自從同Miss喺一齊，我就忽然變得好受歡迎: 第六十五章 你係咪已經有女朋友
Jessica風風火火咁嚟完又走咗之後，我啱啱著番好褲，邱雅悅就同邱雅琳一齊衝入房，邱雅悅一臉憤怒、邱雅琳則一臉關切。
「班友頭先攔住晒所有人唔俾入，佢哋冇對你做啲咩呀？」邱雅悅咬牙切齒咁問我。
「咁又冇，你見我都冇咩嘢吖。」原來咁叠友，唔怪得搞咁耐都冇人嚟打擾。
「咁大班人咩都冇做就肯走？我見帶頭嗰個就係撞親你個名模，佢哋係咪嚟凶你，叫你唔好爆件事出去？」人哋話「波大冇腦」，邱雅悅對波仲大過Jessica，但係又冇佢咁冇腦。
「係有叫我唔好爆件事出去，不過都冇乜點凶我。」「胸」我就真係有嘅。
邱雅悅擺出完全唔信嘅表情，然後忽然發現咗啲咩咁大力聞咗幾下：「一浸味嘅，佢哋搵人搞你呀。」醫院啲漂白水咁勁都聞到？
我望咗望喺側邊一直好關心咁望住我嘅邱雅琳，都唔知點答好。
邱雅悅見我望向邱雅琳，即刻就誤會晒成件事，好嬲咁講：「好，你既係我未來妹夫，又係王小富個好兄弟，佢竟然都敢搞，呢單嘢你唔使擔心，交俾我處理。」成個大家姐咁款，邱雅悅唔係黑社會啩，咪住，佢做咩提起王小富呀，唔通咁快就搞埋咗？
邱雅琳等邱雅悅離開咗，先至坐埋床邊捉住我隻手，好擔心咁問：「佢哋係咪對你做咗啲好過份嘅事？」
舒服到咁算唔算過份呢？定係應該叫過份舒服呢？「不如唔好提頭先件事。」我都唔知點提好，唔通話我俾人強姦，仲姦到我好舒服咩。
邱雅琳見我滿臉猶疑，以為我受咗好大委屈：「咁你使唔使去廁所，我幫你吖。」點解搞到我哋之間得去廁所咁膚淺嘅。
「唔使…住。」我見邱雅琳去攞尿壼，即刻衝口而出，啱啱搞完嘢仲一浸味，俾邱雅琳知道都唔知點解釋。
邱雅琳見我咁大反應，以為我有創傷後遺症，眼泛淚光咁點咗點頭表示明白，然後將我個頭抱埋佢個胸度：「唔緊要，我唔會迫你，你即管放心，唔會再有人迫你做唔想做嘅嘢。」
所以有誤會嘅時候係好應該一早解釋清楚，件事去到呢一刻，我都已經唔知仲可以講咩，唯有遵從你鍾意點諗就點諗嘅態度，乜都唔再講。
邱雅琳攬咗我一陣，忽然面紅紅咁推番開我：「你肚唔肚餓，我去攞啲嘢俾你食。」
本來用緊邱雅琳個微乳胸嚟做枕頭嘅我，從陶醉中清醒過嚟：「都好吖。」雖然食完早餐唔係好耐，但係搞完嘢都有少少肚餓。
邱雅琳雙目含春咁望一望我，然後走咗出去。
唔係挨下胸都發情呀？不過都唔出奇嘅，尋晚我哋去到咁尾尾，踭臨門一腳就大功告成，我就話今朝有E Cup傻模幫我出火啫，邱雅琳可能仲處於嗰個邊邊位未回番落嚟。
邱雅琳好快返嚟，仲推住一大堆嘢食，除咗前菜同主菜，連生果同甜品都有，我直情覺得去咗食自助餐。
邱雅琳細心餵我食殘廢餐，我係有半邊身唔郁得，仲啱啱俾人搞完，但係絕對唔使咁服待，只係我見邱雅琳好似餵得好開心咁，又唔忍心話要自己食。
食完飯我去疴咗個便，順手洗咗下細佬，等佢冇咁大浸味，一陣唔知發生咩事㗎嘛，都係衛生啲好。
邱雅琳今日好似唔使做嘢咁，一路都喺度陪我傾偈，我好奇問起邱雅悅係咪黑社會嘅時候，佢即刻笑住咁答：「梗係唔係喇，只不過我哋呢間醫院成日都有啲有頭有臉嘅人嚟入住，你唔好睇家姐粗手粗腳，佢對病人好好，個個俾佢照顧過嘅都對佢讚不絕口，所以識落唔少人，今次唔知佢搵邊個幫手呢？」
哦！原來邱雅悅咁把炮，好彩我同佢相處都算融洽，諗諗下佢會唔會越幫越忙，將件事越搞越大：「不如你叫你家姐算喇，件事都過咗去。」
「唔得，點都要幫你攞番個公道。」邱雅琳喺呢件事上面，竟然出奇地強硬。
邱雅悅唔係用咗好多時間，我啱啱食完晚餐已經返到，仲帶咗個估唔到嘅人嚟。
「件事搞掂咗喇，虎哥話會幫你擺平，我哋等消息就得。」邱雅悅充滿大姐大本色咁同我講。
講完邱雅悅同邱雅琳打咗個眼色，邱雅琳點點頭表示會意，然後同邱雅悅離開咗房，跟住換咗個熟悉嘅人入嚟。
「乜今次咁大鑊呀，搞到要阿悅出馬。」竟然係王小富呢個衰仔，阿悅應該係邱雅悅喇，叫到咁親切梗係有路。
「睇唔出你咁有taste喎，你哋點開始㗎？」我冇答王小富，反而想知王小富同邱雅悅點撻著，話晒第一次見嗰陣佢驚到直接不辭而別。
講起邱雅悅，王小富即刻露出充滿愛慕嘅表情：「阿悅係一個好好嘅女仔，之前我同佢喺網上傾偈嗰陣已經覺得佢份人既善良、又開朗，第一次見面嗰陣我咁樣走咗去真係好唔啱，如果唔係你發生咗意外，可能我會就咁失去咗一段咁好嘅姻緣，講起我真係要多謝你。」睇嚟中間發生咗啲不可告人嘅經歷，有機會要審下王小富先。
「咁又唔好咁講，你哋咁有緣，始早都會遇番嘅。」邱雅悅條友邊有咁易死心，遲早實用佢啲關係挖到王小富出嚟。
「總之第時請飲一定唔少得你嗰份。」王小富講到呢度，行埋我側邊細細聲咁講：「聽講你同阿悅細妹都行得好埋，到時話唔定我哋可以繼續做好兄弟，甚至一齊擺酒呢，不過今次到我做你大佬喇，好細佬。」
乜講到咁遠呀，而且講起邱雅琳，我就真係唔係咁睇好，始終有種有緣冇份嘅感覺：「將來嘅事將來先算喇，最緊要你搵到the one。」
王小富聽到我祝福佢都好開心：「你放心，阿悅話今次件事一定幫你搞掂，就算唔計你可能係我妹夫，淨係你係我兄弟呢點，阿悅都實幫你。」乜兩條友講啲嘢一樣嘅，咁快就婦唱夫隨喇。
呢個時候邱雅悅同邱雅琳又入番嚟，邱雅悅向王小富示意，王小富即刻走去拖住佢隻手，喺呢個角度，邱雅悅係可以完全遮住晒王小富嘅身影，真係好壯觀，邱雅悅對我講：「咁我哋走先，你哋都唔好搞咁夜。」
於是間房再次得番我同邱雅琳兩個。
邱雅琳坐番喺床邊，唔知喺度諗緊乜咁，用雙手捉住我隻手一直冇出聲。
敵不動我不動，我見邱雅琳咁嘅樣，就知邱雅悅一定同佢講咗唔少嘢，仲好有可能全部都係王小富呢條不停同我稱兄道弟嘅友仔爆嘅。
邱雅琳滿臉不安，開始用雙手不停咁磨我隻仲郁得嘅右手，好似有啲嘢想講，但係又唔好意思講咁。
終於，邱雅琳鼓起咗好大勇氣咁望住我：「你係咪已經有女朋友？」
「係。」叫得做女朋友嘅，仲唔止一個添。