自從同Miss喺一齊，我就忽然變得好受歡迎: 第九十三章 圖書館中嘅偶遇
離開房嘅時候，阿媽已經返咗工，阿妹仲未起身，出面天氣好好，所以我同周穎就諗住散步去商場食早餐，梳洗完就起行，清晨嘅空氣好清新，喺香港只有間中喺大雨後先可以聞到類似嘅氣味。
每次拖住周穎出街，都有一種難言嘅優越感，軟軟嘅手心傳嚟嘅除咗溫暖，仲有無條件付出嘅愛，可以有個咁靚咁好嘅女朋友，有咩辦法唔自覺高人一等。
去到商場搵咗間地道西式餐廳食早餐，我哋兩個都食得好慢，享受外國獨有嘅寧靜同安逸，商場冇乜人，除咗我同周穎外，餐廳裡面只有另一枱著住西裝嘅外國人。
食完早餐行出商場，發現原來呢個商場側邊仲有一間圖書館，雖然只係地區圖書館，但係我哋都好有興緻去睇下，裡面當然主要係英文書，但係都有幾個書架係中文書，最新嗰本都係幾年前嘅出版，相信係啲住喺附近嘅唐人捐出，唯一比較熱門嘅就係金庸啲書，金庸老人家好犀利，無論去到邊，只要有唐人就可以見到佢嘅足跡。
周穎好有興趣咁翻閱啲英文書，而我就只係喺度參觀圖書館嘅設計同裝修，加拿大地方多，就算普通圖書館都有成幾萬呎，仲要得兩層咁好嘥位，又冇自修室，不過呢度啲人住得咁大咁舒服，都唔使去自修室溫書，就算想出街溫，好似頭先商場個餐廳就大把位，又靜，求其叫杯嘢飲都應該可以坐成日。
圖書館二樓係啲比較學術性嘅書，我見無聊，就去Bio嗰欄度摷下有冇啲人體圖或者性愛指南睇下，點知真係有啲性愛技巧書，有男有女，連男男、女女都有，真係大開眼界，睇得正興起嘅時候，身邊傳嚟「接！」一聲。
心裡面打咗個突，不過我又唔會覺得尷尬喎，呢啲性知識嚟嘛，喺求學時期唔好好學習，唔通等出嚟做嘢先慢慢從體驗中實習，望向聲音發出處，係個一眼就睇得出讀書讀到傻傻地嘅中國女仔，長頭髮，同我差唔多高，五官都算靚，對眼係有啲妖艷嘅鳯眼，聽人講呢種人好醒，仲嫉惡如仇，我睇下咸書啫，唔係當我係色魔呀？況且擺得喺圖書館又冇貼紙條，都唔會係18禁喇。
鳯眼女啤住我，一副想拉我坐監嘅樣，我心諗佢都黐黐地嘅，擰轉身冇理佢繼續睇手裡面本有圖有真相嘅女女性愛書，我唔搵本男女書睇，純粹係因為驚睇到啲西人嘅XXL size之後心生自卑，進而造成心理陰影，影響性能力。
雖然鳳眼女鄙視我，但係我大人有大量，冇同佢一般見識，點知我唔理佢，佢反而過嚟惹我，走過嚟一手搶咗我本書擺番落書架。
正所謂人不犯我，我不犯人，鳯眼女既然犯我在先，我就冇理由同佢客氣，伸手就諗住去攞番本書出嚟睇，我就睇下你奈我咩何。
鳯眼女見我動作，即刻一手㩒落本書度唔俾我攞，我啋佢都傻，大力一扯，唔單止本書俾我掹咗出嚟，鳯眼女都因為呢下無情力成個人失平衡向後跌。
識我嘅人都知我詠春張子龍幾好身手，鳯眼女係衰多事阻人學習，但係見佢成個後惱著地嘅勢，唔救佢容乜易一陣腦震盪由傻傻地變成真傻，我冇書隻手一撈，就捉住鳯眼女隻手，將佢喺冚落地之前嘅一刻拉住。
呢個拉丁舞嘅典型舞姿本來都幾美觀，係阿鳯眼女件衫唔知係咪鬆得濟，係咁情況下竟然反起晒，露出衫下面嘅白色背心，嘩！睇唔出鳯眼女外表成個讀死書，背心下面竟然冇戴Bra，一對傳說中嘅竹筍波高高挺起，隱約見到粉紅色乳尖喺背心面凸晒點，頭先睇書睇到微微扯起嘅細佬，即時變成備戰狀態。
竹筍波好快就俾鳯眼女遮番住，佢見我𥄫住佢個胸，應該諗起自己冇戴Bra嘅情況，塊面紅晒，仲大力甩開我捉住佢隻手，結果當然係「哎吔！」聲中後腦落地，不過好彩佢同地面嘅距離只有一個拳頭位度，係痛，不過絕對唔會腦震盪。
鳯眼女跌落地之後火速向後褪，去到十步開外先爬番起身，好似想大叫又唔敢叫嘅樣，最後怒啤多我一眼後就走咗去。
俾鳯眼女咁搞咗搞，我都冇心情再增進性知識，落番去樓下嘅時候周穎啱啱想上嚟搵我，慶幸佢冇早一步上去，如果唔係見到頭先嗰幕，唔知會唔會以為我真係對鳯眼女有非份之想。
行番屋企途中，周穎好興奮咁話：「頭先間圖書館竟然有幾本絕版英文書，之前我喺香港無論書店定上網都搵唔到，估唔到呢度細細間圖書館就有，唔知可唔可以叫Phoenix幫我借番嚟睇呢？」
「梗係可以喇，一陣返去你直接叫佢去借咪得，我哋都係自己人喇，咁少事唔通佢都托手踭咩。」我口裡面應周穎，腦裡面無厘頭出現見到竹筍波嘅一幕，仲喺度諗唔知竹筍波配嘅係一個點樣嘅B女。
喺呢一刻，我仲未知道自己同竹筍波…唔係，鳯眼女會有再見嘅機會，而且關係仲會變得非比尋常。
返到屋企阿妹已經醒咗，佢竟然以為我哋仲未醒，所以冇打電話搵我，或者佢覺得我哋尋晚一定又激戰幾百回合，今朝冇咁早起到身。
「今日你哋想去邊？我車你哋去。」阿妹問。
「你唔使返學咩？」我心諗，唔通今日係加拿大假期。
「呢度唔同香港，大部份堂都唔使日日上，或者應該話只要你記得交功課同考試就ok，無論中學定大學，啲人都係skip堂多，上堂少，咁大個人，仲日日簽到咁老土咩。」阿妹解釋，咁又幾好喎，唔怪得啲人話外國教學方式同香港唔同，聽落真係好唔同。
「阿Wing頭先喺附近個圖書館睇啱幾本書想借，不如我哋去借書先。」我仲記得周穎啱啱講嘅嘢，好有佢心。
「係呀，Phoenix，可唔可以麻煩你。」周穎聽我提起即刻話。
「咁少事，當然可以喇，之後呢？」阿妹爽快答應，我都諗唔到阿妹會拒絕嘅理由。
「你有冇咩提議？」我話。
阿妹諗咗諗：「我聽日有科要考試，一定要上，所以今日唔可以去太遠，不如去CN Tower同Royal Ontario Museum行下，後日先帶你哋去Niagara Falls，呢個最出名嘅景點，你哋點都要去下。」
「你話事喇。」我冇咩意見，亦都冇能力俾到咩意見。