🏫 👩🏼❤仲講中學生「應否」拍拖？不如講下「如何」拍拖啦！🏫 【校園】【愛情】【鬥智】: Ch.4.1 cafe小姐
---同日18:00---
幸好今日原定嘅塔羅班改期，所以下個節目就係我、David、雨晴同Anna 4人去New age cafe。
「叮噹！」
「先生，有冇預約？」撳鐘開門，就有個年紀看似大我幾年嘅女仔招呼我。
深啡色長髮、大概米六高，個樣少少成熟斯文；我認得佢，上個星期六晚喺旺角街道向我派傳單張嘅果位女仔，然後當時我拒絕過佢。
佢接待我地，我同David沿住大廳走，走到盡頭，搵一張靠窗嘅四人位坐低。
一入去New age cafe，面積差不多一個普通家庭式住宅咁，我望大約700呎左右，有bar位，一房一廳，個廳呈L型，而房間相信係作為員工休息室。
深啡色系嘅牆身裝修，華麗嘅水晶吊燈，發出淡黃嘅光線，再配置洋式家俱，成個氣氛簡直復古歐式文青feel。
呢度嘅氣氛類似crosstini咁，私隱度十足十，我而加坐嘅位置仲可以比你暢所欲言，感覺可以比你同frd一對一傾計又唔怕比人偷聽；暗色系嘅環境佈置，窗又整到歐式風格，仲落埋厚厚嘅窗簾，令到個人更加容易放鬆神經，冷靜沉思，成個場perfect！
儘管私隱度高，但靜中帶旺，帶點客人嘻嘻哈哈嘅熱鬧聲。可能最近先新開張吧，今日又撞正星期六，個個都貪新鮮上黎，幾乎坐滿曬全店所有位。
我：不如叫嘢食先？
David：好呀，我都肚餓。
呢位深啡色長髮嘅女侍即刻將手上嘅menu遞比我地。
佢：你地係第一次上嚟？
(熱情地說)
我地4個：係呀！
佢：介紹下我地先，我地呢度係一間Board game cafe，最低消費係一set套餐，而家新開張期間至到月尾有8折優惠，由入座時間開始計嘅頭兩個鐘唔加錢，之後超時每個鐘加30蚊。
佢一邊打開本menu，一邊介紹住呢間cafe嘅消費、規矩、食物等等。
Anna：好呀唔該你先，我地自己慢慢諗。
我地4個一齊睇menu，見到平均一set套餐around 90蚊，連加一服務都係100蚊左右。
跟住我地4個諗好曬就落單，然後繼續吹水，我叫咗份芝士焗海鮮長通粉，搭凍檸茶。
David望住我兩秒，然後講：你個樣去cosplay鬼滅個鬼王都幾似。
Anna：咦，又係喎！
Anna：Issac個髮型又幾似鬼王無慘bo
(佢開玩笑地說)
雨晴：係囉，Issac好適合cos無慘lor!
(附和tone)
我：你地唔好將我講到好似隻鬼咁啦！
(我也笑之回應)
Anna：我好想睇下Issac女裝時個樣係點，女版無慘都靚呀。
(期待的tone)
我：拿，我唔做偽娘㗎。
可能我皮膚本身少少白，所以Anna先會咁講。
傾下傾下有啲悶，就攞層層疊積木嚟玩。
David：你郁先啦。
我哋經過多回合對疊，大家戰戰兢兢地扯積木，同時又戰戰兢兢地疊返上去，因為連疊上去果一下都會怕幢樓搖；幢「樓」愈起愈高，終於開始搖搖欲墜。
喺大家玩嘅同時，有一個少女的背影引起了我嘅注意。
我望到一個年齡同我差唔多大，扎起了烏黑長髮的馬尾，前面卻留有斜陰和兩邊梳落的長髮，算正正常常，10嚟計有6分，覺得佢有少少怕生；論身材同一般香城女仔差不多，不肥也不瘦，身高方面大概16X高吧。
工作時嘅佢上衣身穿黑色T-shirt制服，下身就係牛仔短褲，本身已有165高嘅佢就顯得更修長。
見到佢斟茶遞水，同傳菜嘅動作有少少驚到震；我就肯定佢仲係一個入世未深嘅學生妹，啱啱新嚟打工。
David：喂，到你喇。
我一邊諗緊呢個女仔，一邊扯積木。
我看見成幢「危樓」慢慢地向右擺，愈擺愈快。
點知⋯⋯
「砰！！！」分曬心添。
點都好，我真係好想同呢位女侍應傾返兩句。
「喂，玩唔玩狼人殺呀？」有個女客人走埋黎問我地。
原來呢個女客人想夾人玩，於是大家埋堆；喺侍應幫助下搬檯，大家圍成一個圈咁坐。
我：你想幾多個人玩？
女客人：3狼3神3人。
男客人A：數下人頭先⋯⋯
「1, 2, 3, 4, 5, 6, 7, 8......」
男客人A：仲差一個人啵⋯⋯
正當大家dead air冇頭緒，嗰位令我有好感嘅少女侍應托住一碟長通粉走埋嚟。
「邊個叫咗芝士海鮮長通粉？」佢問。
嗯，一於叫埋佢玩。
我：不如我地問下呢位女仔玩唔玩呀？
佢：好呀。
(有點害羞地回答)
佢：不過你可唔可以等我傳曬d餐先呀？
眾人：你慢慢啦！唔洗急。
我地準備開局之時，我地4個嘅套餐啱啱好到齊。
呢一位女侍應最後坐喺我嘅右邊。
女客人：不如大家自我介紹下先啦，唔好攪到大家成日講你你你我我我。我叫Bianca！負責狼人嘅mc。
今次嘅遊戲有3狼(2普通狼+1隻狼王)，3神(預言家+女巫+獵人)，3個廢村。頭先叫我地join嘅果位女客人叫Bianca。
但係坐我右邊嘅呢位女侍應唔識玩，於是Bianca首先向佢介紹下遊戲規則同埋D角色牌點用。
「我叫雨晴」「叫我Anna」「我係詠妍」......
David：是但啦
Bianca：咁我地就叫係「是但啦」，你真係想咁叫？
David果然係開心果，大家都笑了。
描寫少少David先，David個樣喺男仔黎講10入面得5分，雖然係四眼仔一個，但係五官尚算端正。身材方面微胖，但平時都執得幾乾淨；身高方面和同年紀嘅男仔差不多175。性格方面佢係一個樂觀、鍾意玩嘅人、成日口花花，有時能夠吸引到女仔。
David：正經啲喇，其實我係David。
我：我係Issac
女侍應：我⋯⋯我係阿玲
Bianca：好，我派牌比大家先啦。
然後Bianca就開始洗牌。
坐喺我右邊嘅阿玲對我悄悄話：其實我仲係唔識點玩架。
我：咁你好好睇我地玩一場喇。
(輕聲回應)
最後我從檯上接過一張遞過黎嘅牌，微微揭開昅一昅⋯⋯
我係狼人。