自從同Miss喺一齊，我就忽然變得好受歡迎: 第八十六章 初到貴境
落機嘅時候冇見到瑜姐姐，佢應該係喺空姐專用出口出咗閘。嚟接機嘅只有阿妹張子鳯，幾年冇見，個樣冇乜點變，但係外觀就由港女變咗做竹昇妹look，進入秋涼都仲著小背心加短裙，化到個妝鬼死咁濃：「阿媽喺醫院陪緊阿爸，呢位係？」阿妹望住周穎。
「周穎，我女朋友。」我轉頭望向周穎：「呢個係我細妹張子鳯，你可以叫佢Phoenix。」
「你好，Phoenix，你可以叫我阿穎。」周穎好有禮貌咁同阿妹打招呼。
「Hi，阿穎。」阿妹一邊帶我哋去停車場攞車，一邊滿臉唔信咁細細聲同我講：「冇見幾年，你竟然溝到個咁靚嘅女朋友，唔係用埋啲𢲡渣手段呀。」
「梗係唔係喇，係真愛。」我見阿妹咁得閒串我，阿爸情況應該有好轉：「阿爸而家點？」
講起阿爸，阿妹臉色一暗：「仲未醒，醫生話唔係咁樂觀。」跟住又講番周穎：「你哋一齊幾耐？」
「都唔係好耐，個零月喥。」講起周穎，其實我有啲自豪，話晒阿妹走嗰陣我仲係A0，點諗到會有今時今日。
踏出機場，空氣涼得嚟好清新，啱啱係早上八點幾嘅時間，好好陽光。
上咗車，阿妹就話：「我哋去睇咗阿爸先，之後先返屋企。」我冇乜異議，擺好行李，我坐車頭，周穎坐後排。
機場位於比較郊區嘅地方，沿途都係密密麻麻嘅叢林，我望向窗外，喺倒後鏡見到周穎個樣有啲緊張，可能因為一陣要見家長，阿妹都叫差唔多年紀，冇乜壓力，阿媽就唔同，既係長輩，又對我擇偶有絕對影響力，雖然我諗唔到有任何理由佢會唔鍾意呢個願意山長水遠陪我嚟睇阿爸嘅品學兼優校花。
清晨嘅高速公路冇乜人，而且今日係星期六，少咗返工嘅人嘅高速公路更顯冷清。
喺去醫院嘅途中，阿妹講多咗少少意外當日嘅嘢我知：「嗰日阿爸放假，一早約咗班friends去約魚，點知一出highway口，就俾人攔腰撞咗埋嚟，好彩當時阿爸車速唔高，所以撼埋壆後就停低咗，不過可能俾airbag撞到個頭，意外後一直昏迷未醒，醫生話X光片睇到個腦冇瘀血，昏迷原因應該係腦震盪，但係腦震盪呢家嘢，昏迷一日定昏迷一年都有可能，既然到而家都未醒，情況就唔係咁樂觀。」
「阿媽情況點呀，頂唔頂得住？」阿爸變成咁，阿媽就被逼成為經濟支柱，假設阿爸要一段時間先醒番，阿媽嘅狀態就好關鍵。
「還好喇，除咗探阿爸，阿媽就係返廠加班，我最近都搵咗份part-time幫補下，我哋屋企叫做有啲積蓄，不過都要為最壞情況預先做準備。」阿妹冇講最壞情況係咩，但係我當然意會佢係講阿爸長期或者永遠醒唔番嘅問題。
「放心喇，必要時我會過埋嚟幫手，賣咗香港間屋嘅話，筆錢應該夠用到我哋出身，到時阿媽就唔使咁辛苦，可以多啲時間照顧阿爸。」呢幾年我唔肯過嚟加拿大，一方面怕唔習慣、一方面就係怕悶，我個人比較內向，唔同阿妹咁去到邊都一大班朋友，只係去到現時環境，我自覺都唔可以再咁任性。
「睇下點先喇，話唔定阿爸過兩日就醒番。」阿妹講還講，但係語氣明顯連自己都說服唔到，為咗紓緩氣氛，佢將話題轉咗去周穎度：「阿穎，你有冇英文名㗎，叫中文名好似好老土咁。」
周穎見阿妹嗌佢，於是答：「咁不如Phoenix你叫我阿Wing呀。」咦？乜原來周穎個英文名叫Wing，睇嚟除咗扑嘢，以後都要花多啲時間同啲女溝通，話時話Miss Cheung個英文名係咩我都唔知，淨係知佢中文名叫張馨頤。
「其實你點同阿哥開始㗎？佢咁毒你都鍾意得落嘅。」阿妹不嬲對我都唔係咁留情：「係咪用埋啲英雄救美或者米已成炊嘅三流招數氹你落叠。」
咦？竟然俾阿妹講中咗一半，我同周穎嘅開始真係有啲米已成炊嘅影子，不過係我俾佢米已成炊啫，周穎似乎同我一樣心思，個樣有啲尷尬咁答：「你阿哥好好呀，係我有幸俾佢睇中就真。」
「唔係我聽錯啩，阿哥你落咗迷藥呀？阿Wing講啲嘢咁唔合理嘅。」阿妹問我，然後望咗望倒後鏡，見到周穎個尷尬樣，即刻指住我大笑：「哦，你死喇，阿Wing個樣分明係中咗招咁，睇嚟你一定係霸王硬上弓，然後再用米已成炊嚟逼阿Wing就範。」難得阿妹去咗加拿大幾年，啲中文都仲幾好。
「你唔好咁講子龍喇，佢冇逼過我，係我…」周穎心急為我分辨，一時漏口踭啲講咗個事實出嚟。
「吓？唔係你霸王硬上弓阿哥呀？阿哥你搵人落阿Wing降頭呀？」阿妹難以置信咁望住我。
「都話咗俾你聽係真愛㗎喇，係你唔信之嘛。」我見有啲唔對路，幫周穎打完場。如果阿妹知道呢個月發生喺我身上嘅事，佢可能真係以為我走咗去拜師學落降頭。
但係事實唔係咁，係同Miss Cheung一齊之後，我先忽然變得咁受歡迎，雖然呢方面Miss Cheung唔認同，但係我心底裡面仍然將呢個當為最合理嘅解釋。
始終大家都係年輕人，阿妹好快就同周穎混熟，周穎對住呢個未來姑仔，態度都好好，除咗阿妹揶揄我嗰陣，佢會出口幫我之外，大部份時間都同阿妹傾得好開心，一副相逢恨晚嘅樣。
氣氛緩和落嚟，大家傾傾下就去到醫院，車程唔係太耐，前後一個鐘喥，呢方面可能都係因為阿妹長期處於速度限制之上嘅緣故，後生仔，有邊個揸車會唔超速。
周穎知道就嚟會見到我父母，突然間又緊張起嚟，阿妹見狀就拖住佢隻手，拍心口話阿媽一定好似自己咁鍾意佢。
上到病房，剛啱見到面容略顯憔悴嘅阿媽喺病房出嚟，唔知係呢幾年捱得辛苦，定係因為阿爸出事影響，阿媽比起我印象中老咗十幾年，佢一見到我哋，就精神番晒咁講：「阿龍，你終於過到嚟，你快啲去睇下你阿爸先。」阿媽留意到周穎，「咦？」咗一聲：「阿鳳，呢位靚女係你朋友呀？」
我本來想同阿媽解釋一下，但係阿妹示意我睇咗阿爸先，於是我同周穎點咗下頭，就先入房睇下阿爸。
「呢個係阿哥女朋友，今次專登陪阿哥過嚟睇阿爸。」房門閂埋前我聽到阿妹嘅聲音，之後仲好似聽到阿媽好大聲咁喺度話：「吓？冇可能，你阿哥咁嘅樣，有個咁靚嘅女仔肯做佢女朋友？」真係不愧兩母女，兩個對我都咁冇信心。
病房裡面得番瞓喺床上面嘅阿爸同我，幾年冇見，阿爸啲頭髮白咗好多，人哋話喺外國揸貨櫃好辛苦，成日要通宵揸車穿州過省，呢幾年我一個喺香港生活得尚算自由自在，但係原來背後阿爸阿媽都為咗我嘅任性付出咁多。