個探熱針幫你探下。」
「你唔好離開我。」周穎捉住我隻手，用哀求嘅語氣同我講。
「我唔係離開你，我…」望住周穎水汪汪嘅雙眼，我個心沉咗落嚟：「阿鳯。」
阿妹聽到我嘅叫聲走入嚟：「咩事呀？咦？阿Wing做咩呀？塊面咁紅嘅。」
「我諗佢發燒，你幫我攞個探熱針過嚟。」我將周穎抱喺懷裡面，見佢緊閉雙眼好攰好辛苦咁，眼角仲有少少淚水，我個心就好似俾針拮咁摵摵下。
幫周穎探咗熱，有成39度，算係發高燒，阿妹攞咗啲退燒藥俾周穎食，食完周穎嘅呼吸開始平穩番，軟攤咗喺我懷裡面，我輕輕將佢放番落床，但係冇行開，因為佢仲捉實我隻手。
「點解阿Wing無揦揦會發燒嘅？」阿妹有少少擔心咁問。
「我估嚇親啩。」啲老人家都話嚇親唔嗌會屈到病㗎喇，原來係真嘅。
「嚇親？你講今朝玩過山車？」阿妹好驚訝咁話。
我點點頭，阿妹側頭諗咗諗：「乜會咁㗎咩？等我打去問下Amy有冇都嚇到發燒先。」
「喂，攞盤凍水同毛巾俾我先走呀。」我叫住好似發現新奇事物嘅阿妹。
望住周穎個辛苦樣，我覺得好似係自己一手造成咁，下決心以後一定要好好照顧佢。