自從同Miss喺一齊，我就忽然變得好受歡迎: 第四十六章 網友
Miss Yip同Miss Cheung比我早少少出門口，起身嘅時候曾經想扑多轉先返學，但係諗到3P所需嘅強大體力，搞完應該返唔到學，所以我都係乖乖煮早餐俾兩位Miss食，然後送佢哋出門口返工，成個典型住家男人咁。
返到學校嘅時候又係最後一個入課室，周穎見到我，好甜咁對我笑咗一笑，其實對於佢我總係有啲慚愧同內疚，佢紆尊降貴同我一齊，但係我對佢就有啲若即若離，唔係咁熱忱，可能因為識咗咁耐，不嬲佢唔係點啋我，突然間咁熱情，除咗唔習慣，最緊要係太過虛幻，總覺得佢會突然唔再理我。
啱啱坐低，前面王小富就轉頭好神秘咁講：「一陣lunch上天台，有啲嘢想同你傾。」
上天台？唔係連男人都吸引埋咁驚呀：「傾咩呀？」
「總之天台見，咁多年兄弟，你唔係忙到少少時間都俾唔到我呀？」王小富個樣有啲嚇人。
「好，不見不散。」佢出到「咁多年兄弟」呢句，我唯有應承。
呢度要講番少少背景，其實我同王小富中一已經識，當時仲有一個friend叫石克隆，因為我哋個名有啲似「龍虎門」裡面嘅「龍虎三皇」，所以一直以兄弟相稱，石克隆個名咁怪，因為佢係日美mix，一頭金髮都幾型，仲真係識柔道！同我算係同道中人。
升中一係一個全新開始，我哋由小學嘅最高年級變成中學嘅最低年班，雖未至於俾人恰，但係就確實唔係咁適應，石克隆係我哋中間撈得最掂嗰個，有咩事都係靠佢出頭，我因為抽得兩嘢，基本上係我同佢照住一事無成嘅王小富，當年我哋都曾經發生過幾單大嘢，不過呢啲有機會先再講，總之都算係生死之交。
中三嗰陣石克隆因為老豆要返美國發展，所以轉走咗，之後我同王小富就少咗交往，始終少咗個發起人，呢幾年只係間中傾幾句，再冇好似當年咁friend，而今次王小富竟然動用到「兄弟」呢兩隻字，咁就冇辦法唔理佢。
諗起當年嘅事，我不經不覺就喺緬懷中hea到lunch，上到天台，王小富已經懶型咁扶住欄杆喺度睇風景，佢見到我，示意我去佢旁邊，然後就單刀直入：「今次有件事想搵你幫手，如果你唔想做就直接講，我唔會怪你。」
講到黑社會講數咁，我都有啲意外，因為以前惹事生非嗰個多數係石克隆，我就因為抽得去齋抽嘅啫，王小富通常都係企埋一邊搵救兵或者報警嗰個：「有咩直講喇，石克隆走咗之後我哋呢幾年都係各自各摺埋，難得你有嘢搵我幫手，幫到實幫。」
「你咁講就得嘞。」王小富如釋重負咁嘅樣：「首先我問你，你係咪同周穎一齊？」
咦？講咗去周穎嘅，唔係同我爭女呀：「唔好話一齊，叫咗熟咗啲。」保險啲之餘，我亦都唔想將我同周穎嘅事傳到成間學校都知。
「你唔使呃我，我身為第三者，淨係睇你哋呢兩個禮拜嘅關係轉變，都察覺到發生咗咩事。」王小富莫測高深咁講，扮晒知道好多嘢咁。
我冇出聲，等王小富講落去：「周穎咁難搞都俾你搞上，仲要係喺梁偉霆手上面搶過嚟，我真係要講句佩服，所以今次呢單嘢，我認為只有你可以幫到我。」
唔係叫我去撬人牆腳啩？「又唔好咁講，大家咁多年兄弟，你講就得嘞。」
王小富見我就範，於是就將件事詳細講出嚟：「暑假嗰陣，我因為無聊，所以就學人上網識女仔，初初識親嗰啲個個都係為錢，成人叫你去download啲唔同嘅交友app嚟課金傾偈，本來我都開始心淡，但係臨完暑假前，我識咗個女仔，佢同其他人唔同，係真心同我交往，亦都從來冇叫我download app，我覺得佢係一個好女仔。」
或者人哋放長線釣大魚啫：「咁真係恭喜晒你喎，聽落冇咩位要我介入吖。」我真心戥王小富高興，雖然我唔係好信靚女要上網搵男友。
王小富聽我咁講都好開心，不過轉頭又愁眉苦臉咁講：「但係佢話想約我見面，我推咗好多次都推唔到，約咗今晚見。」
醜婦終須見家翁，咁都冇辦法：「不如你哋大家交換咗相先，唔係到時同心目中所想落差太大，不歡而散就唔好喇。」王小富外型唔算差，叫做五官端正，不過都講唔上標青，係肥咗少少，但係男仔好肉地啲咪仲好攬，我都係高質過佢少少，咪一樣有女埋身。
「交換咗喇，呢個就係佢。」王小富攞手機出嚟，俾咗幾張相我睇，相裡面個女仔好純品，長髮紮咗個馬尾，眼大大，輪廓鮮明，外型可愛，有啲日本女星feel，似似地當年嘅小倉優子，唯一缺憾就係個胸太細，我諗最多33A，名符其實係一個A cup嘅女孩，啲相全部都係生活照，唔似係假。
「咁交換咗相佢都肯見你，你仲有咩要愁呢？唔係要我過你兩招啩，過你兩招黐手就冇問題。」溝女呢家嘢，我都係被動㗎咋，主動唔係咁識。
「問題係，我交換相嗰陣用咗你張相。」王小富終於講咗成件事最重要個point。
吓？咁咪即係網騙，但係人哋都有可能用美圖秀秀執過啫：「你咁靚仔，今晚出到嚟咪好驚喜，唔使淆底喎。」我揞住良心踩低自己，唔係唔想幫，係怕有手尾跟。
「我都係咁諗，但係始終好似呃咗人咁，不如今晚你幫我去見佢，然之後詐蹄介紹我出場，之後你就可以功成身退。」王小富滿懷期待咁望住我，我見佢呢幾年除咗抄功課都冇搵過我幫手，有啲唔好意思推。
「咁好喇，既然你都編好晒劇情，今次就幫下你。」呢單嘢聽落比講數仲麻煩，但係又冇乜要做，唔幫手好似有啲絕情。
王小富感激流涕咁再三多謝我，佢走咗之後，攞手機出嚟check missed calls，頭先震咗幾次，不過同王小富傾緊唔好意思聽，原來係周穎打嚟。
一打去，周穎好快就接聽：「今日放學你得唔得閒開會呀？」開咩會，開親會咪都係扑嘢收場。
「今日唔得呀，啱啱應承咗王小富幫佢搞啲嘢。」雖然我絕對係一個重色輕友嘅人，但係王小富單嘢咁急，唔通叫佢改期咩，扑少日嘢又唔會生疏咗。
「哦，唔怪之得見佢同你上天台。」周穎有啲失望，但係再冇好似之前咁發爛渣，唔知係咪犯賤，講真反而有啲唔慣。
「不如聽日你嚟我屋企開會吖，我仲可以煮飯俾你食。」我聽到周穎把聲咁sad，心裡面都有啲唔舒服，於是同佢提議。
「好呀，咁我哋聽日一齊放學吖。」周穎即刻開心番。
收線後，我發覺開始唔知自己想點，見到周穎唔開心就想氹番佢，同樣情況發生喺Miss Cheung、或者甚至Miss Yip同小琪身上時，我都應該會想佢哋開心番，但係一個人，係冇可能可以滿足到所有人。
我冇諗太多，因為喺呢一刻，實在冇能力去諗到個比較妥善嘅解決辦法，歸根究底，我始終係一個人渣，根本唔捨得為咗一個人而修心養性，學Miss Cheung話齋，未試過，點知邊個最好，只不過係要試到幾時，而且一個好女仔，又可以忍我忍到幾時？
放學後，同王小富好friend咁一齊走，對上一次出現咁嘅情況，都起碼幾年前。王小富約咗佢個網友去太子一間幾有名嘅老牌西餐廳見面，我哋早咗半個鐘到，上咗二樓，我坐窗邊卡位，佢就坐喺我背後斜角線，剛啱可以望到我對面嘅位置，方便佢𥄫女。
差唔多夠鐘，我擰頭望咗王小富一眼，佢已經換咗便服，全餐廳係得我仲著住校服，呢個係佢同網友相約嘅打扮，王小富同我單眼，呢個訊號即係話網友已經通知佢喺樓下，而家上緊嚟。
王小富個樣好緊張，我就慶幸終於可以返屋企思考下人生，滿懷期待下，出現喺樓梯口嘅，竟然係一個只能用龐然大物嚟形容嘅女性物體，欣宜喺佢面前都變咗苗條淑女，睇落佢唯一優點應該就係胸大，目測至少38E，好似擺咗兩個籃球喺心口。
我同王小富用難以置信嘅眼神，望住龐然大物向我行過嚟，然後坐咗喺我對面。我唔知點解佢可以坐到入去對面嘅卡位，不過佢嗰對籃球就冇辦法塞得入，只可以擺咗喺枱上面。
「你就係王小富，終於可以見到你真人，我好開心呀。」龐然大物個樣其實唔差，小倉優子如果肥到呢個size應該都係咁上下，好明顯佢真係美圖瘦瘦咗囉。
王小富講過呢個網友叫邱雅悅：「邱小姐，我都好高興可以見到你。」根據劇本，呢個時候我係會擰轉面唔覺意望到王小富，同佢好意外咁撞到，跟住介紹佢兩個識，然後借肚痛遁，單都唔使賣。
擰去後面一望，見到待應喺度執緊原本王小富坐嗰張枱，我心裡面不由開始問候王小富屋企人，枉我嘢都唔扑嚟幫你，竟然咁冇義氣著草！