自從同Miss喺一齊，我就忽然變得好受歡迎: 第101章 與Miss Cheung的一席話
「這幾天你爸爸情況如何？有好轉嗎？學校的事情你和周穎不用擔心，我會幫你們繼續請假，直到事情辦妥為止。」
「雖然你只是離開了幾天，但是我已很掛念你，以往即使不能天天在一起，但起碼在校時也可經常相見，現在分隔兩地，才深切體會到當中的離愁別緒，你回港後，我想除了周末外，平時也要多點約會。」
「你有想念我嗎？希望你快點回港。」
「你和周穎有好好相處嗎？周穎是個好女孩，你要好好珍惜她，或許她才是你最好的選擇。」
「你們一定玩得很開心，所以已經忘了我這個Miss吧。」
「對不起，剛剛寫了那麼孩子氣的訊息給你，你爸爸的情況一定令你很心煩，你放心，無論將來如何，Miss永遠感激在我最失落的時候，你所帶給我的快樂。」
「子龍，我愛你。」
看完Miss Cheung啲訊息，唔知點解覺得心情有啲沉重，呢幾日我掛住同周穎出雙入對，過埋啲渡蜜月咁嘅生活，唔好話Miss Cheung，連阿爸仲昏迷緊都差啲唔記得，今日甚至對Amy產生咗少少感覺，對於喺香港掛住我嘅Miss Cheung，真係超級內疚。
我忽然好想聽到Miss Cheung把聲，好想話俾佢聽我都有掛住佢、同埋佢仍然係我心裡面最愛嘅人。加拿大嘅凌晨兩點幾，啱啱係香港嘅晏晝點幾鐘，即係Miss Cheung應該食緊lunch，我把握機會用Whatsapp打過去，或者Miss Cheung可以聽到電話。
我走到樓下，直接行出後花園，周圍漆黑一片，只有幾間屋仍有燈光透出。電話響起接通嘅聲音，我個心跳得好快，好驚Miss Cheung唔聽我電話，但係我嘅擔心似乎係多餘嘅，電話只係響咗兩下，Miss Cheung熟悉嘅聲音已經響起。
「喂，子龍？」Miss Cheung充滿驚喜嘅聲音從電話傳出。
「Miss，我好掛住你。」我一聽到Miss Cheung溫柔嘅聲線，忍唔住即刻咁講。
「我都好掛住你。」Miss Cheung用有啲哭音嘅語調話。
我聽落好心痛：「對唔住，Miss，係我唔好，令到你唔開心。」
「你唔好咁講喇，係我唔好至真，我都咁大個人，竟然仲寫埋啲咁唔理性嘅訊息俾你，我冇嘢喎，你只不過離開咗幾日，係我自己太過細路仔。」Miss Cheung好似仲緊張過我。
聽到Miss Cheung咁講，其實我仲唔安樂，我望向因為冇咩光害而星羅滿佈嘅夜空，諗起正喺同一天空下，但係遠在地球另一端嘅Miss Cheung：「Miss，可以得到你嘅青睞，係我幾生修番嚟嘅福氣，無論將來會點，你喺我心目中嘅地位永遠都唔會改變，你永遠都係我最重要、最愛嘅人。」呢啲說話我喺離開香港前就應該好好同Miss Cheung講清楚，咁就唔會令到佢有今日嘅擔心同唔開心。
點知Miss Cheung聽我咁講，反而喊咗出嚟：「子龍，你喺今日肯咁同我講，我已經心滿意足，就算將來發生咩事，我都會記得你曾經喺呢一刻，對我講過嘅呢一番說話。」
或者而家嘅我，真係俾唔到個咁大嘅承諾俾Miss Cheung，就算勉強講再多，說服到自己，都說服唔到其他人：「Miss，我知道呢一刻好難令你相信，但係我會用時間同努力證明我嘅說話。」
「Miss唔係唔信你，只係唔想用承諾束縛住你，你記唔記得我同你講過，只有見識過各種事情之後，最後你都仲係覺得自己想同我一齊嘅時候，你先再同我講頭先嘅說話都未遲。」Miss Cheung少有地認真咁同我講。
似乎再糾纏喺呢個問題上面都唔會有結果：「仲有個零禮拜我就返，我會多啲打俾你，你唔使擔心我，希望阿爸呢兩星期可以醒番，咁我哋就可以回復之前嘅生活。」
「希望真係可以快啲恢復正常。」Miss Cheung都認同我嘅講法。
之後我哋就傾咗啲呢幾日喺各自身邊發生嘅事，Miss Cheung喺香港冇咩特別，畢竟只係過咗幾日，仲要係返緊學，而我就講咗去過嘅地方。
「如果Miss你可以喺我身邊就好。」我衷心講出心底話。
「而家有周穎喺你身邊都唔差吖。」Miss Cheung話裡面有啲醋意。
我嚇咗一跳，本來都好好地，點解又返番轉頭：「Miss，我對你...」
冇等我講完，電話就傳出Miss Cheung嘅笑聲：「你放心喇，係我叫周穎過去陪你㗎嘛，我點會呷佢醋。」
聽到Miss Cheung咁講，我稍稍放心，但係都唔係完全安心，返香港見到Miss Cheung時，一定要同佢好好講清楚。
「我要上堂喇，你專登打俾我，我好開心，只要知道你仲著緊我，我就心滿意足。」Miss Cheung最後話。
「Miss，對唔住，我唔會再令你唔開心。」我拍晒心口話。
「我相信你，我都唔會再咁細路仔。」Miss Cheung把聲充滿溫柔。
同Miss Cheung講完電話後，雖然唔係完全放心，但係都叫做釋懷番唔少，回頭行番入屋，屋外只有我剛才出後花園時打開嘅門燈，屋裡面就有三個對我嚟講都頗重要嘅女人，阿媽、阿妹同周穎。
有時同Miss Cheung一齊嘅時候，我會諗起周穎，同周穎嘅時候就會諗起Miss Cheung，兩個女人都係我而家心裡面最常記掛住嘅人，比起其他女仔如小琪同邱雅琳，Miss Cheung同周穎係我真心想共渡餘生，分享一切喜怒哀樂嘅另一半。
而家Miss Cheung喺香港，而周穎就喺我身邊，但係如果我要留喺加拿大嘅話，呢兩個最珍視嘅人都將會和我分開。
唔係永遠分開，但係分開幾年後，我哋仲可唔可以再喺番埋一齊，其實我無論對自己定對佢哋都冇乜信心，講就天下無敵啫，個零月嘅感情，有可能抵受得住數年嘅分離咩？
返到房，望住仍然瞓得好腍嘅周穎，即使只係隨隨便便咁瞓喺度，周穎都好靚，我瞓低攬住周穎，佢張眼望咗我一下，笑一笑又合埋眼瞓番。
喺呢一刻只要可以擁抱住周穎，將來嘅事又何必諗太多呢？